Foto: Sputnik Qazaqstan

QR Memlekettik qızmet isteri jäne sıbaylas jemqorlıqqa qarsı is-qimıl agenttiginiñ aqparatınşa, keden jäne salıq salasında jemqorlıq azayar emes. Bwl turalı vedomstvo basşısınıñ orınbasarı Alik Şpekbaev mälimdedi. 

Onıñ sözinşe, 2016 jılı 61 jemqorlıq qılmıs jasalsa, 2017 jıldıñ birinşi toqsanında-aq jemqorlıqqa qatıstı 58 fakt tirkelgen. Bwl ötken jıldıñ säykes kezeñimen salıstırğanda 81%-ğa joğarı.

"Qwqıqtıq statistikağa säykes, 2016 jılı jauapqa tartılğan ortalıq organdar arasında - Qarjı ministrligi ekinşi orında. Äsirese vedomstvo qwramındağı memlekettik kiris organdarınıñ ülesi - 86%. Sondıqtan Qarjı ministrliginen osığan män beruin swraymız. Mısalı 2016 jılı memlekettik kiris organdarınan bir qızmetker jauapqa tartılsa, 2017 jıldıñ 1 toqsanında birden üş adamğa jetti", - deydi ol.

Şpekbaevtıñ sözinşe, 2016 jılı memlekettik qızmet körsetu sapasın tekseru kezinde osı salada 2 mıñğa juıq zañ bwzuşılıq anıqtalğan.

"Qarjı ministrligi tarapı biz jibergen jemqorlıq faktilerine qatıstı eskertuimizge asa män berip otırğan joq. Agenttik arqılı vedomstvoğa jemqorlıq täuekelderin orındau üşin 15 wsınıs jasaldı. Onıñ tek beseui orındaldı. Men mäselelerdi tağı bir qaraudı wsınamın. Eger olardıñ tarapınan eşbir äreket jasalmasa Prezident äkişiliginiñ ädep jönindegi komissiyasına jetekşilerge qatıstı qajetti şaralardı qoldanu turalı ötiniş jiberiledi", - dep atap ötti Agenttik ökili.

Sonday-aq, Alik Şpekbaevtıñ sözinşe, Qarjı ministrligi ükimet tarapınan bekitilgen jemqorlıqqa qarsı şaralardı da tolıq orındamağan.

"The Qazaq Times"