Foto: astana.gov.kz

Astana basşılığı qalada ötetin halıqaralıq forum kezinde azıq – tülik bağasınıñ kürt ösuin boldırmau bağıtında jwmıs istep jatır. Bwl turalı äkimdiktiñ baspasöz qızmeti habarladı. 

Astana qalası äkiminiñ orınbasarı Malika Bektwrovanıñ sözişe, bağanıñ kürt ösui men qasaqana ösiru bolmaydı.

"Biz bağa müldem köterilmeydi dep aytpaymız. Biraq, biz bağanıñ kürt ösui men qasaqana ösiru bolmaytındığın jetkizgimiz keledi. Sonımen qatar, köterilu ürdisin basıp jäne bağanıñ saqtaluın bir diapazonda wstap, qarjılandırudıñ osınday türin wzaq merzimge wsınıp otırmız", - dedi M.Bektwrova.

Onıñ aytuınşa, bağanı qalıptastıru salasına mümkindiginşe äser etetin birqatar narıqtıq mehanizmder bar. "Atap aytqanda,sauda jelilerine jäne köterme bağamen jetkizuşilerge jeñildikpen nesie beru boyınşa eki bağdarlama jwmıs istep jatır. Eger, ekinşi deñgeyli bankter jetkizuşilerge 16-18%-ben nesie berse, al äkimdik nesieni däl sol bankter arqılı 7-8,5%-ben beredi. Säykesinşe, bwl tauardıñ naqtı bağasına twtınuşılar üşin oñ äser etedi", - deydi äkimdik ökili.

Bağanı wstau maqsatında qoldanılatın äkimdiktiñ basqa mehanizmi – azıq – tülik qorın qwrıp, olardıñ jettkiziluin qamtamasız etu.

"Biz barlıq müddeli wyımdarmen eseptestik, sonıñ işinde iri sauda jelileriniñ basşılarımen de, sodan tüygenimiz - EKSPO ötkizu kezinde önimderdi atau reti boyınşa twtınu aytarlıqtay 10-nan 50 payızğa ösedi. Sonıñ işinde alkogol'siz susındar. Sondıqtan säuirdiñ basınan-aq önimniñ osı türi boyınşa jäne tağı basqa qatardağı önimderdi tieu jürgizilude", - dep Astana äkiminiñ orınbasarı jalğastırdı.

Sonımen qatar, Bektwrova twrğındar 10-15 payız arzan bağağa azıq-tülik satıp ala alatın aymaqtıq öndiruşilerdiñ twraqtı järmeñkeleri elordadağı bağa twraqtılığına oñ äser etetinin de atap ötti.

Ayta keteyik, ötken ayda Astana ömir süru qwnı "qımbat" öñir bolğan. Sebebi basqa qalalarmen salıstırğanda bas qalada negizgi qajetti tauarlar men qızmet körsetu qwnı 9,2%-ğa ösken.  Azıq-tülik pen susındardıñ bağası 13,2%-ğa, azıq-tülik emes tauarlar qwnı 11,7%-ğa, aqılı qızmetter 2,2%-ğa joğarı bolğan.

“The Qazaq Times”