يراكتاعى كۇردىستان اۆتونومياسى رەفەرەندۋم وتكىزدى

يراكتاعى كۇردىستان اۆتونومياسى ورتالىق بيلىكتىڭ قارسىلىعى مەن كورشىلەس مەملەكەتتەردىڭ قىسىمىنا قاراماستان، تاۋەلسىزدىك جولىنداعى رەفەرەندۋمىن وتكىزدى. رەفەرەندۋمنىڭ داۋىستارى ءالى سانالىپ جاتىر، بىراق اۆتونوميانىڭ دەربەس مەملەكەت بولۋىن قولدايتىنداردىڭ ۇلەس سالماعى باسىم دەگەن سەنىمدى پىكىرلەر از ەمەس. بۇل تۋرالى APF اقپاراتتىق اگەنتتىگى جازدى. 

رەفەرەندۋمنان الدىن جەرگىلىكتى بيلىك وكىلدەرىنىڭ ايتۋىنشا، 5,3 ملن ادام قاتىسادى دەپ كۇتىلگەن، ونىڭ 4,58 ميلليونى تىركەلدى. ءىس جۇزىندە، ءوزىنىڭ ازاماتتىق قۇقىعىن پايدالانىپ، داۋىس بەرگەندەر - 3,3 ملن (72 %).

يراك ۇكىمەتى ءوز تۇتاستىعىن ساقتاۋ ءۇشىن قولىنان كەلگەننىڭ ءبارىن جاساۋعا ۋادە ەتىپ، كۇردىستان باسشىسى ماسۋد ءبارزانيدىڭ كەلىسسوزدەرگە شاقىرعان ۇسىنىسىن قابىلداماعان بولاتىن. قوس تاراپتىڭ اراسىندا مۇنايلى اۋداندارعا قاتىستى شەشىمىن تاپپاعان داۋلاردىڭ بارىن ەسكەرسەك، كۇردىستاننىڭ يراكتان بەيبىت تۇردە ەنشىسىن الىپ شىعاتىنىنا سەنۋ قيىن. باعدادتاعى كۇردىستاننىڭ رەفەرەندۋمىن كونستيتۋتسياعا قارسى دەپ تاپقان شەنەۋنىكتەر ۇكىمەتتەن داۋىس بەرۋ ءوتىپ جاتقان اۋداندارعا قاۋىپسىزدىك قىزمەتكەرلەرىن جىبەرۋدى تالاپ ەتكەنىمەن، كەشەگى كۇن ارتىق قاقتىعىسسىز تىنىش ءوتتى.

كۇردىستان حالقى ۇلتتىق كيىمدەرىن كيىپ، رەفەرەندۋم وتكەن ءۇش اۋداندا مەرەكەلىك كوڭىل-كۇي ورناپ تۇردى. رەفەرەندۋم قورىتىندىسى "وڭ" بولعان جاعدايدا، كۇردىستان ءبىر-ەكى كۇن ىشىندە يراكتان ىرگەسىن اۋلاق سالىپ، تاۋەلسىز مەملەكەت اتانا المايدى. دەگەنمەن، اۆتونوميا حالقى تاۋەلسىزدىك جولىنداعى ەڭ ۇلكەن ءارى ماڭىزدى قادام جاسالعانىنا قۋانىشىن ءبىلدىردى.

يراكتاعى كۇردىستان اۆتونومياسىنىڭ تاۋەلسىزدىككە قادام جاساۋى الەمنىڭ بىرقاتار ەلدەرىنە ۇناعان جوق. ءوز ەلدەرىندە كۇرد ۇلتىنىڭ ەداۋىر بولىگى شوعىرلانعان يران، تۇركيا سياقتى مەملەكەتتەر بۇل باستاماعا قارسىلىق ءبىلدىرىپ، يراكتىڭ مۇنايىنا قارسى سانكتسيا ەنگىزىپ، شەكارانى جاباتىنىن ايتىپ، قاۋىپ ءتوندىردى.

اقش رەفەرەندۋمنان كەيىن كۇردىستانعا قارسى قارىم-قاتىناسى وزگەرمەيتىنىن، دەگەنمەن ەل ىشىندەگى تۇراقتىلىقتىڭ بۇزىلاتىنىنا الاڭدايتىنىن جەتكىزدى. بۇۇ دا كۇردىستاننىڭ تاۋەلسىزدىككە ۇمتىلىسىنا ۇلكەن قۇرمەتپەن قاراي وتىرىپ، كوزدەگەن ماقساتتارعا بەيبىت تۇردە، كەلىسىم ارقىلى قول جەتكىزۋدى قولدايتىنىن ەسكەرتتى.

“The Qazaq Times”