Resey Ukrainağa auqımdı äskeri küşpen basıp kirgen kezde keybir sarapşılar Kievti de basıp aluı mümkin ekenin boljağan. Alayda, Ukraina armiyası, ükimeti men halqı bar küşimen twrıstıq berdi. Bwğan Batıstıq auqımdı äskeri jäne qarjılıq qoldau qosılıp, basıp kiruşi Resey qazir soğıstağı ırıqsız poziciyağa tüse bastadı. Tipti, soğıs maydanındağı özgeristerdi, Reseydiñ äskeri şığının şamalağan batıstıq zerrteu ortalıqtarı Ukrainadağı soğısta Resey jeñilip qaluı bek mümkin degen boljamdar ayta bastadı.

Esteriñizde bolsa, 9 mamırdan bwrın birqatar sarapşılar Resey prezidenti Putin jeñis künine oray Ukrainağa qarsı resmi türde soğıs aşıp, mobilizaciyanı bastaydı dep boljağan. Biraq, Qızıl alañda äskeri parad ötken küni onday boldmadı, al qazir Reseyde qwpiya türde rezervtegi äskerlerdi şaqırıp, jariyasız mobilizaciya bolıp jatır degen mälimetter şığa bastadı.

Qazirgi jağdayda Reseyde eki jol qaldı: biri – jeñilu, biri – mobilizaciya. Bwnday pikirdi aytqan Pol'şadağı Rochan analitikalıq ortalığınıñ basşısı Konard Muzıka. Ol «Reyterge» bergen jauabında Reseydiñ Donbass aymağında köp sandağı äskerler men äskeri tehnikaların joğaltqanın, onıñ ornın toltıru qiınğa tüsetinin aytqan. Jeñilu men mobilizaciyadan basqa nwsanıñ boluı ekitalay ekenin de aytadı Muzıka.

Soğıstıñ bas şeninde «äne-mine Kievti alamız» desken Resey armiyasınıñ qazir Donbass aymağın tolıq basıp aluınıñ özi kümän tudıra bastadı. Bwdan birer kün bwrın Resey küşteri Har'kovtı de tastap, bar küşin Don alabına şoğırlandırdı. Soğan qaramastan CNA  Reseydi zertteu institutınıñ  direktorı Maykl Kofman Reseydiñ maqsatına jetuine ülken kümänmen qaraydı. «Resey küşteri äbden älsiredi, ruhı äbden sındı, oficerlerdiñ şabuıldı jalğastıruğa qwlqı joq, al sayasi jetekşiler bolsa strategiyalıq jeñilistiñ jaqındağanın sezse de sır bermegen bolıp twr», – deydi Kofman «Reyterge» bergen jauabında.

Resey Qorğanıs ministrligi är küni ukrainalıq äskeri nısandardı, tehnikalardı joyıp jatqanın mälimdep keledi. Kreml' bolsa bäri jospardağıday jüzege asıp jatır dep qaytalaydı. Biraq, soğıs maydanındağı nätijeleri keri ketip jatqanı aqparat qwraldarındağı mälimetterdi salıstırudan-aq bayqaladı.

Ukraina küşteriniñ taktikalıq täsili «aldımen artqı şebin küyretu» bolıp jatqanday. Kievke şabuıl qoyıp jatqanda da Ukraina küşteri reseylikterdiñ artqı şebine, logistikalıq qoldau mümkindikterine şabuıl jasap, twtas oñtüstiktegi Resey küşteriniñ qozğalıs josparnı bwzıp tastadı. Bwl Kiev irgesinde reseylkiterdiñ oñbay soqqı aluına sebep boldı. Qazirgi Donbastağı jağdayda osığan wqsas, «Z» tañbası bar kommnikaciya men logistikalıq qoldau qwrılğıları oñbay talqandaluda. Osınıñ bärinen qarağanda Donbass aymağında Reseydiñ şığını arta tüsti.

Demek, Resey strategiyalıq jeñiliske wşırauı mümkni ekenin anıq sezip twr. ISW sekildi soğıstıñ barısın qalt jibermey qadağalap otırğan zertteu ortalıqtarı da Resey şığındarınıñ soñı jeñiliske alıp keletinin boljaydı. Biraq, jeñilisti qabılday almaytın Kreml' minezi endigi jerde mobilizaciyağa küş saluı mümkin, onıñ özinde,  soğıs maydanına tek täjiribeli adamdardı ğana tartuğa küş saları da belgili. Biraq, uaqıt ötken sayın Resey armiyasınıñ işki de, sırtqı da jağdayı qiındap baradı, tipti jaña soğıs qwraldarı da azayıp jatır, Ukraina armiyasında bolsa bwnıñ kerisinşe, tolassız äskeri kömek ornın toltırıp jatır. Osınıñ bärinen qarağanda Putin qwrdan qwr uaqıt sozıp jatqanday.

The Qazaq Times