Prokuratura-tergeu organdarı Muhoryapovtıñ isin toqtatqanın qoğamnan üş ay jasırğan

Biıl qañtar ayınıñ basında QT redakciyası Bas prokuraturağa til turalı daulı mälimdeme jasap, qoğamda qattı qarsılıqqa wşırağan käsipker Ramil'ya Muhoryapovqa qarsı qozğalğan qılmıstıq istiñ män-jayı jöninde swrau joldağan. Biliktiñ erte jabılğan isti keş jariyalauına ne sebep?

Bas prokuratura qaramağındağı Arnayı prokurorlar qızmetiniñ basşısı Rizabek Ojarov resmi jauabında qılmıstıq is saylau qarsañında, 19 qazanda internet tarmaqtarı men äleumettik jelilerge jariyalanğannan keyin bir aptanıñ işinde jabılğanın habarladı.

«Ramil' Muhoryapovqa qatıstı qılmıstıq is boyınşa anıqtalğanı, Sot saraptama institutınıñ tüsindirmesine säykes, tolıq jazbasız aytılğan sözderdiñ bağıtı men mağınasın anıqtau mümkin bolmauına baylanıstı 2022 jıldıñ 27 qazanında R.Muhoryapovtıñ is-äreketinde qılmıstıq qwqıq bwzuşılıq qwramınıñ bolmauına baylanıstı is toqtatıldı. Prokuratura organdarı qabıldanğan şeşimmen kelisti», – delingen BP qızmeti basşılarınıñ biri Rizabek Ojarovtıñ jauap hatında.

Bas prokuraturanıñ osı jolğı istiñ toqtau merzimi osığan deyingi aytılğan resmi aqparattarğa qayşı. Bas prokuraturanıñ joğarğı lauazım ökilderi jäne arızdanuşılarğa policiyadan berilgen jauaptar soñğı derekke say emes.

Bıltır 27 qazanda bas prokurordıñ orınbasarı Äset Şıñdaliev qoğam narazılığın tudırğan Muhoryapovtıñ qazaq tili turalı aytqanın Almatı policiyası tekserip jatqanın mälimdegen. «Almatı policiya departamenti tekserip jatır. Arnayı saraptama da tağayındalğan. Sonıñ nätijesinde bağa beriledi» degen jurnalisterge.

27 qazandağı Almatı qalalıq PD-niñ arızdanuşılarğa bergen jauabı. Foto: QT

Käsipkerdiñ üstinen arız tüsirgen azamattardıñ biri Kültegin Aspanwlı Almatı Policiya departamenti tergeu basqarmasınan 27 qazanda alğan jauabında saraptama jaña tağayındalğanı körsetilgen. Sonımen qosa, 10 qaraşadağı hatında aqparat ministri Darhan Qıdıräli «Bas prokuraturasınıñ resmi mälimdeuinşe atalğan mäsele İİM-niñ qatañ baqılauında jäne R. Muhoryapovqa qatıstı tiisti tekseru jwmısı jürgizilude» dep jauap bergen. Ministr «tergeu nätijesi turalı aqparattı İİM öz taraptarınan sizge qosımşa joldaydı» degenimen Aspanwlın eşkim istiñ toqtağanı jaylı habardar etpegen. Odan özge, 4 qaraşada Bas prokuraturanıñ Qılmıstıq qudalau qızmeti bastığınıñ orınbasarı Eldos Qilımjanov arızdanuşığa tergeu derekteri qwpiya dep aqparat wsınudan bas tartqan.

Ojarov 27 qazanda is toqtağan dese, däl sol küni bas prokuror orınbasarı Äset Şıñdaliev jäne Almatı qalasınıñ PD Ektremizmge qarsı is-qimıl basqarması bastığınıñ sol kezdegi mindetin atqaruşı, qazirgi orınbasarı Darhan Abikulov Qılmıstıq kodekstiñ 174-babınıñ («Äleumettik, wlttıq, rulıq, näsildik, tektik-toptıq nemese dini alauızdıqtı qozdıru») 1-böligimen is tirkelip, saraptama bastalğanın habarlağan.

Muhoryapovtıñ üstinen arız tüsirgender №227500031000954 sotqa deyingi tergeu isi turalı aqparat bile almağan, sot-filologiyalıq caraptamanıñ tağayındalu qaulısı, tergeuşiniñ atı-jöni, is barısı turalı mülde aqparat berilmegenin aytadı. Tipti jurnalist Kültegin Aspanwlı Almatı qalasınıñ Policiya departamentine barıp, İİM men Bas prokuraturağa birneşe ret hat joldap eşqanday jauap ala almağan. Arızdanuşılardıñ aytuınşa, tergeu jäne prokuratura organdarı twtqanı kötermegen, swraqtarğa jauap bermegen, keri baylanısqa şıqpağan.

Prezident jäne senat saylauı, Qañtar qırğınınıñ jıldığı ötken soñ Almatı prokurorınıñ orınbasarı Nwrlan Auğanbaev 19 qañtarda aqparat qwraldarına Muhoryapovtıñ isi «qılmıs qwramı bolmağandıqtan» toqtağanın mälimdegen. Ojarovtıñ deregine süyensek, bilik is jabılğannan 85 kün ötkennen keyin jariyalağan. 27 qazanda toqtağan is turalı nelikten tek 19 qañtarda habarlauınıñ, qoğamnan jasıruınıñ sebebi belgisiz.

Bıltır küzde Chocofamily Holding negizin qalauşı käsipker Ramil' Muhoryapov Almatıdağı Resey azamattarınıñ aldında Qazaqstanda orıs tilin bile twra qazaq tilinde söyleytinderdiñ äreketin «wltşıldıq pen mädenietsizdiktiñ belgisi» degen. Wltarazdıq tudıra jazdağan bwl mälimdemesinen keyin qoğamda narazılıq üdep, onıñ biznesine jappay boykot jariyalağan. Jelidegi auqımdı sınnan soñ keşirim swrağan video jüktep, servisterin tügel qazaqşalauğa uäde etken. Biraq qwqıq qorğau organdarınıñ kinäsiz degen bağasınan keyin keşirim swrağan videosın äleumettik jelidegi paraqtarınan alıp tastağan.

The Qazaq Times