ەنەرگەتيكا مينيسترلىگى بەنزيننىڭ نە ءۇشىن قىمباتتاعانىن ءتۇسىندىردى

قر ەنەرگەتيكا مينيسترلىگى بەنزين باعاسىنىڭ نەلىكتەن قىمباتتاعانىن ءتۇسىندىردى. ۆەدومستۆونىڭ سوزىنشە، باعانىڭ قىمباتتاۋى رەسەي جانارمايىنىڭ يمپورتتالۋىمەن  بايلانىستى.

"قازىر رەسەي بەنزينىنىڭ ۇلەسى كوبەيدى، باعا ءبىراز قىمباتتايدى. قازىر باعانىڭ قۇبىلۋ ماۋسىمى، سەبەبى زاۋىت جۇمىستارى توقتاعان سوڭ سۇرانىس ارتادى. ءبىز قازان ايىنىڭ سوڭىنا دەيىن بالانس رەتتەلەدى دەپ ويلايمىز. باعا نارىق جاعدايىنا بايلانىستى بولادى", - دەدى قر ەنەرگەتيكا مينيسترلىگىنىڭ مۇناي ونەركاسىبىن دامىتۋ دەپارتامەنتىنىڭ ديرەكتورى قۋانىش قۇدايبەرگەنوۆ.

سونداي-اق ول قازاقستان نە ءۇشىن رەسەي بەنزينىنە تاۋەلدى ەكەنىن ءتۇسىندىردى.

"قازىرگى كەزدە رەسەيدەن بەنزين (اي-92 – 30%) مەن ديزەل وتىنى (15%) يمپورتتالىپ وتىر. سەبەبى بىزدەگى زاۋىتتار جوندەۋ جۇمىستارىنا بايلانىستى ۋاقىتشا جابىلدى. مىسالى اتىراۋداعى زاۋىت تامىز ايىنان باستاپ 18 قىركۇيەككە دەيىن جابىلعان. ال پاۆلودارداعى مۇناي وڭدەۋ زاۋىتى قىركۇيەكتىڭ 20-سىنان قازاننىڭ 25-ىنە دەيىن جوندەۋ جۇمىستارى بويىنشا جابىلادى.سوندىقتان وسى زاۋىتتار وندىرمەگەن شيكىزات كولەمىن ءبىز رەسەيدەن الۋعا ءماجبۇرمىز", - دەدى ۆەدومستۆو وكىلى.

ايتا كەتەيىك، قازاقستاندا بەنزين باعاسى تامىز ايىنان باستاپ تاعى قىمباتتاي باستاعان. مىسالى الماتى قالاسىندا اي-92 ماركاسىنىڭ ءليترى - 145-147 تەڭگە  (تامىز ايىندا 143 تەڭگە بولعان), ديزەل وتىنىنىڭ ءليترى - 145-147 تەڭگە (1 تەڭگەگە قىمباتتاعان), اي-95 ماركاسى —158-159 تەڭگە ارالىعىندا ساتىلىپ جاتىر.

ەسكەرەتىن جايت، ۇكىمەت تەڭگە قۇبىلسا، بەنزين قىمباتتاسا، ەكونوميكا السىرەسە رەسەي نارىعىمەن بايلانىستىرۋدى ادەتكە اينالدىرعان. مۇمكىن شىنىمەن دە سولاي شىعار. الايدا "زاۋىتتار جوندەۋ جۇمىستارى ءۇشىن جابىلاتىن بولسا، ءوندىرىس نەگە ارتىق ورىندالماعان؟" دەگەن سۇراق تۋىندايدى. ونىڭ ۇستىنە بەنزين باعاسى قىمباتتاپ، ونىڭ قايتا ءتۇسۋى وسى ۋاقىتقا دەيىن بولا قويعان جوق.

“The Qazaq Times”