Foto: Kazinform

Osıdan bir jıl bwrın yağni 2016 jıldıñ 18 şildesinde Almatı qalasında terrorlıq şabuıl bolğan edi. Osığan baylanıstı biz bügin täuelsiz Qazaqstan tarihında bolğan lañkestik şabuıldarğa qısqaşa toqtaludı jön kördik.

2011 jıldıñ 17 mamır küni Aqtöbe qalasındağı Wlttıq qauipsizdik komitetiniñ ğimaratı aldında Raqımjan Mahatov özin özi jarıp jiberdi. Saldarınan üş adam jaraqat aldı. Ol kezde bas prokuratura bwl oqiğanı terrorlıq akt dep moyındamadı. Mahatovtıñ WQK ğimaratı aldında özin jarıp jiberuin onıñ qılmıstıq top müşesi bolğandığımen, istegen isteri üşin zañ aldında jauap beruden qaşu dep tüsindirdi.

2016 jıldıñ 5 mausımında Aqtöbe qalasındağı qaru-jaraq dükenine jasalğan şabuıl. Foto: AktobeTayms

2011 jıldıñ 1 şildesinde Aqtöbe oblısına qarastı Temir audanında qarulı topqa qarsı arnayı operaciya boldı. Saldarınan 2 policiya qızmetkeri köz jwmıp, birneşeui jaraqat aldı. Keyinen 8 şilde küni 9 terroristiñ közi joyıldı.

2011 jıldıñ 31 qazan küni Atırau qalasında eki birdey jarılıs boldı. Birinşi jarılıs twrğın üy aulasındağı qoqıs jäşiginde boldı. Odan birer minuttan keyin Sarı-Arqa ıqşam audanında belgisiz azamat özin özi jarıp jiberdi. Bwl iske baylanıstı bas prokuratura «terrorizm» babı boyınşa qılmıstıq is qozğadı. Lañkestik şabuıldı «Halifat sarbazdarı» terrorlıq wyımı öz moyınına aldı.

2011 jıl qaraşanıñ 12 küni Taraz qalasında 1977 jılı düniege kelgen Maqsat Qariev esimdi azamat lañkestik şabuıl jasap, saldarınan jeti adam köz jwmdı, onıñ beseui policiya qızmetkeri.

Taraz qalasındağı özin jarğan jankeşti Maqsat Qariev. 2011 jıl, 12 qaraşa.

Bwl oqiğadan üş kün bwrın 9 qaraşada «Halifat sarbazdarı» lañkestik tobınıñ basşısı Ravil' Qwsayınov Minbar Media Project jurnalisterine swhbat berip, Qazaqstan biligin qatañ sınğa aldı. Ol Aqordanı «mwsılmandardı qudaladı» jäne «elde sayasi, tarihi ideologiya qalıptastırmadı» dep ayıptap, egerde Qazaqstan biligi din turalı zañdı qabıldaudan bas tartpaytın bolsa, onda «Halifat sarbazdarı» el aumağında lañkestik şabuldarın üdetetinin mälimdedi.

Osıdan keyinen 2011 jıldıñ 3 jeltoqsanında Almatı oblısına qarastı Boralday auılında WQK "Arıstan" arnayı jasağı men bes adamnan qwralğan lañkestik top arasında qarulı qaqtığıs boldı. Arnayı operaciya barısında "Arıstan" jasağınıñ eki sarbazı köz jwmıp, bes lañkestiñ közi joyıldı.

2012 jıl

14 tamız küni İle-Alatau wlttıq sayabağında lañkester qolınan köz jwmğan 12 adamnıñ mürdesi tabıldı. 5 qırküyekte Atırau qalasında jarılıs saladarınan bir adam baqilıq boldı. 12 qırküyek küni Atırau oblısınıñ Qwlsarı qalasında arnayı operaciya kezinde 5 lañkestiñ közi joyılıp, bireui qolğa tüsti. 15 qırküyek Atırau qalasınıñ İşki ister departamentiniñ ğimaratına lañkestik şabuıl jasalıp, 2 policiya qızmetkeri jaraqat aldı. 20 qırküyek Atırau oblısına qarastı Köktem auılında bolğan qarulı qaqtığıstan 4 lañkes öltirildi.

2016 jıl

5 mausım küni Aqtöbe qalasında radikaldı dini wyımdardıñ jeteginde ketken 26 adam «Pallada» qaru-jaraq dükenine şabuıl jasap, añşılıq qarulardı iemdengen lañkester 6655 äskeri bölimşesine basıp kirdi. Saldarınan 9 adam köz jwmıp, 38 adam jaraqat aldı. Osığan baylanıstı alğaş ret Qazaqstan boyınşa terrorlıq qauiptiñ sarı deñgeyi, Aqtöbe qalası boyınşa qızıl deñgeyi engizildi.

Aqtöbe oqiğasınan keyin bir aydan soñ 18 şilde küni Almatı qalasında Ruslan Külekbaev esimdi Qızılorda oblısınıñ tuması Almalı audanınıñ işki ister departamenti men WQK ğimaratına şabuıl jasap, saldarınan 9 adam oqqa wştı.

Qorıta kelgende el biligi bwl terrorlıq şabıldardıñ bolaşaqta qaytalanbauı üşin küştik qwrılımdardıñ küşeytuden basqa ne istedi? Osı uaqıt aralığında halıqtıñ ruhani tärbiesine qanşalıqtı köñil böldi? Ol jağı bizge beymälim. Bir biletinimiz biıl Prezident Nwrswltan Nazarbaev elde saqal ösirgender men hidjab kigenderge zañ jüzinde tıyım salu kerektigin ayttı. Prezidenttiñ bwl bastaması qanday nätije beredi ol da uaqıt enşisindegi dünie.

“The Qazaq Times”