كوروناۆرۋس امەريكاداعى بايىرعى حالىقتى قىرىپ جاتىر ما؟

مامىردىڭ سوڭىندا اقش-تا ۆيرۋستان قازا بولعاندار سانى 100 مىڭ ادامنان اسقان ەدى. كەيبىر ستاتيستيكالىق مالىمەتتەر امەريكالىق جەرگىلىكتى حالىقتىڭ اراسىندا ۆيرۋستىڭ جايىلۋى ەڭ جوعارى ەكەنىن كورسەتتى. اقش-تىڭ اريزيونا، يۋتا جانە جاڭا-مەكسيكو شتاتتارىنىڭ اراسىندا 71 مىڭ شارشى شاقىرىم اۋماقتاعى ناۆاحون-نەيشەندەدە ۆيرۋستىڭ تارالۋى حالىق سانىنا شاققاندا نيۋ-يوركتان اسىپ كەتكەن.

اتالعان ايماقتاعى ناۆاحو حالقىن ۆيرۋس پەن ونىڭ تارالۋى تۋرالى مالىمەتتەر قورقىتپادى، تەك ودان ساقتانۋ شارالارى الاڭداتتى. سەبەبى، امەريكالىق بايىرعى حالىقتاردىڭ مەكەندەگەن بۇل ايماعىندا سۋ تاپشىلىعى باستى پروبلەما. ولار ءۇشىن قولدى ءسات سايىن جۋىپ تۇرماق تۇگىل، ىشەرگە سۋ تاپپاي وتىر. بۇل ايماقتا جاسايتىن ناۆاحو حالقىنىڭ سانى 174 مىڭ شاماسىندا. ولاردىڭ 2,3 پايىزى ۆيرۋسقا شالدىققان. اقش-تا ۆيرۋستىڭ تارالۋ وشاعى رەتىندە دابىرلاتقان نيۋ-يوركتىڭ وزىندە حالىق سانىنىڭ 1,8 پايىزى عانا ۆيرۋسقا شالدىققان ەدى.

ناۆاحونىڭ 4 مىڭنان استام ادامى ۆيرۋسقا شالدىعىپ، 170 ادام كوز جۇمعان. ايماق تۇرعىندارى كىرىسىن كازينو، مەيرامحانالارعا جۇمىس ىستەۋ جانە كەن قازۋ سەكىلدى قارا جۇمىستاردان كىرگىزەدى. الايدا، ناۆاحولار دا امەريكاداعى وزگە جەرگىلىكتى تۇرعىندار سەكىلدى كەدەيشىلىكتە جاساپ كەلەدى.

كەيبىر ماماندار ناۆاحولارعا ىندەتتىڭ كەڭ تاراۋىن ولاردىڭ حريستيان مەن جەرگىلىكتى دىندەرىنە قاتىستى مەرەكەلەرمەن تۇسىندىرگەن. الايدا، «شەكاراسىز دارىگەرلەر ۇيىمى» ناۆاحولاردىڭ الەۋمەتتىك جاعدايىنىڭ تومەندىگى باستى سەبەپ بولدى دەپ كورسەتتى.

“The Qazaq Times”