وسىدان ءبىر جىل بۇرىن ياعني 2016 جىلدىڭ 18 شىلدەسىندە الماتى قالاسىندا تەررورلىق شابۋىل بولعان ەدى. وسىعان بايلانىستى ءبىز بۇگىن تاۋەلسىز قازاقستان تاريحىندا بولعان لاڭكەستىك شابۋىلدارعا قىسقاشا توقتالۋدى ءجون كوردىك.

2011 جىلدىڭ 17 مامىر كۇنى اقتوبە قالاسىنداعى ۇلتتىق قاۋىپسىزدىك كوميتەتىنىڭ عيماراتى الدىندا راقىمجان ماحاتوۆ ءوزىن ءوزى جارىپ جىبەردى. سالدارىنان ءۇش ادام جاراقات الدى. ول كەزدە باس پروكۋراتۋرا بۇل وقيعانى تەررورلىق اكت دەپ مويىندامادى. ماحاتوۆتىڭ ۇقك عيماراتى الدىندا ءوزىن جارىپ جىبەرۋىن ونىڭ قىلمىستىق توپ مۇشەسى بولعاندىعىمەن، ىستەگەن ىستەرى ءۇشىن زاڭ الدىندا جاۋاپ بەرۋدەن قاشۋ دەپ ءتۇسىندىردى.

2016 جىلدىڭ 5 ماۋسىمىندا اقتوبە قالاسىنداعى قارۋ-جاراق دۇكەنىنە جاسالعان شابۋىل. فوتو: اكتوبەتايمس

2011 جىلدىڭ 1 شىلدەسىندە اقتوبە وبلىسىنا قاراستى تەمىر اۋدانىندا قارۋلى توپقا قارسى ارنايى وپەراتسيا بولدى. سالدارىنان 2 پوليتسيا قىزمەتكەرى كوز جۇمىپ، بىرنەشەۋى جاراقات الدى. كەيىنەن 8 شىلدە كۇنى 9 تەرروريستىڭ كوزى جويىلدى.

2011 جىلدىڭ 31 قازان كۇنى اتىراۋ قالاسىندا ەكى بىردەي جارىلىس بولدى. ءبىرىنشى جارىلىس تۇرعىن ءۇي اۋلاسىنداعى قوقىس جاشىگىندە بولدى. ودان بىرەر مينۋتتان كەيىن سارى-ارقا ىقشام اۋدانىندا بەلگىسىز ازامات ءوزىن ءوزى جارىپ جىبەردى. بۇل ىسكە بايلانىستى باس پروكۋراتۋرا «تەرروريزم» بابى بويىنشا قىلمىستىق ءىس قوزعادى. لاڭكەستىك شابۋىلدى «حاليفات ساربازدارى» تەررورلىق ۇيىمى ءوز مويىنىنا الدى.

2011 جىل قاراشانىڭ 12 كۇنى تاراز قالاسىندا 1977 جىلى دۇنيەگە كەلگەن ماقسات قاريەۆ ەسىمدى ازامات لاڭكەستىك شابۋىل جاساپ، سالدارىنان جەتى ادام كوز جۇمدى، ونىڭ بەسەۋى پوليتسيا قىزمەتكەرى.

تاراز قالاسىنداعى ءوزىن جارعان جانكەشتى ماقسات قاريەۆ. 2011 جىل، 12 قاراشا.

بۇل وقيعادان ءۇش كۇن بۇرىن 9 قاراشادا «حاليفات ساربازدارى» لاڭكەستىك توبىنىڭ باسشىسى راۆيل قۇسايىنوۆ Minbar Media Project جۋرناليستەرىنە سۇحبات بەرىپ، قازاقستان بيلىگىن قاتاڭ سىنعا الدى. ول اقوردانى «مۇسىلمانداردى قۋدالادى» جانە «ەلدە ساياسي، تاريحي يدەولوگيا قالىپتاستىرمادى» دەپ ايىپتاپ، ەگەردە قازاقستان بيلىگى ءدىن تۋرالى زاڭدى قابىلداۋدان باس تارتپايتىن بولسا، وندا «حاليفات ساربازدارى» ەل اۋماعىندا لاڭكەستىك شابۋلدارىن ۇدەتەتىنىن مالىمدەدى.

وسىدان كەيىنەن 2011 جىلدىڭ 3 جەلتوقسانىندا الماتى وبلىسىنا قاراستى بورالداي اۋىلىندا ۇقك "ارىستان" ارنايى جاساعى مەن بەس ادامنان قۇرالعان لاڭكەستىك توپ اراسىندا قارۋلى قاقتىعىس بولدى. ارنايى وپەراتسيا بارىسىندا "ارىستان" جاساعىنىڭ ەكى ساربازى كوز جۇمىپ، بەس لاڭكەستىڭ كوزى جويىلدى.

2012 جىل

14 تامىز كۇنى ىلە-الاتاۋ ۇلتتىق ساياباعىندا لاڭكەستەر قولىنان كوز جۇمعان 12 ادامنىڭ مۇردەسى تابىلدى. 5 قىركۇيەكتە اتىراۋ قالاسىندا جارىلىس سالادارىنان ءبىر ادام باقيلىق بولدى. 12 قىركۇيەك كۇنى اتىراۋ وبلىسىنىڭ قۇلسارى قالاسىندا ارنايى وپەراتسيا كەزىندە 5 لاڭكەستىڭ كوزى جويىلىپ، بىرەۋى قولعا ءتۇستى. 15 قىركۇيەك اتىراۋ قالاسىنىڭ ىشكى ىستەر دەپارتامەنتىنىڭ عيماراتىنا لاڭكەستىك شابۋىل جاسالىپ، 2 پوليتسيا قىزمەتكەرى جاراقات الدى. 20 قىركۇيەك اتىراۋ وبلىسىنا قاراستى كوكتەم اۋىلىندا بولعان قارۋلى قاقتىعىستان 4 لاڭكەس ءولتىرىلدى.

2016 جىل

5 ماۋسىم كۇنى اقتوبە قالاسىندا راديكالدى ءدىني ۇيىمداردىڭ جەتەگىندە كەتكەن 26 ادام «پاللادا» قارۋ-جاراق دۇكەنىنە شابۋىل جاساپ، اڭشىلىق قارۋلاردى يەمدەنگەن لاڭكەستەر 6655 اسكەري بولىمشەسىنە باسىپ كىردى. سالدارىنان 9 ادام كوز جۇمىپ، 38 ادام جاراقات الدى. وسىعان بايلانىستى العاش رەت قازاقستان بويىنشا تەررورلىق قاۋىپتىڭ سارى دەڭگەيى، اقتوبە قالاسى بويىنشا قىزىل دەڭگەيى ەنگىزىلدى.

اقتوبە وقيعاسىنان كەيىن ءبىر ايدان سوڭ 18 شىلدە كۇنى الماتى قالاسىندا رۋسلان كۇلەكباەۆ ەسىمدى قىزىلوردا وبلىسىنىڭ تۋماسى المالى اۋدانىنىڭ ىشكى ىستەر دەپارتامەنتى مەن ۇقك عيماراتىنا شابۋىل جاساپ، سالدارىنان 9 ادام وققا ۇشتى.

قورىتا كەلگەندە ەل بيلىگى بۇل تەررورلىق شابىلداردىڭ بولاشاقتا قايتالانباۋى ءۇشىن كۇشتىك قۇرىلىمداردىڭ كۇشەيتۋدەن باسقا نە ىستەدى؟ وسى ۋاقىت ارالىعىندا حالىقتىڭ رۋحاني تاربيەسىنە قانشالىقتى كوڭىل ءبولدى؟ ول جاعى بىزگە بەيمالىم. ءبىر بىلەتىنىمىز بيىل پرەزيدەنت نۇرسۇلتان نازارباەۆ ەلدە ساقال وسىرگەندەر مەن حيدجاب كيگەندەرگە زاڭ جۇزىندە تىيىم سالۋ كەرەكتىگىن ايتتى. پرەزيدەنتتىڭ بۇل باستاماسى قانداي ناتيجە بەرەدى ول دا ۋاقىت ەنشىسىندەگى دۇنيە.

“The Qazaq Times”