Koronavirus qoñırauı boyınşa şaqırtudan qaytıp jatqan jedel järdem brigadası. Almatı qalası. 14 şilde 2021 jıl. Foto: QT / Kültegin Aspanwlı

Epidkartada eñ qaterli «qızıl aymaqtan» tüspey twrğan astana men Almatı qalalarında indet dendep twr. Halqı men jedel järdem qızmetiniñ jüktemesi äldeqayda köp Almatı qalasında tirkelgen nauqastar sanı astanağa qarağanda eleuli deñgeyde az.

Elordada üdegen derttiñ sebebinen kündizgi stacionarlar men josparlı emdelu rejimi jwmısın uaqıtşa toqtatıp, kovidtik auruhana retinde qayta beyimdelip jatır. Bwl jöninde astananıñ qoğamdıq densaulıq saqtau basqarması basşısı Timur Mwratov jetkizdi.

«Auruşañdıqtıñ artuına baylanıstı qalalıq auruhanalardı qayta beyindeuge jäne kündizgi stacionardıñ jwmısın, josparlı auruhanağa jatqızudı toqtata twruğa tura keledi. Osılayşa, basqa medicinalıq klinikalarğa türli bağıtta jüginetinder köbeyui mümkin. Biz tösek-orındardı köbeytuge, qolda bar barlıq resurstı paydalanuğa mäjbürmiz», − dedi Mwratov.

Qazirgi kezde elordadağı 16 stacionarda 3562 tösek dayındalğan. Sonıñ 72%-ı, yağni 2556 ornı tolğan, 1006 orın äzirge bos. 262 kisilik jansaqtau böliminde 230 nauqas emdelip jatır. 47 adam ökpeni jasandı jeldetu apparatınıñ kömegimen tınıstauda. Sonımen qosa, qazir 10,6 mıñ adam ambulatorlıq baqılauda.

Mwratov adamdardıñ öz betinşe emdelgendikten auruhanağa auır jağdayda tüsip jatqanın aytadı.  Onıñ sözinşe, «medicinalıq kömekke uaqtılı jüginbey, üy jağdayında antikoagulyanttar qoldanğan pacientterdiñ tügel derligi reanimaciyağa tüsip jatır».

Jedel järdem qızmetiniñ jüktemesi artqan: künine 4 mıñğa tarta qoñırau tüsip, mobil'di brigadalar 2 mıñ şaqırtuğa baradı. Al Almatı qalasında mamandar täuligine 6 mıñnan asa ötiniş kelip, 3 mıñday şaqırtuğa şığadı. Bir qızığı, astanada qoñırau Almatığa qarağanda edäuir az bolğanımen, anıqtalğan nauqastar qatarı aytarlıqtay köp.

Almatı qalasınıñ Qoğamdıq densaulıq saqtau basqarmasınıñ mälimetinşe, ötken täulikte tirkelgen 993  adamnıñ 901-inde simptom belgileri bar, tağı 92 adam simptomsız türde auırğan. 21  şildede 402 adam auruhanağa jatqızılğan.

– Jalpı qalada 2516 adam ambulatorlıq deñgeyde emdelude jäne sıyımdılığı 6090 orın bolatın infekciyalıq stacionarlarda 3099 adam emdelip jatır. Jükteme äzirge 51% şamasında. Olardıñ arasında 173 bala bar. Al reanimaciya jäne qarqındı terapiya bölimderinde 228 nauqas bar. 25 adam ÖJJ, 78 nauqas invazivti emes ÖJJ-ımen jäne 86 sırqat High flow apparatımen dem aluda. Sonday-aq, BMSK men Telemedicina ortalığınıñ mobil'di toptarımen birge üy jağdayında 5821 nauqas baqılauğa alınğan, – delingen resmi habarlamada.

Resmi derekke säykes, jalpıhalıqtıq vakcinaciyalau nauqanı bastalğalı, yağni aqpan ayınan beri astanada 206 mıñ,  al Almatıda 415 mıñ adam ekpeniñ tolıq dozasın saldırğan. Sarapşılar olardıñ arasında jalğan pasport jasatqandar boluı äbden mümkin ekenin eskergen jön deydi.

Pandemiya kezinde koronavirus pen pnevmoniya sırqattarınıñ qatarı törtinşi tolqında astanada 94 mıñğa  (81 mıñı KVI+, 6 mıñı KVI-) jetse, Almatıda 93 mıñğa (86 mıñı KVI+, 6 mıñı KVI-) juıqtadı.

Bıltır 13 naurızdan beri COVID-19 infekciyasın jwqtırğandar qatarı 510 mıñğa, 1 tamızdan bılayğı koronavirus pnevmoniyası 59 mıñğa juıqtadı. DDSW derekqorı men Wlttıq statistikada Qazaqstanda auırğandar sanı 569 mıñğa şamaladı. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardan 11 122 adam (KVI+ / U07.1 – 5180, KVI- / U07.2 – 3575, ilespe aurulardan – 2367) qaytıs bolğan. Osılayşa, Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 42-orında twr.

"The Qazaq Times"