Foto: Reuters

Yemenniñ oñtüstiginde Arab elderi koaliciyasınıñ äue soqqısınan 3 äyel men 6 bala mert boldı. Jergilikti densaulıq saqtau basqarması basşısınıñ mälimetinşe, otbası müşeleri wyıqtap jatqan kezde orın alğan oqiğa saldarınan tağı 3 adam jaralanğan. Bwl turalı Äl-Jazira aqparattıq agenttigi jazdı.

Husitterdiñ ıqpalındağı SABA aqparat qwralınıñ wsınğan derekterine säykes, jol üstindegi avtokölikke tigen ekinşi soqqı kemi 3 adamnıñ ölimine sebep bolıp, tağı 7 adamdı jaralağan.

Yemende 2014 jıldan beri jalğasın tauıp kele jatqan soğıs qazir bilikten quılğan Prezident Abd-Rabbu Mansur Hadi men  onı qoldap, 2015 jılı qaqtığısqa aralasqan Saud Arabiyası bastağan Parsı şığanağınıñ elderi jäne ekinşi tarapta eldiñ soltüstik böligin tügel jaulap alğan şiit toptarınan qwralğan Husitter arasında jürip jatır. Husitterdiñ qazirgi bekinis qalası - Saada bolğandıqtan, eñ köp äue soqqısı da osı jerdiñ twrğındarına tiip otır.

Täuelsiz sarapşılardıñ mälimetinşe, Arab elderi koaliciyasınıñ soqqıları Husitterdi älsiretuge eş kömektesip otırğan joq. Olardıñ negizgi qwrbandarı - jergilikti halıq. Naurız ayında koaliciya küşteriniñ qolınan 22 adam, al mausım ayında 25 beybit twrğın qaza tapqan. Reuters agenttiginiñ Arab elderiniñ koaliciyasına bolğan oqiğa turalı pikir swrap joldağan hatı jauapsız qalğanımen, Arab memleketteri qarapayım halıqtı nısanağı alıp otırğan joqtığın mwnan aldın aytqan bolatın. BWW-nıñ deregine qarağanda, Yemendegi soğıs osı uaqıtqa deyin 10 mıñ adamnıñ ömirin qiıp, 22 provinciyanıñ jartısına juığı aştıq aldında twr.

“The Qazaq Times”