Foto: gid.volga.news

Qazaqstan Respublikasınıñ territorriyasında jwmıs istep jatqan qazaqstandıqtar men şetel azamattarı basqa elge aqşa audarımdarın wlğaytıp jatır. Bwl turalı Ranking.kz. saraptama agenttigi mälimdedi.

Osı jıldıñ 6 ayında  türli aqşa audaru jüyeleri boyınşa Qazaqstannan şetelge 203,3 mlrd teñge jiberilgen nemese ötken jıldıñ qañtar-mausım ayımen salıstırğanda 25,8 payızğa köp. Al audarım sanı 1,2 mln tranzakciyanı qwrağan - bir jıl bwrınğı körsetkişke qarağanda 21 payızğa joğarı.

Eskeretin jayt, 2016 jıldıñ 1-şi  jartı jıldığında şetelge audarılğan qarjı kölemi 15,1 payızğa qısqarğan jäne 1 mln tranzakciyadan kem bolğan. Audarımnıñ ortaşa soması 4%-ğa köbeyip, 175,5 mıñ teñge şamasında bolğan.

Al osı jılğı audarımdar boyınşa "Zolotaya korona" jüyesi aldıñğı orında. Biılğı jıldıñ qañtar-mausım ayında jüye arqılı ötken jıldıñ altı ayına qarağanda 32,3 mlrd teñgege artıq qarjı audarılğan nemese 53,7 payızğa joğarı. Nätijesinde "Zolotaya korona"-nıñ narıqtağı ülesi 34,1 payızdan 45,4 payızğa deyin artqan.

Aqşa audarımdarı eñ jii jasalğan ekinşi jüye  — "YUnistrim", ötken jılğa qarağanda 11,6 mlrd teñgege nemese 87 payızğa artıq aqşa audarılğan. Narıqtağı ülesi 12,3 payızğa deyin artqan.

Üşinşi orında - Faster. Bwl jüye arqılı Qazaqstannan şetelge audarılğan qarjı kölemi 3,3 mlrd teñgege nemese 33,4 payızğa wlğayğan, narıqtağı ülesi 6,5 payızdı qwradı.

Al Western Union jüyesi arqılı audarımdar kerisinşe, azayğan. Mısalı osı jılı bwl jüye arqılı audarımdar 5 mlrd teñgege nemese 13,4 payızğa qısqarğan.

Ayta keteyik, türli jüyeler arqılı jasalğan audarımdar Qazaqstannan qarjınıñ jılıstap jatqanın bildiredi. Al bwl audarılğan qarjınıñ ornın qalay toltıratınımız belgisiz.

“The Qazaq Times”