كەنيادا وتكەن پرەزيدەنتتىك سايلاۋدىڭ قورىتىندىسى بەلگىلى بولدى

كەنيادا وتكەن پرەزيدەنتتىك سايلاۋدىڭ قورىتىندىسى بەلگىلى بولدى. وسىعان دەيىن بيلىكتە بولعان ۋحۋرۋ كەنياتا ءوزىنىڭ قارسىلاسى رەيل ودينگانىڭ داۋىس بەرۋ پروتسەسىندە ادىلەتسىزدىكتەر ورىن الدى دەگەن ايىپتاۋلارى مەن تۋىنداعان نارازىلىقتارعا قاراماستان، مەملەكەت باسشىسى قىزمەتىنە قايتا سايلاندى. بۇل تۋرالى Al-Jazeera اقپاراتتىق اگەنتتىگى جازدى.

ورتالىق سايلاۋ كومميسسياسىنىڭ دەرەگىنە سۇيەنسەك، ۋحۋرۋ كەنياتا 54,27%، رەيل ودينگا 44,74% داۋىس جيناعان. ۋحۋرۋ كەنياتا حالىقتىڭ 50 پايىزدان ارتىق قولداۋىنا يە بولعاندىقتان، سايلاۋدىڭ ەكىنشى كەزەڭىنە جىبەرىلمەستەن، جەڭىسكە جەتتى.

سايلاۋعا الدىن الا تىركەلگەن داۋىس بەرۋشىلەردىڭ 78 پايىزى قاتىسىپ، 15 ميلليون  حالىق ءوز باسشىسىن انىقتاۋ قۇقىعىن پايدالانعان. ورتالىق سايلاۋ كومميسسياسىنىڭ باسشىسى ۆافۋلا چەبۋكاتي: "سايلاۋ ءجۇرىپ جاتقان كۇندەرى ءبىز بۇكىل الەمنىڭ ءجىتى نازارىندا بولدىق", - دەدى.

جاڭادان سايلانعان پرەزيدەنت ۋحۋرۋ كەنياتا ءوز سوزىندە: "كەنيالىقتار بىزدەن جاقسى باستامالار كۇتەدى. ءبىز وسىعان دەيىن قولعا العان جوبالارىمىزدى جالعاستىرۋ كەرەكپىز", - دەپ مالىمدەدى.

سايلاۋدىڭ ەلەكتروندى جۇيەسىندە الدىن الا بەلگىلى بولعان داۋىستار كورسەتكىشىن قابىلداۋدان باس تارتىپ، شۋ شىعارعان وپپوزيتسيا وكىلدەرى سوڭعى ناتيجەلەر جاريالانعان ساتتە قالا كوشەلەرىنە نارازىلىق شەرۋىنە شىقتى. ولار مەملەكەت بيلىگى سايلاۋدىڭ ادىلەتسىز وتكەندىگى جونىندەگى شاعىمدارىن مۇلدە نازارعا الماعانىنا نارازى. رەيل ودينگا سايلاۋ كومميسسياسىنىڭ ەلەكتروندى جۇيەسىنە حاكەرلىك شابۋىل جاسالىپ، ناتيجەلەر قازىرگى پرەزيدەنتتىڭ پايداسىنا وزگەرتىلگەن دەگەن ويىندا قالىپ، سايلاۋ قورىتىندىلارىن مويىنداۋدان باس تارتتى.

ولاردى سابىرعا شاقىرعان ۋحۋرۋ كەنياتا: ء"بىز ءبىر-بىرىمىزگە جاۋ ەمەسپىز. سايلاۋدا ۇنەمى جەڭگەندەر مەن جەڭىلىس تاپقاندار بولاتىنى زاڭدىلىق. بىراق سوعان قاراماستان ءبىز بارلىعىمىز كەنيالىقتار دەپ اتالاتىن ۇلى حالىقتىڭ ءبىر بولشەگىمىز", - دەدى.

“The Qazaq Times”