فوتو: astana.enbek.gov.kz

قازاقستاندىقتار مەديتسينالىق ساقتاندىرۋعا قاراماستان اۋرۋلاردىڭ كەيبىر تۇرلەرى بويىنشا تەگىن مەديتسينالىق كومەك الادى. بۇل تۋرالى قر دەنساۋلىق ساقتاۋ مينيسترلىگىنىڭ ءباسپاسوز قىزمەتى حابارلادى. 

"دەنساۋلىق ساقتاۋ مينيسترلىگى مىندەتتى الەۋمەتتىك مەديتسينالىق ساقتاندىرۋدى ەنگىزۋ شەڭبەرىندە، سونداي-اق مەديتسينالىق قىزمەت كورسەتۋ ماقساتىندا الەۋمەتتىك ماڭىزى بار اۋرۋلاردىڭ جانە قورشاعان ورتاعا قاۋىپ كەلتىرەتىن اۋرۋلاردىڭ ءتىزىمىن بەكىتتى. اتالعان ءنورماتيۆتى-قۇقىقتىق اكتىگە سايكەس رەسپۋبليكانىڭ بارلىق ازاماتتارى مەديتسينالىق ساقتاندىرۋى بار-جوعىنا قاراماستان، جوعارىدا كورسەتىلگەن تىزبەدەگى بارلىق اۋرۋلارعا كەپىلدەندىرىلگەن تەگىن مەديتسينالىق كومەك كولەمىنىڭ شەڭبەرىندە مەديتسينالىق قىزمەت الۋعا بولادى", - دەلىنگەن مينيسترلىك تاراتقان حابارلامادا.

ماسەلەن، تىزىمگە سايكەس، الەۋمەتتىك ماڭىزى بار اۋرۋلارعا 13 اۋرۋ ءتۇرى كىرەدى. ولار:

  • تۋبەركۋلەز;
  • ادام يممۋنيتەتى جەتىسپەۋشىلىگى سالدارىنان تۋىنداعان اۋرۋ جانە ادام يممۋنيتەتى جەتىسپەۋشىلىگى ۆيرۋسىن تاسىمالداۋشىلار;
  • ۆ، س ۆيرۋستى گەپاتيتى;
  • قاتەرلى جاڭادان پايدا بولعان وسكىندەر;
  • قانت ديابەتى;
  • پسيحيكانىڭ جانە ءجۇرىس-تۇرىستىڭ بۇزىلۋى;
  • بالالارداعى تسەرەبرالدى سال اۋرۋى;
  • ميوكارد ينفاركتىسى (العاشقى التى ايدا);
  • رەۆماتيزم;
  • دانەكەر تىندەردىڭ جۇيەلى بۇزىلۋى;
  • ورتالىق جۇيكە جۇيەسىنىڭ تۇقىم قۋالايتىن-دەگەنەراتيۆتى اۋرۋلارى;
  • ورتالىق جۇيكە جۇيەسىنىڭ ميەلينسىزدەندىرۋ اۋرۋلارى;
  • ورفاندىق (سيرەك كەزدەسەتىن) اۋرۋلار.

ال قورشاعان ورتاعا قاۋىپ كەلتىرەتىن اۋرۋلار تىزىمىنە 16 اۋرۋ ءتۇرى كىردى:

  • ادام يممۋنيتەتى جەتىسپەۋشىلىگى سالدارىنان تۋىنداعان اۋرۋ جانە ادام يممۋنيتەتى جەتىسپەۋشىلىگى ۆيرۋسىن تاسىمالداۋشىلار;
  • تۋبەركۋلەز;
  • گەمورراگيالىق قالتىراۋ;
  • ديفتەريا;
  • مەنينگوكوكك ينفەكتسياسى;
  • پوليوميەليت;
  • پسيحيكانىڭ جانە ءجۇرىس-تۇرىستىڭ بۇزىلۋى;
  • جىنىستىق جولمەن بەرىلەتىن ينفەكتسيالار;
  • الاپەس;
  • بەزگەك;
  • ءسىبىرجاراسى (وكپەدەگى فورماسى);
  • تىرىسقاق;
  • وبا;
  • ءىش سۇزەگى;
  • ا ۆيرۋستىق گەپاتيتى
  • تۋليارەميا.

مينيسترلىكتىڭ مالىمەتىنشە، 2016 جىلى قازاقستاندا الەۋمەتتىك ماڭىزى بار اۋرۋلارمەن 508128 تۇلعا، سونداي-اق، قورشاعان ورتاعا قاۋىپ كەلتىرەتىن اۋرۋلار تىزىمىنە كىرەتىن 134757 تۇلعا تىركەلگەن.

“The Qazaq Times”