Foto: Reuters

Keniyada ötken Prezidenttik saylaudıñ qorıtındısı belgili boldı. Osığan deyin bilikte bolğan Uhuru Keniata öziniñ qarsılası Reyl Odinganıñ dauıs beru procesinde ädiletsizdikter orın aldı degen ayıptauları men tuındağan narazılıqtarğa qaramastan, memleket basşısı qızmetine qayta saylandı. Bwl turalı Al-Jazeera aqparattıq agenttigi jazdı.

Ortalıq saylau kommissiyasınıñ deregine süyensek, Uhuru Keniata 54,27%, Reyl Odinga 44,74% dauıs jinağan. Uhuru Keniata halıqtıñ 50 payızdan artıq qoldauına ie bolğandıqtan, saylaudıñ ekinşi kezeñine jiberilmesten, jeñiske jetti.

Saylauğa aldın ala tirkelgen dauıs beruşilerdiñ 78 payızı qatısıp, 15 million  halıq öz basşısın anıqtau qwqığın paydalanğan. Ortalıq saylau kommissiyasınıñ basşısı Vafula Çebukati: "Saylau jürip jatqan künderi biz bükil älemniñ jiti nazarında boldıq", - dedi.

Jañadan saylanğan prezident Uhuru Keniata öz sözinde: "Keniyalıqtar bizden jaqsı bastamalar kütedi. Biz osığan deyin qolğa alğan jobalarımızdı jalğastıru kerekpiz", - dep mälimdedi.

Saylaudıñ elektrondı jüyesinde aldın ala belgili bolğan dauıstar körsetkişin qabıldaudan bas tartıp, şu şığarğan Oppoziciya ökilderi soñğı nätijeler jariyalanğan sätte qala köşelerine narazılıq şeruine şıqtı. Olar memleket biligi saylaudıñ ädiletsiz ötkendigi jönindegi şağımdarın mülde nazarğa almağanına narazı. Reyl Odinga saylau kommissiyasınıñ elektrondı jüyesine hakerlik şabuıl jasalıp, nätijeler qazirgi prezidenttiñ paydasına özgertilgen degen oyında qalıp, saylau qorıtındıların moyındaudan bas tarttı.

Olardı sabırğa şaqırğan Uhuru Keniata: "Biz bir-birimizge jau emespiz. Saylauda ünemi jeñgender men jeñilis tapqandar bolatını zañdılıq. Biraq soğan qaramastan biz barlığımız keniyalıqtar dep atalatın wlı halıqtıñ bir bölşegimiz", - dedi.

“The Qazaq Times”