QR Energetika ministrligi benzin bağasınıñ nelikten qımbattağanın tüsindirdi. Vedomstvonıñ sözinşe, bağanıñ qımbattauı Resey janarmayınıñ importtaluımen  baylanıstı.

"Qazir Resey benzininiñ ülesi köbeydi, bağa biraz qımbattaydı. Qazir bağanıñ qwbılu mausımı, sebebi zauıt jwmıstarı toqtağan soñ swranıs artadı. Biz qazan ayınıñ soñına deyin balans retteledi dep oylaymız. Bağa narıq jağdayına baylanıstı boladı", - dedi QR Energetika ministrliginiñ mwnay önerkäsibin damıtu departamentiniñ direktorı Quanış Qwdaybergenov.

Sonday-aq ol Qazaqstan ne üşin Resey benzinine täueldi ekenin tüsindirdi.

"Qazirgi kezde Reseyden benzin (AI-92 – 30%) men dizel' otını (15%) importtalıp otır. Sebebi bizdegi zauıttar jöndeu jwmıstarına baylanıstı uaqıtşa jabıldı. Mısalı Atıraudağı zauıt tamız ayınan bastap 18 qırküyekke deyin jabılğan. Al Pavlodardağı mwnay öñdeu zauıtı qırküyektiñ 20-sınan qazannıñ 25-ine deyin jöndeu jwmıstarı boyınşa jabıladı.Sondıqtan osı zauıttar öndirmegen şikizat kölemin biz Reseyden aluğa mäjbürmiz", - dedi vedomstvo ökili.

Ayta keteyik, Qazaqstanda benzin bağası tamız ayınan bastap tağı qımbattay bastağan. Mısalı Almatı qalasında AI-92 markasınıñ litri - 145-147 teñge  (tamız ayında 143 teñge bolğan), dizel' otınınıñ litri - 145-147 teñge (1 teñgege qımbattağan), AI-95 markası —158-159 teñge aralığında satılıp jatır.

Eskeretin jayt, Ükimet teñge qwbılsa, benzin qımbattasa, ekonomika älsirese Resey narığımen baylanıstırudı ädetke aynaldırğan. Mümkin şınımen de solay şığar. Alayda "zauıttar jöndeu jwmıstarı üşin jabılatın bolsa, öndiris nege artıq orındalmağan?" degen swraq tuındaydı. Onıñ üstine benzin bağası qımbattap, onıñ qayta tüsui osı uaqıtqa deyin bola qoyğan joq.

“The Qazaq Times”