Juırda rektor ornınan bosağan Ğalımqayır Mwtanovatıñ kezinde jeri jekege ötken QazWU territoriyası turalı dau boyınşa äleumettik jelilerdegi Ras Aitamyn zertteu arnası universitet aumağınıñ bir böligin iemdengen kompaniyanıñ arqasüyerin anıqtadı.

«Qara şañıraqtıñ» jekege ötip ketken jeri turalı qoğamdıq rezonanstan keyin basşılıqqa wzaq jıldar türli memlekettik qızmette bolğan Janseyit Tüymebaev keldi. Şudı basu üşin jaña rektor kelgenimen, wlttıq universitettiñ jerin kim aldı degen swraq jauapsız qaldı. 11 jılday ornınan tapjılmağan, aqındığı men ğalımdığı twrğısınan da sınğa ilikken Ğalımqayır Mwtanov äzirge naqtı qayda barğanı belgisiz. El arasındağı sıbısqa qarağanda, Wlttıq ğılım akademiyasınıñ äldebir institutına baruı mükin körinedi.

Osığan deyin ORDA.kz 2017 jılğı tamız ayında aumağı 0,7495 ga jerdi Almatı äkimdigi OMIREX JŞS-ğa uaqıtşa paydalanuğa bergenin, al mülikti Atlas Development JŞS-nıñ jarğılıq kapitalına ötkizgenin jazğan.

Däl osı kompaniyalardıñ artında kimder twrğanın zerttegen Ras Aitamyn Telegram-arnasınıñ twjırımdauınşa, QazWU jerin alğan kompaniyalar artında Qwlıbaev twr. Dağdarıs kezinde de tabısı jıl sanap artatın belgili oligarh Timur Qwlıbaev «Joint Technologies» arqılı QazWU-dıñ jerin äkimşilik arqılı uaqıtşa paydalanuğa alğan OMIREX kompaniyasına ielik etedi.

2009 jılı şildede qwrılğan bwl kompaniyasınıñ qwrıltayşıları – Urazaeva Fatima Mustafaevna men Joint Technologies kompaniyası. Al Joint Technologies-tiñ qwrıltayşıları – Sagdieva Rauşan Mihtaevna jäne «Kipros» JŞS. Al «Kipros» JŞS-nıñ qwrıltayşısı – eñ däuletti qazaq baylarınıñ biri, eks-prezidenttiñ küyeu balası Qwlıbaev. Osında atı atalğan Rauşan Sagdieva da, Fatima Urazaeva da Timur Asqarwlına jaqın adamdar.

Fatima Urazaevanıñ wlı Erlan Upuşev Timur Asqarwlımen iıq tiresip jwmıs istegen. Ol «Şwbarköl Premium» AQ-nıñ bas direktorı qızmetin atqarğan. Al «Şwbarköl Premium» AQ-nıñ negizgi akcioneri – Timur Qwlıbaev ielik etetin «Joint Resources» AQ. Sonday-aq Upuşev Qwlıbaev pen öziniñ anası Fatima Urazaeva ielik etetin kömir öndiruşi «Maykuben vest» JŞS-nıñ bas direktorı bolğan. Tipti «Atameken» käsipkerler palatası prezidium törağası Timur Qwlıbaevtıñ qolınan «Parasat» ordenin alğan.

Upuşevtiñ anası, 77 jastağı zeynetker Fatima Urazaevanıñ da Timur Qwlıbaev kompaniyalarımen baylanısı bar. Onıñ jeke nemese jalğa alınatın mülikti paydalanu jäne basqarumen aynalısatın «TBN» kompaniyası bar. Osı «TBN-nıñ» tağı bir qwrıltayşısı – «Mercury Properties» JŞS. Al «qwrıltayşı» kompaniyanıñ («Mercury Properties» JŞS-nıñ) qwrıltayşıları – Timur Qwlıbaevtıñ «Kipros» kompaniyası men jwbayı Dinara Qwlıbaeva.

Urazaeva men Qwlıbaevtıñ biznes baylanısı mwnımen bitpeydi. «Demir Delux» JŞS-nıñ qwrıltayşıları da – F.Urazaeva men Qwlıbaevtıñ «Kipros» kompaniyası. «Premier Development Company» JŞS-na da Fatima Urazaeva men «Joint Resources» AQ arqılı Qwlıbaev qojalıq etedi. «Joint Resources» AQ-ğa «QazAzot» AQ-nıñ 50% akciyası tiesili, sonday-aq «Joint Resources» «Şwbarköl Premium» AQ-nıñ negizgi akcioneri.

QazWU jer dauı men äkimdik qaulısında atauı atalatın tağı bir kompaniya – Atlas Development JŞS-nıñ da Qwlıbaevqa tikeley qatısı bar. Bwl kompaniyanıñ qwrıltayşıları: Qwlıbaev ielik etetin «Kipros» pen Sagdieva Rauşan.

Rauşan Sagdieva da Qwlıbaevtıñ senimdi adamdarınıñ biri. Ol Qwlıbaev ielik etetin «Kipros» JŞS-nıñ jetekşisi. Osı  kompaniyası arqılı Timur Qwlıbaev pen Sagdieva Rauşan Reseydegi «Rosstroyinvestke» qoja.

Äkimdik qaulısında atı atalatın Atlas Development äl-Farabi dañğılınan tömen, Esentay özeniniñ batısındağı QazWU-ğa jaqın jerge ie. Ol aumaqta jerastı parkingi bar köpqabattı üy salınbaq. Atlas Development-tiñ jerge ielik etu qwqığı 2017 jıldıñ 9 qaraşasındağı satu-satıp alu kelisimşartımen bekitilgen.

Atlas Development JŞS «QazWU jerleriniñ üşinşi twlğalarğa ötip ketkeni turalı jekelegen adamdardıñ taratqan aqparatında aytılğan jerge özderine tiesili aumaqtıñ qatısı joğın» mälimdegen. Biraq äñgime –äkimdik arqılı Atlas Development-ke ötip ketken mülikte. Äkimdik mülik Atlas Development-ke, al jerdi uaqıtşa paydalanu Omirex-ke berilgenin aytqan. Biraq bwl eki kompaniya bir-birimen baylanıstı, kompra.kz mälimetinşe, 2016-2019 jıldarı Omirex JŞS Atlas Development JŞS-nıñ qwrıltayşısı bolğan.

«Qalay bolğanda da jer dauındağı tizbektiñ bäri Timur Qwlıbaevqa aparadı. Forbes däuletin 3,1 mlrd dollarğa bağalağan, onsız da köl-kösir baylıqqa ie milliarderge QazWU-dıñ wltaraqtay jeri ne üşin kerek boldı eken?» – degen swraqtıñ bası tağı aşıq qalğanday. Almatı qalasınıñ eñ qımbat audanınıñ marjan aumağına köpqabattı twrğın üy köterip, el auzındağı «qwday bolsam» deytin bay-manaptarğa satu arqılı qalta qampaytu müddesi bayqaladı.

Aldağı uaqıtta qwrılğanına 85 jıldan asqan QazWU aumağınıñ zañdıq twrğıda özgeru tarihın wsınıp, qoğam narazılığın tudırğan jağdaydı jiti baqılaytın bolamız. «Wlttar türmesi» atalğan Keñestik kezeñniñ özinde qazaq jastarı sanatoriyalıq aymaqta bilim aluğa tiis degen Dinmwhammed Qonaevtıñ kezinde şegelengen «amanat jer» bügingi täuelsizdik tañında wstağannıñ qolında, tistegenniñ auzında ketkeni köptiñ şamına tidi.

"The Qazaq Times"