Foto: avtorazborka.kz

Almatınıñ 2017 jılğa arnalğan byudjeti naqtılandı. Qalanıñ JİÖ-niñ 2,6%-ğa artuı, jergilikti jäne respublikalıq byudjettiñ kiris josparınıñ artıq orındaluı jäne 123 mlrd teñgeniñ ünemdelui arqılı biılğı jıldıñ byudjeti 48,9 mlrd teñge bolıp bekitildi. Bwl turalı Almatı äkimdiginiñ baspasöz qızmeti habarladı. 

Äkimdiktiñ mälimetinşe, birinşi toqsanda investiciya kölemi 13%-ğa, twrğın üy salu 34%-ğa, bölşek sauda 8,6%-ğa, önim öndiru 4,5%-ğa, qwrılıs salu 1,6%-ğa, baylanıs 1,3%-ğa arttı. Ötken jılmen salıstırğanda respublikalıq byudjetke tüsken salıq kölemi 4%-ğa, jergilikti byudjetke tüskeni 6% -ğa köbeydi. Ötken jılı jergilikti byudjettiñ kiris salası 12,2 mlrd teñgege, respublikalıq byudjette 102,6 mlrd teñgege artığımen orındaldı. Degenmen, byudjetten alu jıl sayın ösip keledi. Almatı elimizdiñ eñ iri megapolisi ekeni jäne keñ kölemdi investiciyanı qajet etetini eskerilip, 2017 jılı byudjettik alımdar azaydı.

Mısalı, qalanıñ köşe-jol jelisin damıtu, qoğamdıq kölikti paydalanatın jolauşılarğa dwrıs jağday jasau maqsatında wzındığı 95 km bolatın joldarğa ortaşa jöndeu jwmıstarın jürgizu üşin qosımşa 2,5 mlrd teñge bölinedi. 2,4 mlrd teñgege Alatau audanındağı «Alğabas», «Aqbwlaq», Naurızbay audanındağı «Qalqaman», «Altın Alaş» eldi mekenderinde jaña joldar salınadı.

11,5 mlrd teñgege servistik qızmet körsetetin ıñğaylı äri jaña 297 avtobustar, bwlardan özge kölik twrağınıñ barınşa tiimdi jwmıs isteui üşin 40 evakuator alınadı.

Qalanı köriktendiru isine 19,7 mlrd teñge jwmsaladı. Jibek jolı, Panfilov, Gogol', Qabanbay batır köşeleri men Astana alañındağı jürginşi joldarı retke keltiriledi, YAn Geyldiñ Koncepciyası boyınşa är audandağı 16 köşede alleyalar, landşaftar, velosiped joldarı, balalardıñ oyın alañdarı, kölik qozğalısınıñ «qauipsiz» aymaqtarı payda boladı. 6 skverge, bir sayabaqqa, bir bul'varğa ağımdağı jöndeu jwmıstarı jürgiziledi. Qala twrğındarına ıñğaylı bolu üşin Tölebaev, Bayseyitova köşeleri men Esentay özeniniñ jağalauında 3 jürginşi aymağı payda boladı.

472 aula aynalası jöndeledi, oğan 7,7 mlrd teñge jwmsaladı. 10 km arıq jäne arıq ötpelerinde jöndeu jwmıstarı bastaladı, Ülken Qarasu özeniniñ jağalauı, Kişi Almatı özeni öñirindegi gidrotehnikalıq qondırğılar jañartıladı. Jetisu audanındağı «Duman» eldi mekenindegi zirattı abattandıruğa 200 mln teñge bölinedi.

Äleumettik salağa qosımşa 2,6 mlrd teñge bölu josparlanğan. Onıñ 207,6 mln teñgesi bilimge, yağni jeke bala baqşalarda mektep jasına deyingi oqıtuğa tapsırıs beruge, balalardı tärbileuge, memlekettik bala baqşalardağı bölemelerdi oñtaylandıruğa, 8 mektep jasına deyingi mekemelerdegi apattı jağdaylardı joyuğa jwmsaladı.

Densaulıq saqtau salasında 2018 jılı engiziletin medicinalıq saqtandıruğa 100% dayın bolu üşin 2148 birlik komp'yuter aluğa jäne jalpı alañı 35 000 m2 bolatın 440 tösekti onkologiyalıq ortalıq qwrılısın saludıñ jobalı-smetalıq qwjattarın (JSQ) dayındauğa qosımşa 557,9 mln teñge bölinedi.

Twrğındardıñ äleumettik jağınan az qamtılğan böligine qoldau körsetu üşin 1,8 mlrd teñge bölu josparlanğan. Qısqa merzimdi käsibi dayındıqtan 7 mıñ adam ötedi, «Twrğını şağın üy» jäne «Jeke twru ortalığı» jobaları iske asıp, bwlarda 65 adamğa qızmet körsetiledi, bwlarda kündiz mügedek balalar tärbilenedi. 50 naşar otbasıldar üşin Otbası men balalardı qoldau ortalığı» qwrıladı. «Bolaşağı bar bala» pilottı jobası qolğa alınıp, mümkindikteri şekteuli balalarğa äleumettik qoldau körsetiledi. Qalanıñ sporttıq äleuetin arttıru üşin qosımşa 758,5 mln teñge qarastırılğan.

Twrğın üy-kommnualdı şaruaşılıqtı modernizaciyalau jäne 64 üydegi eski lifterdi almastıru, 30 üydi keşendi jöndeu men 33 üydiñ şatırın jöndeu jwmıstarınıñ JSQ dayındau üşin 896 mln. teñge bölinedi. Injenerlik jelilerdi salu üşin qosımşa 1,9 mlrd. teñge qarastırılğan.

Qauipsizdikti qamtamasız etu salasına 2,5 mlrd. teñge bölinedi. Ekologiyanı jaqsartu jönindegi keşendi jospar ayasında kölikterdiñ ulı jäne zalaldı zattardı qanşalıqtı şığaratının anıqtaytın 10 birlikti gazanalitikalıq keşen alınadı. Bwlardan özge tötenşe jağday kezinde twrğındardı jılumen qamtamasız etetin jıljımalı modul'di qazandıq jäne 7 birlikti arnayı tehnika alınatın boladı.

Almatıda keler jıldıñ ayağında BWW-nıñ Öñirlik habı aşıladı. Oğan halıqaralıq wyımdardıñ 19 agenttigi men ökilettikteri qatısadı. Osığan oray qajetti JSQ dayındau üşin biılğı jılı 50 mln. teñge bölinedi.

«Almatı -2020» damu Bağdarlamasınıñ negizgi bağıttarınıñ biri - qalanıñ barlıq audarınıñ birdey damuın qamtamasız etu. Sonımen, 2017 jılı qalanıñ naqtılanğan byudjeti - 542,4 mlrd. teñge, onıñ üstine ötken jılmen salıstırğanda damu byudjeti 21 mlrd teñgege artıp, 163 mlrd teñgeni qwradı.

“The Qazaq Times”