Foto: Reuters

Iraktağı Kürdistan avtonomiyası ortalıq biliktiñ qarsılığı men körşiles memleketterdiñ qısımına qaramastan, täuelsizdik jolındağı referendumın ötkizdi. Referendumnıñ dauıstarı äli sanalıp jatır, biraq avtonomiyanıñ derbes memleket boluın qoldaytındardıñ üles salmağı basım degen senimdi pikirler az emes. Bwl turalı APF aqparattıq agenttigi jazdı. 

Referendumnan aldın jergilikti bilik ökilderiniñ aytuınşa, 5,3 mln adam qatısadı dep kütilgen, onıñ 4,58 millionı tirkeldi. İs jüzinde, öziniñ azamattıq qwqığın paydalanıp, dauıs bergender - 3,3 mln (72 %).

Irak Ükimeti öz twtastığın saqtau üşin qolınan kelgenniñ bärin jasauğa uäde etip, Kürdistan basşısı Masud Barzanidiñ kelissözderge şaqırğan wsınısın qabıldamağan bolatın. Qos taraptıñ arasında mwnaylı audandarğa qatıstı şeşimin tappağan daulardıñ barın eskersek, Kürdistannıñ Iraktan beybit türde enşisin alıp şığatınına senu qiın. Bağdadtağı Kürdistannıñ referendumın Konstituciyağa qarsı dep tapqan şeneunikter Ükimetten dauıs beru ötip jatqan audandarğa qauipsizdik qızmetkerlerin jiberudi talap etkenimen, keşegi kün artıq qaqtığıssız tınış ötti.

Kürdistan halqı wlttıq kiimderin kiip, referendum ötken üş audanda merekelik köñil-küy ornap twrdı. Referendum qorıtındısı "oñ" bolğan jağdayda, Kürdistan bir-eki kün işinde Iraktan irgesin aulaq salıp, täuelsiz memleket atana almaydı. Degenmen, avtonomiya halqı täuelsizdik jolındağı eñ ülken äri mañızdı qadam jasalğanına quanışın bildirdi.

Iraktağı Kürdistan avtonomiyasınıñ täuelsizdikke qadam jasauı älemniñ birqatar elderine wnağan joq. Öz elderinde kürd wltınıñ edäuir böligi şoğırlanğan Iran, Türkiya siyaqtı memleketter bwl bastamağa qarsılıq bildirip, Iraktıñ mwnayına qarsı sankciya engizip, şekaranı jabatının aytıp, qauip töndirdi.

AQŞ referendumnan keyin Kürdistanğa qarsı qarım-qatınası özgermeytinin, degenmen el işindegi twraqtılıqtıñ bwzılatınına alañdaytının jetkizdi. BWW da Kürdistannıñ täuelsizdikke wmtılısına ülken qwrmetpen qaray otırıp, közdegen maqsattarğa beybit türde, kelisim arqılı qol jetkizudi qoldaytının eskertti.

“The Qazaq Times”