Foto: radiotochka.kz

Qazaqstannıñ İşki ister departamentiniñ äskeri tergeu basqarması qazaq-qırğız şekarasında bolğan atısqa baylanıstı tergeu jwmıstarın jürgizude, dep mälimdedi QR bas äskeri prokuraturasınıñ baspasöz qızmeti.

Bas prokuratura mälimetinşe, qazirgi uaqıtta Jambıl oblısı Jambıl audanınıñ işki ister departamenti şekaraşılarğa qarsı zañ bwzğan azamattar üstinen QR Qılmıstıq kodeksiniñ 380 babınıñ 2 tarmağı (bilik ökiline küş qoldanu) boyınşa qılmıstıq is qozğap, sotqa deyingi tergeu jwmıstarın jürgizude. Bwnımen qatar İİD äskeri tergeu basqarması zañ bwzuşılarğa oq atqan eki sarbazdıñ üstinen de QR Qılmıstıq kodeksiniñ 451 babınıñ 2 tarmağı (Qaru qoldana otırıp qızmetin asıra paydalanu) boyınşa, sotqa deyingi tergeu jwmıstarın bastağan.

Vedomstva baspasöz qızmetiniñ taratqan aqparatı boyınşa, tamızdıñ 12-si küni qazaq-qırğız şekarasındağı 2035 «Jasörken» zastavasında sağat 19:56 şamasında Ergeş. P. A jäne Böribay. G. A esimdi eki sarbaz 20-ğa juıq adamnıñ Qırğızstannan jılqı ötkizu üşin şekara sımdarın bwzıp jatqanın bayqağan. Jasalğan eskertuge qwlaq aspay şekaraşılarğa qarsı tas laqtırğan zañ bwzuşı topqa qarsı joğarıda atalğan eki sarbaz oq atıp, saldarınan 1987 jılğı bir azamat köz jwmğan.

Esteriñizge salayıq, tamızdıñ 12-i küni qazaq-qırğız şekarasında oq atılıp, bir adam köz jwmğan bolatın.

“The Qazaq Times”