2017 jıldıñ 2-8 qırküyek aralığında Astanada Qazaqstan Respublikası Mädeniet jäne sport ministrliginiñ qoldauımen halıqaralıq EKSPO-2017 körmesiniñ mädeni bağdarlaması ayasında Qazaqstan Teatrları associaciyası Jas rejisserlerdiñ Qayrat Sügirbekov atındağı  I Respublikalıq forum-festivalin ötkizedi.

Jas rejisserler – qazaq teatrınıñ erteñi. Wlttıq sahna öneriniñ qwlaşın keñ jayıp, älem aldında tanıluı da jas buınnıñ izdenisteri men wmtılıstarınan bastau aladı. Atalmış öner merekesinde jas rejisserlerdiñ, şeberlik sağattarınan ötip, ruhani sabaq alıp, dünietanımdarınıñ özgerip, önerde özgeşe jol, bağıt-bağdar aları sözsiz.

Forum-festival' jas teatr rejisserleriniñ şığarmaşılığına jol aşıp, qazaq rejissurasın jaña esimdermen tolıqtırudı, sonımen qatar  jas jäne tanımal teatr rejisserlerine pikirtalastar, lekciyalar, şeberlik-sınıptarı, seminarlar  bağdarlamaları arqılı bilim jäne kommunikaciya alañın jasap, otandıq rejissura öneriniñ örisin keñeytuge mümkindik tuğızadı.

Sonday-aq, qazaqtıñ jañaşıl teatr rejisseri Qayrat Sügirbekovtiñ esimin este qaldıru maqsatında wyımdastırılıp otır. Şaranıñ bastı maqsatı talanttı jas rejisserler şığarmaşılığına qoğam men qalıñ köpşiliktiñ nazarın  audaru bolıp tabıladı.

Forum-festival'ge Respublikamızdağı 20-40 jas aralığındağı jas rejisserler Elik Nwrswltan, Däuren Sergazin, Dina Qwnanbayqızı, Rüstem Janıamanov, Bolat Abdrahmanov, Farhad Moldağaliev, Jwldızbek Jwmanbay, Gülnäz Qamısbaeva, Meyram Habibullin, Aydın Salbanovtar qatısadı.

Altı kün boyı Astana qalasınıñ qonaqtarı men twrğındarı forum-festival' barısında M. Äuezov atındağı Qazaq Memlekettik akademiyalıq drama teatrı, Ğ.Müsirepov atındağı balalar men jasöspirimder teatrı, Respublikalıq akademiyalıq nemis drama teatrı, Astana  Jastar teatrı, Aqtöbe oblıstıq Alaqay teatrı, S.Mwqanov atındağı Soltüstik Qazaqstan oblıstıq qazaq drama teatrı , Şığıs Qazaqstan oblıstıq Jastar teatrı , A. I teatrı, J.Şanin atındağı oblıstıq akademiyalıq qazaq drama teatrı , Almatı qalası memlekettik quırşaq teatrı, Atırau oblıstıq Mahambet Ötemiswlı atındağı qazaq drama teatrlarınıñ qoyılımdarın tamaşalay aladı.

“The Qazaq Times”