پروكۋراتۋرا مەملەكەتتىك ورگانداردى تەكسەرۋدى قىسقارتادى

بۇگىن پارلامەنت ءماجىلىسىنىڭ جالپى وتىرىسىندا «پروكۋراتۋرا تۋرالى» قازاقستان رەسپۋبليكاسى زاڭىنىڭ جوباسى قارالىپ، ماقۇلداندى. زاڭ جوباسى پروكۋرورلىق قاداعالاۋدىڭ شەگى ناقتى ايقىندالعان كونستيتۋتسيالىق رەفورمانىڭ جالعاسى بولماق. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. 

ۆەدومستۆونىڭ مالىمەتىنشە، كونستيتۋتسيالىق رەفورما بارىسىندا كونستيتۋتسيانىڭ 83-بابىندا وزگەرىستەر بولعان. بۇل باپقا سايكەس پروكۋراتۋرانىڭ نەگىزگى ماقساتتارى ناقتى ايقىندالدى. ولار: جوعارى قاداعالاۋ، سوتتا مەملەكەتتىڭ مۇددەسىن ءبىلدىرۋ، قىلمىستىق قۋدالاۋدى جۇزەگە اسىرۋ.

زاڭ جوباسىنا سايكەس مەملەكەتتىك ورگانداردى تەكسەرۋ نەگىزدەرى ەداۋىر قىسقارتىلادى.

"پروكۋراتۋرا مەملەكەتتىك ورگانداردى ەكى جاعدايدا عانا تەكسەرەدى. اتاپ ايتساق، مەملەكەتتىك ورگان ءوز قۇقىعىن ءوزى قورعاي المايتىن ادامداردىڭ نەمەسە كوپشىلىكتىڭ قۇقىعىن بۇزسا; ادام ءومىرى مەن دەنساۋلىعىنا نەمەسە مەملەكەت قاۋىپسىزدىگىنە نۇقسان كەلتىرسە", - دەلىنگەن ءباسپاسوز حابارلاماسىندا.

وسىنداي شەكتەۋلەر ازاماتتاردىڭ وتىنىشتەرىن قاراۋ تارتىبىنە دە ەندى. جوباعا سايكەس پروكۋرورلار تەك ءوزىن-ءوزى قورعاي المايتىن ادامداردىڭ، كوپشىلىكتىڭ قۇقىقتارى بۇزىلعاندا نەمەسە ادام مەن مەملەكەت مۇددەسىنە ورنى تولماس نۇقسان كەلتىرگەندە جانە وسى ماسەلەلەردى قۇزىرلى ورگاندار قاجەتتى دارەجەدە شەشپەسە عانا وتىنىشتەردى قارايتىن بولادى.

وزگە وتىنىشتەر وكىلەتتى ورگاندارعا جولداناتىن بولادى. ازاماتتاردىڭ مەملەكەتتىك ورگانداردىڭ كەز كەلگەن ارەكەتىنە سوتقا شاعىمدانۋ قۇقىعى ساقتالادى.

جالپى زاڭ جوباسى جوعارى قاداعالاۋدىڭ قاعيدالارى مەن مىندەتتەرىن تۇبەگەيلى وزگەرتپەيدى. ادام قۇقىعىن قورعاۋ، زاڭدىلىقتى ساقتاۋ مەن قۇقىق قورعاۋ قىزمەتىن ۇيلەستىرۋ ونىڭ باستى مىندەتى بولىپ قالا بەرەدى.

سونداي-اق، پروكۋراتۋرانىڭ قۇقىقتىق اكتىلەرى جۇيەسىنە دە بىرقاتار تۇزەتۋلەر ەنگىزىلدى.

ولار: قاداعالاۋ جانە دەن قويۋ اكتىلەرى بولىپ ەكى توپقا بولىنەدى.

قاداعالاۋ اكتىلەرىنەن «الدىن الا ەسكەرتۋ» مەن «ۇيعارىم» الىنىپ تاستالدى. «زاڭنامالىق اكتىگە تۇسىندىرمە بەرۋدىڭ» دە ماعىناسى وزگەردى. بۇل اكت قوعامدىق قاۋىپسىزدىكتى قامتاماسىز ەتۋ، قۇقىق بۇزۋشىلىقتىڭ الدىن الۋ، سونداي-اق، دايىندالىپ جاتقان قۇقىققا قارسى ارەكەتتەر تۋرالى مالىمەتتەر بولعان كەزدە ەنگىزىلەتىن بولادى.

سونىمەن بىرگە نارازىلىق كەلتىرۋگە جاتپايتىن قۇقىقتىق اكتىلەر كورسەتىلىپ، پروكۋرورلىق قاداعالاۋ اكتىلەرىن قابىلداۋدىڭ سالدارى انىقتالدى. ەندى قاداعالاۋ اكتىلەرىنىڭ ءماجبۇرلى تۇردە ورىندالۋى سوت تارتىبىمەن عانا جۇزەگە اساتىن بولادى.

پروكۋروردىڭ وكىلەتتىلىگى (قۇقىقتارى مەن مىندەتتەرى), جاۋاپكەرشىلىگى، تەكسەرىلەتىن سۋبەكتىنىڭ قۇقىعى مەن مىندەتى، تەكسەرۋ مەرزىمى جانە باس پروكۋروردىڭ ونى ۇزارتۋ شارتتارى بەكىتىلدى.

زاڭ جوباسىندا سوتتا مەملەكەت مۇددەسىن ءبىلدىرۋ مەن قىلمىستىق قۋدالاۋ قىزمەتىن پروكۋراتۋرا ورگاندارى قىلمىستىق پروتسەستىك، ازاماتتىق پروتسەستىك جانە اكىمشىلىك قۇقىق بۇزۋشىلىق تۋرالى كودەكستەردىڭ نەگىزىندە جۇزەگە اسىرىلاتىندىعى كورسەتىلدى. پروكۋراتۋرا قىزمەتىنىڭ وزگە باعىتتارى جەكە تاراۋدا كورىنىس تاپتى.

“The Qazaq Times”