QR OSK müşeleriniñ otırısı. Foto: election.gov.kz

QT eldiñ sayasi ömirindegi asa mañızdı sayasi nauqan – saylau twsında Ortalıq saylau komissiyasına brifing jiındarın onlayn ötkizuge jağday jasaudı swrap hat joldağan. Biraq «Jaña Qazaqstandı» qwruğa jauaptı saylau institutı jabıq sayasattan bas tartar emes. Sebebin bayandap köreyik.

Ötiniş hatta OSK törağası Nwrlan Äbdirovke Astanadan özge öñirlerdegi BAQ ökilderine OSK alañında ötetin barlıq brifing, baspasöz jiındarı men otırıstarğa onlaĭn, yağni swraq-jauap sessiyasına ZOOM nemese sol siyaqtı balama resurstar arqılı qatısuğa jağday jasau turalı swraldı. Qazir tilşiler brifingte Ortsaylakom müşelerine swraq qoyıp, jauap alu üşin Astananıñ Sarıarqa audanı Beybitşilik köşesi 4-üyde ornalasqan ğimaratına baruğa mäjbür. Respublikanıñ özge aymaqtarındağı jurnalister qatısa almaydı.

Otırıstardan onlaĭn translyaciyalau azdıq etedi, jurnalisterdiñ bwl jiındarğa onlaĭn qatısudağı bastı maqsatı – spikerlerine swraq qoĭıp, jauap aluında. Şın mäninde, bwğan OSK täjiribesi jetedi. Mısalı, 2021 jılğı 10 qañtarda ötken Mäjilis jäne mäslihattar saĭlauında OSK aldın ala onlayn akkredittelgen jurnalisterdiñ eş kedergisiz ZOOM platformasımen swraq qoyuın jüzege asırıp edi. Sondıqtan redakciya ötinişi negizdi, uaqıt talabına say jasaldı.

OSK apparat basşısı Äliya Ğalımova Qayratqızı joldağan jauap hatta «OSK-nıñ barlıq otırısı onlayn-translyaciya rejiminde ötedi» degennen aspağan. Komissiyanıñ baspasöz jiının wyımdastıru tärtibi ğana bayandaladı. Aymaq jurnalisterine onlayn swraq qoyu mümkindigi turalı bastı swraq jauapsız qalğan.

«Ortalıq saylau komissiyası öz jwmısında barlıq müddeli azamattardıñ aqparatqa qol jetkizuin qamtamasız ete otırıp, aşıqtıq pen jariyalılıq qağidattarın wstanadı. Pikiriñizdi joldağanıñız üşin alğısımızdı aytıp, ıntımaqtastıqqa dayın ekenimizdi bildiremiz» dese de, negizgi mäseleni şeşuge müddeli emes.

Olay deuge sebep – swrau hatqa jauap äzirlegen OSK Taldau jäne kommunikaciya bölimi meñgeruşisiniñ orınbasarı Äşim Berdibekovtiñ aytqan sözi. Resmi jauapta bastı mäseleniñ bası aşıq qalğandıqtan tilşi habarlasıp naqtılauğa tırıstı. Jauap hat orındauşısı Berdibekov «onlayn swraq qoyu mümkindigin qarastıru josparda joq» dep şort kesti.

Koronavirus pandemiyası kezinde qalıptasqan täjiribe negizinde respublikadağı barlıq 20 aĭmaqtağı äkimdikterdiñ Öñirlik kommunikaciyalar qızmeti jäne Astanadağı Ortalıq kommunikaciyalar qızmeti brifing, baspasöz jiındarın oflaĭn-onlaĭn aralas formatta ötkizudi dästürge aĭnaldırdı. Bwl Qazaqstan aumağında jwmıs isteĭtin BAQ ökilderiniñ qızmettik qwqığın teñestirude ülken, asa qajetti qadam boldı.

Biraq birneşe jılda tek bir ret qauırt jwmıs isteĭtin Ortalıq saĭlau komissiyası pandemiyanıñ karantin kezeñi ayaqtalğan soñ bwl formattı ädeyilep joĭdı. Media sarapşılar mwnı jurnalisterdiñ aqparat alu-taratuına jasalğan kedergi dep esepteydi. Nege özge (joğarıda atalğan) memlekettik mekemelerde baspasöz jiındarı men brifingter, tipti sot procesteri onlaĭn ötip jatqan şaqta OSK bwğıp, twyıq formatqa auıstı. Bir jarqın mısal, Almatı qalasınıñ ÖKQ birneşe jıldan beri almatılıq jurnalisterdiñ özine onlayn saual qoyuğa jağday jasap keledi. Alayda memlekettik asa mañızdı şaranı jüzege asıratın OSK media kommunikaciyanıñ mobil'di jwmıs isteude boyküyezdik tanıtadı.

Biıl 19 naurızda Qazaqstan Respublikası Parlamenti Mäjilisi jäne Mäslihattar deputattarınıñ kezekten tıs saylauı ötedi. Onı wyımdastıruğa tikeley OSK jauaptı, biraq ortalıq apparattıñ jurnalisterge qatıstı wstanımı bwl mindettiñ öz deñgeyinde atqarılıp jatqanına kümän tuğızadı.

The Qazaq Times