رەسەي مەن ساۋد ارابياسى كەشە، 6 ءساۋىر كۇنى ونلاين كونفەرەنتسياعا شىعىپ، مۇناي ءوندىرىسىن قىسقارتۋ تۋرالى ماسەلەلەردى تالقىلاۋى كەرەك ەدى. بىراق، ەكى ەل اراسىنداعى بۇل سويلەسۋلەر كەيىنگە قالدىرىلدى. جالپى وسى مۇناي ءوندىرىسىن قىسقارتۋ شارتتارى تۋرالى اراب پەن ورىس اراسىندا كەلىسپەۋشىلىك ءورشىپ تۇر، ناتيجەسىندە مۇناي باعاسى تاريحتاعى ەڭ تومەنگى شەككە دەيىن قۇلاپ بارادى.

وپەك+ ۇيىمى قول قويعان مۇناي ءوندىرىسىن قىسقارتۋ تۋرالى كەلىسىم 1 ساۋىردەن باستاپ توقتادى. كەلىسىم توقتاي سالىسىمەن ساۋد ارابيانىڭ ەڭ مۇناي ءوندىرۋشى مەملەكەتتىك كومپانياسى باعا سوعىسىن باستاپ جىبەردى. ول مۇناي باعاسىن ارزانداتسا، رەسەي تاراپ ءوندىرىستى 3 پايىزعا كوبەيتتى. كوروناۆيرۋستىڭ اسەرىندە مۇنايعا بولعان قاجەتتىلىك قاڭتار ايىنان بەرى تومەندەپ جاتقانى بەلگىلى. وعان مۇناي ءوندىرۋشى الىپتار اراسىنداعى وسىنداي قايشىلىقتار قوسىلىپ، مۇناي باعاسى سوڭعى 30 جىلداعى ەڭ تومەنگى شەككە ءتۇستى.

ال، سوڭعى سويلەسۋلەردىڭ ءساتسىز بولۋى الەم بازارىنداعى مۇناي باعاسىنا تاعى اسەر ەتتى. بۇل ارينە ورىس اقشاسىنىڭ اقش دوللارىنا شاققانداعى قۇنىن ءتۇسىرىپ بارا جاتقانىن كورىپ وتىرمىز. 1 دوللار 81-82 دوللار اراسىندا ساتىلىپ جاتىر ەدى، سوڭعى كۇندەرى 76-78 اراسىندا تۇرعانىن كوردىك.

مۇناي باعاسى جانە وندىرۋشىلەر اراسىنداعى سوڭعى ماڭىزدى جاڭالىقتى «بلۋمبەرگ» اگەنتتىگى تاراتتى. وندا ولار ورىس پەن اراب اراسىندا مۇناي ءوندىرىسىن قىسقارتۋ تۋرالى شارتتار تالقىعا سالىنعانىن، قوس تاراپ بۇعان كەلىسە الماي جاتقانى ايتىلعان. اتالعان اگەنتتىكتىڭ حابارلاۋىنشا، رەسەي مەن ساۋد ارابياسى بۇل تۋرالى سويلەسۋلەرگە اقش تارابىنىڭ ارالاسۋىن قالايدى. ماسكەۋدىڭ ۋاشينگتوندى نە ءۇشىن سويلەسۋگە تارتىپ وتىرعانى تۇسىنىكتى. سەبەبى، ساۋد ارابياسىنىڭ ارتىندا كىم تۇرعانى انىق.

ەڭ قىزىعى، وسى اپتادا الەمنىڭ الدىنعى 20 ءىرى ەكونوميكاسىنا يە ەلدەردىڭ ەنەرگەتيكا مينيسترلەرى باس قوسىپ، مۇناي ءوندىرىسىن 10 پايىزعا قىسقارتۋ تۋرالى ماسەلەنى اقىلداسپاق. ال، اقش پرەزيدەنتى دونالد ترامپتىڭ مۇناي ءوندىرىسىن قىسقارتۋ تۋرالى پىكىرى انىق ەمەس. ول وتكەن اپتادا وپەك جوباسىن تەرىس جاعىنان سىنادى، ول ءتىپتى بۇل ۇيىمدى مونوپوليا قاتارىندا ايىپتاعانى دا بار.

“The Qazaq Times”