Foto: Sputnik Kazahstan

Bügin Parlament Mäjilisiniñ jalpı otırısında «Prokuratura turalı» Qazaqstan Respublikası zañınıñ jobası qaralıp, maqwldandı. Zañ jobası prokurorlıq qadağalaudıñ şegi naqtı ayqındalğan konstituciyalıq reformanıñ jalğası bolmaq. Bwl turalı Bas Prokuraturanıñ baspasöz qızmeti habarladı. 

Vedomstvonıñ mälimetinşe, konstituciyalıq reforma barısında Konstituciyanıñ 83-babında özgerister bolğan. Bwl bapqa säykes prokuraturanıñ negizgi maqsattarı naqtı ayqındaldı. Olar: joğarı qadağalau, sotta memlekettiñ müddesin bildiru, qılmıstıq qudalaudı jüzege asıru.

Zañ jobasına säykes memlekettik organdardı tekseru negizderi edäuir qısqartıladı.

"Prokuratura memlekettik organdardı eki jağdayda ğana tekseredi. Atap aytsaq, memlekettik organ öz qwqığın özi qorğay almaytın adamdardıñ nemese köpşiliktiñ qwqığın bwzsa; adam ömiri men densaulığına nemese memleket qauipsizdigine nwqsan keltirse", - delingen baspasöz habarlamasında.

Osınday şekteuler azamattardıñ ötinişterin qarau tärtibine de endi. Jobağa säykes prokurorlar tek özin-özi qorğay almaytın adamdardıñ, köpşiliktiñ qwqıqtarı bwzılğanda nemese adam men memleket müddesine ornı tolmas nwqsan keltirgende jäne osı mäselelerdi qwzırlı organdar qajetti därejede şeşpese ğana ötinişterdi qaraytın boladı.

Özge ötinişter ökiletti organdarğa joldanatın boladı. Azamattardıñ memlekettik organdardıñ kez kelgen äreketine sotqa şağımdanu qwqığı saqtaladı.

Jalpı zañ jobası joğarı qadağalaudıñ qağidaları men mindetterin tübegeyli özgertpeydi. Adam qwqığın qorğau, zañdılıqtı saqtau men qwqıq qorğau qızmetin üylestiru onıñ bastı mindeti bolıp qala beredi.

Sonday-aq, Prokuraturanıñ qwqıqtıq aktileri jüyesine de birqatar tüzetuler engizildi.

Olar: qadağalau jäne den qoyu aktileri bolıp eki topqa bölinedi.

Qadağalau aktilerinen «aldın ala eskertu» men «wyğarım» alınıp tastaldı. «Zañnamalıq aktige tüsindirme berudiñ» de mağınası özgerdi. Bwl akt qoğamdıq qauipsizdikti qamtamasız etu, qwqıq bwzuşılıqtıñ aldın alu, sonday-aq, dayındalıp jatqan qwqıqqa qarsı äreketter turalı mälimetter bolğan kezde engiziletin boladı.

Sonımen birge narazılıq keltiruge jatpaytın qwqıqtıq aktiler körsetilip, prokurorlıq qadağalau aktilerin qabıldaudıñ saldarı anıqtaldı. Endi qadağalau aktileriniñ mäjbürli türde orındaluı sot tärtibimen ğana jüzege asatın boladı.

Prokurordıñ ökilettiligi (qwqıqtarı men mindetteri), jauapkerşiligi, tekseriletin sub'ektiniñ qwqığı men mindeti, tekseru merzimi jäne Bas Prokurordıñ onı wzartu şarttarı bekitildi.

Zañ jobasında sotta memleket müddesin bildiru men qılmıstıq qudalau qızmetin prokuratura organdarı Qılmıstıq procestik, Azamattıq procestik jäne Äkimşilik qwqıq bwzuşılıq turalı kodeksterdiñ negizinde jüzege asırılatındığı körsetildi. Prokuratura qızmetiniñ özge bağıttarı jeke tarauda körinis taptı.

“The Qazaq Times”