QR Wlttıq banki. Foto: Kursiv.kz

Wlttıq bank Qazaqstandağı iri bankterdi qoldau bağdarlamasınıñ bastalğanı turalı habarladı. Bağdarlamağa 500 mlrd teñge jwmsaluı mümkin jäne ol bankterdiñ jiıntıq kapitalı 1 trln teñgege jetkenşe 15 jılğa sozıladı. Bwl turalı bas bank törağasınıñ orınbasarı Oleg Smolyakov mälimdedi. 

Wlttıq banktiñ mälimetinşe, bankterge qarjı wsınatın bağdarlamağa kapitalı 45 mlrd teñge şamasında bolatın 15 qarjı institutı qatısa aladı. Bağdarlama byudjeti retteuşiniñ jeke qarajatınan retteletin boladı. "Bağdarlamağa barlıq bankter qatısa almaydı. Ärbir ötinişti jeke-jeke qaraymız. Al bağdarlama qwnı naqtılanıp jatır, biraq şamamen 500 mlrd teñge boladı", - dedi Smolyakov.

Sonday-aq, ol bankter bağdarlamağa öz erkimen qatısa alatının atap ötti. Qarajat bankterge qayta qaytaru şartı boyınşa beriledi, bwl jağdayda bank akcionerleriniñ de röli mañızdı ekenin atap ötti. Al bağdarlama jwmısımen jäne monitoringimen aynalısatın enşiles wyım qwrıladı.

Smolyakovtıñ sözinşe, aldağı 1,5 ay işinde Wlttıq banktiñ enşiles wyımı ärbir bankti sauıqtıruğa qatıstı jeke jospar dayındaydı. Wyım osı jıldıñ tamız-qırküyek aylarında iske qosılıp qaluı mümkin.

Al Wlttıq banktiñ bankterdi baqılau jönindegi departamentiniñ direktorı Oljas Qazitovtıñ sözinşe, bwl bağdarlamanıñ iske qosıluınıñ bastı sebebi - jwmıs istemeytin kreditter. "Resmi mälimet boyınşa jwmıs istemeytin kreditterdiñ deñgeyi qarız portfeliniñ 11 payızın qwraydı. Biraq biz mwnı joğarğı körsetkiş dep esepteymiz. Qayta qwrılımdalğan qarızdar da problemalı bolıp tabıladı, olardıñ ülesi qazir 25 payız. Bwlar kapitalğa aytarlıqtay qısım jasap, kreditteudi toqtatıp otır", - deydi ol.

Wlttıq banktiñ bankterdi sauıqtıruğa jwmsap otırğan qarjısı tek bwl ğana emes. Bwğan deyin Qazkomğa qarjı berdi. Degenmen bankter tek bwl qarjını alıp qana qoymay ekonomikanıñ ösuine üles qossa bolğanı.

“The Qazaq Times”