يەمەندە ساۋد ارابياسى كواليتسياسىنىڭ سوققىسىنان بەيبىت تۇرعىندار مەرت بولدى

يەمەننىڭ وڭتۇستىگىندە اراب ەلدەرى كواليتسياسىنىڭ اۋە سوققىسىنان 3 ايەل مەن 6 بالا مەرت بولدى. جەرگىلىكتى دەنساۋلىق ساقتاۋ باسقارماسى باسشىسىنىڭ مالىمەتىنشە، وتباسى مۇشەلەرى ۇيىقتاپ جاتقان كەزدە ورىن العان وقيعا سالدارىنان تاعى 3 ادام جارالانعان. بۇل تۋرالى ءال-جازيرا اقپاراتتىق اگەنتتىگى جازدى.

حۋسيتتەردىڭ ىقپالىنداعى SABA اقپارات قۇرالىنىڭ ۇسىنعان دەرەكتەرىنە سايكەس، جول ۇستىندەگى اۆتوكولىككە تيگەن ەكىنشى سوققى كەمى 3 ادامنىڭ ولىمىنە سەبەپ بولىپ، تاعى 7 ادامدى جارالاعان.

يەمەندە 2014 جىلدان بەرى جالعاسىن تاۋىپ كەلە جاتقان سوعىس قازىر بيلىكتەن قۋىلعان پرەزيدەنت ابد-راببۋ مانسۋر حادي مەن  ونى قولداپ، 2015 جىلى قاقتىعىسقا ارالاسقان ساۋد ارابياسى باستاعان پارسى شىعاناعىنىڭ ەلدەرى جانە ەكىنشى تاراپتا ەلدىڭ سولتۇستىك بولىگىن تۇگەل جاۋلاپ العان شيت توپتارىنان قۇرالعان حۋسيتتەر اراسىندا ءجۇرىپ جاتىر. حۋسيتتەردىڭ قازىرگى بەكىنىس قالاسى - ساادا بولعاندىقتان، ەڭ كوپ اۋە سوققىسى دا وسى جەردىڭ تۇرعىندارىنا ءتيىپ وتىر.

تاۋەلسىز ساراپشىلاردىڭ مالىمەتىنشە، اراب ەلدەرى كواليتسياسىنىڭ سوققىلارى حۋسيتتەردى السىرەتۋگە ەش كومەكتەسىپ وتىرعان جوق. ولاردىڭ نەگىزگى قۇرباندارى - جەرگىلىكتى حالىق. ناۋرىز ايىندا كواليتسيا كۇشتەرىنىڭ قولىنان 22 ادام، ال ماۋسىم ايىندا 25 بەيبىت تۇرعىن قازا تاپقان. Reuters اگەنتتىگىنىڭ اراب ەلدەرىنىڭ كواليتسياسىنا بولعان وقيعا تۋرالى پىكىر سۇراپ جولداعان حاتى جاۋاپسىز قالعانىمەن، اراب مەملەكەتتەرى قاراپايىم حالىقتى نىساناعى الىپ وتىرعان جوقتىعىن مۇنان الدىن ايتقان بولاتىن. بۇۇ-نىڭ دەرەگىنە قاراعاندا، يەمەندەگى سوعىس وسى ۋاقىتقا دەيىن 10 مىڭ ادامنىڭ ءومىرىن قيىپ، 22 پروۆينتسيانىڭ جارتىسىنا جۋىعى اشتىق الدىندا تۇر.

“The Qazaq Times”