بيىل ءبىلىم بەرۋ گرانتتارىنىڭ سانى ارتتى

2017 جىلعى 4 تامىزدا ءبىلىم گرانتتارىن تاعايىنداۋ جونىندەگى رەسپۋبليكالىق كونكۋرس كوميسسياسى ءوز جۇمىسىن باستادى. بۇل تۋرالى قر ءبىلىم جانە عىلىم مينيسترلىگىنىڭ ءباسپاسوز قىزمەتى حابارلادى. 

ۆەدومستۆونىڭ مالىمەتىنشە، كوميسسيانىڭ قۇرامىنا مەملەكەتتىك ورگانداردىڭ، «اتامەكەن» قازاقستان رەسپۋبليكاسى ۇلتتىق كاسىپكەرلەر پالاتاسىنىڭ وكىلدەرى جانە جوعارى وقۋ ورىندارىنىڭ رەكتورلارى ەنگىزىلگەن.

"كونكۋرستىق كوميسسيا وتىرىسىندا قازاقستان رەسپۋبليكاسىنىڭ جوعارى وقۋ ورىندارىنا قابىلداۋ بويىنشا ۇلكەن دايىندىق جۇمىسىنىڭ قورىتىندىسى شىعارىلادى. جىل بويىندا مينيسترلىك ستۋدەنتتەر كونتينگەنتىن ىرىكتەۋ ساپاسىن ارتتىرۋ جانە قالىپتاستىرۋ بويىنشا بىرقاتار جۇيەلى شارالاردى جۇرگىزدى. وسى جىلى جوعارى ءبىلىم الۋ ءۇشىن ءبىلىم گرانتتارىنىڭ سانى 37 932 گرانتقا دەيىن جەتكىزىلدى،", - دەلىنگەن ءباسپاسوز حابارلاماسىندا.

ونىڭ ىشىندە، 35 082 گرانت 1 كۋرسقا قابىلداۋ ءۇشىن (كۇندىزگى وقۋ نىسانى بويىنشا – 34 782, سىرتتاي وقۋ نىسانى بويىنشا – 300 گرانت), 2850 ورىن – جوعارى وقۋ ورىندارىنىڭ دايىندىق بولىمدەرى ءۇشىن ءبولىندى.

اتالعان باسىمدىقتاردى ەسكەرە وتىرىپ، تەحنيكالىق عىلىمدار مەن تەحنولوگيالىق ماماندىقتارعا 13 670 گرانت، پەداگوگيكالىق ماماندىقتارعا 8 235 گرانت، اۋىل شارۋاشىلىعى مەن ۆەتەرينارلىق ماماندىقتارعا 2 682 گرانت، مەديتسينالىق ماماندىقتارعا 3 150 گرانت جانە ت.ب. قاراستىرىلدى.

بۇل رەتتە مەملەكەتتىك ءبىلىم بەرۋ تاپسىرىسىن ورنالاستىرۋعا جىبەرىلگەن جوعارى وقۋ ورىندارىنىڭ ءتىزىمى كەڭەيتىلگەن. ءبىلىم گرانتىن تاعايىنداۋ كونكۋرسىنا 63 169 ادام قاتىسۋدا، ونىڭ ىشىندە 49 858 ادام  – قازاق تىلىندەگى وقۋ بولىمىنە، 13 311 ادام – ورىس تىلىندەگى وقۋ بولىمىنە تاپسىرعان.

«ماڭگىلىك ەل جاستارى – يندۋسترياعا!» جوباسى شەڭبەرىندە كۆوتا بويىنشا وقۋعا 9 148 ادام كونكۋرسقا قاتىسۋدا.

ايتا كەتەيىك، بيىل تۇلەكتەر ۇبت-نى ەكى كەزەڭ بويىنشا تاپسىردى. ءبىرىنشى كەزەڭ ەمتيحانىنىڭ ناتيجەسى بويىنشا "التىن بەلگى" يەگەرلەرىنىڭ سانى وتكەن جىلعا قاراعاندا كوپ بولدى.

“The Qazaq Times”