كوروناۆيرۋس ىندەتىنىڭ كەسىرىنەن الەمدە 60 ميلليونعا جۋىق ادام كەدەيلىككە ۇشىراۋى مۇمكىن. دامۋشى ەلدەر قايتا قارىزدانباق.

دۇنيەجۇزىلىك بانكتىڭ باسشىسى دەۆيد مالپاسس 19 مامىردا پاندەميا داعدارىسىنىڭ سالدارى تۋرالى بولجامىن ءبولىستى.

باس بانكير بانك جۇيەسىندەگى باعالاۋ باعانى ەكونوميكا 5%-عا قۇلدىراپ، «تەرەڭ رەتسەسسياعا ۇشىرايتىنىن» ايتادى. ونىڭ سوزىنشە داعدارىستىڭ زاردابىن جەڭىلدەتۋ ءۇشىن الەم بانكى دۇنيە ءجۇزىنىڭ 70% حالقى ءومىر سۇرەتىن 100 دامۋشى مەملەكەتكە نەسيە بەرۋدى جوسپارلاپ وتىر. COVID-19 ۆيرۋسى جانە داعدارىسقا قارسى كومەك سۇراپ وتىرعان 39 ەل افريكا قۇرلىعىنان. قارىزعا بەرىلگەن قاراجات دەنساۋلىق ساقتاۋ باعدارلاماسى، ەكونوميكا جۇيەسى جانە الەۋمەتتىك قورعاۋ-قامسىزداندىرۋ سالاسىنا باعىتتالادى دەسەدى. وسىلايشا، دۇنيەجۇزىلىك بانك 15 ايدىڭ ىشىندە، ياعني كەلەسى جىلدىڭ ورتاسىنا دەيىن 160 ملرد دوللار نەسيە بەرمەك. قازىردىڭ وزىندە وزبەكستان، پاكىستان، تۋنيس، فيليپپين ت.ب. ءتارىزدى 33 ەل كەلىسىمشارت جاساسىپ، ترانزاكتسيا اۋدارىمىن جۇرگىزىپ جاتىر. اتالعان ەلدەردىڭ تىزىمىندە قازاقستاننىڭ بار-جوعى ءالى بەلگىسىز. بىراق ەكونوميستەر كۇللى الەمدى تىعىرىققا تىرەگەن ىندەتپەن ىلەسە كەلگەن نەسيەنىڭ مەملەكەت قازىناسىنا سالقىنىن تيگىزەتىنىن جوققا شىعارمايدى.

بىلتىر ساۋىردەن بەرى دۇنيەجۇزىلىك بانككە باسشىلىق ەتىپ كەلە جاتقان دەۆيد مالپاسس. فوتو: Simone D McCourtie / دۇنيەجۇزىلىك بانك

2015 جىلعى ەسەپ بويىنشا، الەم حالقىنىڭ 10 پايىزى نەمەسە 734 ميلليون ادام كۇنىنە 1,90 دوللاردان از اقشاعا كەدەيشىلىكتە ءومىر سۇرەدى. پاندەميا كەسىرىنەن ەندى كەدەيلەر سانى 800 ميلليونعا جەتۋى مۇمكىن كورىنەدى.

بىلتىر جەلتوقسان ايىنىڭ سوڭىندا قىتاي بيلىگى حۋبەي پروۆينتسياسىنىڭ ۋحان قالاسىندا قالاي پايدا بولعانى بەلگىسىز ۆيرۋس تارالا باستاعانىن حابارلاعان ەدى. ساراپشىلار مەن ماماندار مۇنى كوروناۆيرۋستىڭ جاڭا ءتۇرى 2019-nCoV (كەيىننەن SARS-CoV-2),  COVID-19 دەپ اتاعان. دۇنيەجۇزىلىك دەنساۋلىق ساقتاۋ ۇيىمى قاۋىپتى كەسەل 114 ەلدە 118 مىڭ ادامعا جۇققان كەزىندە، بيىل (2020 جىل) 11 ناۋرىزدا ۆيرۋستى جاھاندىق ىندەت (پاندەميا) دەپ جاريالادى. ەكى جارىم ايدىڭ ىشىندە كەيستەر سانى 10 مىڭنان 5 ميلليونعا ءوستى.

"The Qazaq Times"