Foto: AlauTV

2017 jılğı 4 tamızda bilim granttarın tağayındau jönindegi Respublikalıq konkurs komissiyası öz jwmısın bastadı. Bwl turalı QR Bilim jäne ğılım ministrliginiñ baspasöz qızmeti habarladı. 

Vedomstvonıñ mälimetinşe, komissiyanıñ qwramına memlekettik organdardıñ, «Atameken» Qazaqstan Respublikası Wlttıq käsipkerler palatasınıñ ökilderi jäne joğarı oqu orındarınıñ rektorları engizilgen.

"Konkurstıq komissiya otırısında Qazaqstan Respublikasınıñ joğarı oqu orındarına qabıldau boyınşa ülken dayındıq jwmısınıñ qorıtındısı şığarıladı. Jıl boyında Ministrlik studentter kontingentin irikteu sapasın arttıru jäne qalıptastıru boyınşa birqatar jüyeli şaralardı jürgizdi. Osı jılı joğarı bilim alu üşin bilim granttarınıñ sanı 37 932 grantqa deyin jetkizildi,", - delingen baspasöz habarlamasında.

Onıñ işinde, 35 082 grant 1 kursqa qabıldau üşin (kündizgi oqu nısanı boyınşa – 34 782, sırttay oqu nısanı boyınşa – 300 grant), 2850 orın – joğarı oqu orındarınıñ dayındıq bölimderi üşin bölindi.

Atalğan basımdıqtardı eskere otırıp, tehnikalıq ğılımdar men tehnologiyalıq mamandıqtarğa 13 670 grant, pedagogikalıq mamandıqtarğa 8 235 grant, auıl şaruaşılığı men veterinarlıq mamandıqtarğa 2 682 grant, medicinalıq mamandıqtarğa 3 150 grant jäne t.b. qarastırıldı.

Bwl rette memlekettik bilim beru tapsırısın ornalastıruğa jiberilgen joğarı oqu orındarınıñ tizimi keñeytilgen. Bilim grantın tağayındau konkursına 63 169 adam qatısuda, onıñ işinde 49 858 adam  – qazaq tilindegi oqu bölimine, 13 311 adam – orıs tilindegi oqu bölimine tapsırğan.

«Mäñgilik el jastarı – industriyağa!» jobası şeñberinde kvota boyınşa oquğa 9 148 adam konkursqa qatısuda.

Ayta keteyik, biıl tülekter WBT-nı eki kezeñ boyınşa tapsırdı. Birinşi kezeñ emtihanınıñ nätijesi boyınşa "Altın belgi" iegerleriniñ sanı ötken jılğa qarağanda köp boldı.

“The Qazaq Times”