"Al-Jazeera" (Äl-Jazira) telearnasınıñ tilşileri Arab memleketteriniñ arnanı jabu turalı talabına jauap berdi. Saud Arabiyası, Egipet, Birikken Arab Ämirlikteri  men Bahreyn memleketteriniñ basşılarına beynerolik arqılı jauap qatqan jurnalister telearnanı jabuğa degen wmtılıs - azamattardıñ şınayı aqparatqa qol jetkizu qwqığın şekteu dep esepteydi. 

Beynerolikte: "Bizdiñ de atalğan memleketterge qoyar talabımız bar. Biz jurnalisterge qısım körsetilmeytin, azamattar şınayı aqparatqa kedergisiz qol jetkize alatın qoğamnıñ bolğanın qalaymız. "Al-Jazeera" telearnasın jabu adamdardı öz mäseleleri jöninde ündemeuge mäjbürleu " - delingen.

Esteriñizge sala keteyik, osıdan bwrın Saud Arabiyası, Egipet, Birikken Arab Ämirlikteri  men Bahreyn Kuveyt arqılı Katar memleketiniñ basşılığına eldi diplomatiyalıq izolyaciyadan şığaru üşin qoyılatın talaptardıñ tizimin joldağan bolatın. Olardıñ qatarında Iranmen diplomatiyalıq qarım-qatınastı üzu, el aumağındağı Türkiyanıñ äskeri bazasın jabu jäne "Al-Jazeera" sputniktik arnasınıñ qızmetine tıyım salu bar.

Barlıq talaptardı orındau üşin Katarğa üş kün uaqıt berildi. Bwl talaptardıñ orındaluın mümkin emes dep tanığan  Katar memleketiniñ sırtqı ister ministrligi keyinnen ul'timatumdı orındau üşin   qosımşa 48 sağat swrap, hat joldağan bolatın.

Ayta ketu kerek, BWW "Al-Jazeera" telearnasına qarsı jasalıp otırğan äreketti söz bostandığın şekteu dep sanaytının mälimdedi.

«The Qazaq Times»