Foto: astana.enbek.gov.kz

Qazaqstandıqtar medicinalıq saqtandıruğa qaramastan aurulardıñ keybir türleri boyınşa tegin medicinalıq kömek aladı. Bwl turalı QR Densaulıq saqtau ministrliginiñ baspasöz qızmeti habarladı. 

"Densaulıq saqtau ministrligi Mindetti äleumettik medicinalıq saqtandırudı engizu şeñberinde, sonday-aq medicinalıq qızmet körsetu maqsatında äleumettik mañızı bar aurulardıñ jäne qorşağan ortağa qauip keltiretin aurulardıñ tizimin bekitti. Atalğan normativti-qwqıqtıq aktige säykes respublikanıñ barlıq azamattarı medicinalıq saqtandıruı bar-joğına qaramastan, joğarıda körsetilgen tizbedegi barlıq aurularğa kepildendirilgen tegin medicinalıq kömek köleminiñ şeñberinde medicinalıq qızmet aluğa boladı", - delingen ministrlik taratqan habarlamada.

Mäselen, tizimge säykes, äleumettik mañızı bar aurularğa 13 auru türi kiredi. Olar:

  • tuberkulez;
  • adam immuniteti jetispeuşiligi saldarınan tuındağan auru jäne adam immuniteti jetispeuşiligi virusın tasımaldauşılar;
  • V, S virustı gepatiti;
  • qaterli jañadan payda bolğan öskinder;
  • qant diabeti;
  • psihikanıñ jäne jüris-twrıstıñ bwzıluı;
  • balalardağı cerebraldı sal auruı;
  • miokard infarktisi (alğaşqı altı ayda);
  • revmatizm;
  • däneker tinderdiñ jüyeli bwzıluı;
  • ortalıq jüyke jüyesiniñ twqım qualaytın-degenerativti auruları;
  • ortalıq jüyke jüyesiniñ mielinsizdendiru auruları;
  • orfandıq (sirek kezdesetin) aurular.

Al qorşağan ortağa qauip keltiretin aurular tizimine 16 auru türi kirdi:

  • adam immuniteti jetispeuşiligi saldarınan tuındağan auru jäne adam immuniteti jetispeuşiligi virusın tasımaldauşılar;
  • tuberkulez;
  • gemorragiyalıq qaltırau;
  • difteriya;
  • meningokokk infekciyası;
  • poliomielit;
  • psihikanıñ jäne jüris-twrıstıñ bwzıluı;
  • jınıstıq jolmen beriletin infekciyalar;
  • alapes;
  • bezgek;
  • sibirjarası (ökpedegi forması);
  • tırısqaq;
  • oba;
  • iş süzegi;
  • A virustıq gepatiti
  • tulyaremiya.

Ministrliktiñ mälimetinşe, 2016 jılı Qazaqstanda äleumettik mañızı bar aurularmen 508128 twlğa, sonday-aq, qorşağan ortağa qauip keltiretin aurular tizimine kiretin 134757 twlğa tirkelgen.

“The Qazaq Times”