قازاقستاننان شەتەلگە قارجى اۋداراتىندار كوبەيدى

قازاقستان رەسپۋبليكاسىنىڭ تەرريتوررياسىندا جۇمىس ىستەپ جاتقان قازاقستاندىقتار مەن شەتەل ازاماتتارى باسقا ەلگە اقشا اۋدارىمدارىن ۇلعايتىپ جاتىر. بۇل تۋرالى Ranking.kz. ساراپتاما اگەنتتىگى مالىمدەدى.

وسى جىلدىڭ 6 ايىندا  تۇرلى اقشا اۋدارۋ جۇيەلەرى بويىنشا قازاقستاننان شەتەلگە 203,3 ملرد تەڭگە جىبەرىلگەن نەمەسە وتكەن جىلدىڭ قاڭتار-ماۋسىم ايىمەن سالىستىرعاندا 25,8 پايىزعا كوپ. ال اۋدارىم سانى 1,2 ملن ترانزاكتسيانى قۇراعان - ءبىر جىل بۇرىنعى كورسەتكىشكە قاراعاندا 21 پايىزعا جوعارى.

ەسكەرەتىن جايت، 2016 جىلدىڭ 1-ءشى  جارتى جىلدىعىندا شەتەلگە اۋدارىلعان قارجى كولەمى 15,1 پايىزعا قىسقارعان جانە 1 ملن ترانزاكتسيادان كەم بولعان. اۋدارىمنىڭ ورتاشا سوماسى 4%-عا كوبەيىپ، 175,5 مىڭ تەڭگە شاماسىندا بولعان.

ال وسى جىلعى اۋدارىمدار بويىنشا "زولوتايا كورونا" جۇيەسى الدىڭعى ورىندا. بيىلعى جىلدىڭ قاڭتار-ماۋسىم ايىندا جۇيە ارقىلى وتكەن جىلدىڭ التى ايىنا قاراعاندا 32,3 ملرد تەڭگەگە ارتىق قارجى اۋدارىلعان نەمەسە 53,7 پايىزعا جوعارى. ناتيجەسىندە "زولوتايا كورونا"-نىڭ نارىقتاعى ۇلەسى 34,1 پايىزدان 45,4 پايىزعا دەيىن ارتقان.

اقشا اۋدارىمدارى ەڭ ءجيى جاسالعان ەكىنشى جۇيە  — "يۋنيستريم", وتكەن جىلعا قاراعاندا 11,6 ملرد تەڭگەگە نەمەسە 87 پايىزعا ارتىق اقشا اۋدارىلعان. نارىقتاعى ۇلەسى 12,3 پايىزعا دەيىن ارتقان.

ءۇشىنشى ورىندا - Faster. بۇل جۇيە ارقىلى قازاقستاننان شەتەلگە اۋدارىلعان قارجى كولەمى 3,3 ملرد تەڭگەگە نەمەسە 33,4 پايىزعا ۇلعايعان، نارىقتاعى ۇلەسى 6,5 پايىزدى قۇرادى.

ال Western Union جۇيەسى ارقىلى اۋدارىمدار كەرىسىنشە، ازايعان. مىسالى وسى جىلى بۇل جۇيە ارقىلى اۋدارىمدار 5 ملرد تەڭگەگە نەمەسە 13,4 پايىزعا قىسقارعان.

ايتا كەتەيىك، ءتۇرلى جۇيەلەر ارقىلى جاسالعان اۋدارىمدار قازاقستاننان قارجىنىڭ جىلىستاپ جاتقانىن بىلدىرەدى. ال بۇل اۋدارىلعان قارجىنىڭ ورنىن قالاي تولتىراتىنىمىز بەلگىسىز.

“The Qazaq Times”