ۇكىمەت مەملەكەتتىك تىلگە «مونيتوردان» ورىن بەرۋگە نەگە قينالادى؟

ەلدەگى اتقارۋشى ءبيلىك قىزمەتىن جۇزەگە اسىرۋشى، 17 مينيسترلىك پەن ءۇش وكىل، ءبىر پرەمەر-مينسيتردەن تۇراتىن قازاقستان ۇكىمەتىنىڭ وتىرىسىندا ۇنەمى ورىس تىلىندەگى پرەزەنتاتسيا قۇجاتتارى ۇسىنىلادى. نەلىكتەن؟  

بۇگىن، 2 ناۋرىز ەلوردادا ۇكىمەت باستىعى اسقار ءماميننىڭ توراعالىعىمەن وتكەن ۇكىمەت وتىرىسىندا كوروناۆيرۋس ىندەتىمەن كۇرەس ماسەلەسى جانە ساۋدانى دامىتۋدىڭ جاڭا باعدارلاماسى تالقىلاندى. دەنساۋلىق ساقتاۋ ءمينيسترى ە. ءبىرتانوۆ پەن سىرتقى ىستەر ءمينيسترى م. تىلەۋبەردى، يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى ب. قاماليەۆ، ۇكىمەت باسشىسىنىڭ ورىنباسارى ە. توعجانوۆ قازىرگى جاعداي مەن اتقارىلىپ جاتقان جۇمىستار تۋرالى مەملەكەتتىك تىلدە بايانداعانىمەن، مونيتورداعى ماتەريالى تەك ورىسشا بەرىلدى. سونداي-اق ساۋدانى دامىتۋدىڭ 2021-2025 جىلدارعا ارنالعان مەملەكەتتىك باعدارلاماسى تۇجىرىمداماسىن  تانىستىرعان ساۋدا جانە ينتەگراتسيا ءمينيسترى ب. سۇلتانوۆ تا وسى سارىندى قايتالادى.

25 اقپاندا وتكەن جيىندا دا «سۋ تاسقىنى قاۋپىنىڭ الدىن الۋ جانە جويۋ بويىنشا اتقارىلىپ جاتقان ىستەر جونىندە ىشكى ىستەر ءمينيسترى ە. تۇرعىمباەۆ، ەكولوگيا ءمينيسترى م. مىرزاعاليەۆ، يندۋستريا ۆيتسە-ءمينيسترى ق. وسكەنباەۆ، اقمولا وبلىسىنىڭ اكىمى ە. مارجىقپاەۆ، قاراعاندى وبلىسىنىڭ اكىمى ج. قاسىمبەك، استانا اكىمى ا. كولگىنوۆ بايانداما جاسادى. سونداي-اق شاعىن جانە ورتا بيزنەس پەن جۇمىس ورىندارىن اشۋ تۋرالى ەكونوميكا ءمينيسترى ر. دالەنوۆ جانە «اتامەكەن» ۇكپ باسقارما توراعاسىنىڭ ورىنباسارى ە. جۇماعازيەۆ ءسوز الدى. بارلىعىنىڭ پرەزەنتاتسياسى – ورىسشا.

;t=942s

ماسەلەنىڭ ءمان-جايى بولەك اڭگىمە. كوپتى تاڭعالدىرعانى قازاقستان ۇكىمەتىنىڭ وتىرىسىندا مەملەكەتتىك تىلدە ەجەلەپ وقيتىن ءىرى شەندىلەردىڭ بارلىق پرەزەنتاتسيا-ەسەپ ماتەريالى تەك ورىس تىلىندە كورسەتىلىپ قسىنىلادى. نەلىكتەن؟ الەۋمەتتىك جەلى قولدانۋشىلارى مۇنى «كوزقاماندىق»، «قازاق ءتىلىن جۇمىس ءتىلى بولعانىن قالامايتىن قاساڭ پىكىردەن تۋعان» دەپ باعالاپ جاتادى. بۇگىنگى جيىندا دا مينيسترلەر مەن رەسمي ۋاكىلدەر پرەزەنتاتسياسىن قازاقشا قورعاعانىمەن، ەكرانداعى مالىمەت-دەرەك سىزبالار تەك ورىس تىلىندە بەرىلدى. بۇل ءبىرىنشى رەت ەمەس. جىل بويىنا وتكەن ۇكىمەت وتىرىسىنىڭ تىكەلەي ەفيرىنەن وسى ولقىلىق بايقالادى. «قازاق ءتىلى تەك اۋىزشاعا عانا جاراي ما، قۇجات تىلىندە الەۋەتى دارمەنسىز بە ەدى؟» دەگەن ورىندى ساۋال تۋادى.

17 ءمينيسترى مەن ەكى ورىنباسارى بار ۇكىمەت باستىعى اسقار ءماميننىڭ كومانداسى  اۋىزەكى سويلەردە قازاقشانى «شورقاقتاتىپ» بولسا دا قولدانعانىمەن، نەگىزگى مونيتور مالىمەتتەرىن تانىستىراردا ورىسشاعا بۇيرەگى بۇرىپ تۇراتىنداي.

ءسوزىمىز دالەلدى بولۋ ءۇشىن 28 قاڭتارداعى ۇكىمەت وتىرىسىن الالىق. قازاقستان ۇكىمەتىنىڭ جيىنىندا ۇلتتىق ەكونوميكا ءمينيسترى رۋسلان دالەنوۆ ەكونوميكالىق دامۋ جوسپارى  جايلى، ال ەكولوگيا ماعزۇم مىرزاعاليەۆ «2020-2030 جىلدارعا ارنالعان قازاقستاننىڭ سۋ رەسۋرستارىن باسقارۋ جونىندەگى مەملەكەتتىك باعدارلاما» تۇجىرىمداماسىنىڭ پرەزەنتاتسياسىن ورىس تىلىندە ۇسىندى. بايانداما قازاقشا وقىلىپ جاتادى، ال مونيتورداعى نەگىزگى دەرەك-سىزبا ورىسشا ۇسىنىلادى. تىڭداي وتىرىپ، كوز سالاتىن شەنەۋنىكتەر ءبىر ساتتە بيلينگۆيستىك وپەراتسيامەن ساناسىنا سالماق تۇسىرەدى. ال بۇدان دا ماڭىزدىسى «مەملەكەتتىك ءتىلدىڭ اقسارايداعى ابىرويى». ۇكىمەت ءوزى ۇلگى بولماسا، ەتەكتەگىگە نە دەۋگە بولادى؟

;feature=emb_title

اقپاننىڭ 4-ءى ۇكىمەت ۇيىندە وتكەن كەزەكتى وتىرىستىڭ  كونتەنتىنە ءۇڭىلىپ كورسەك، مۇندا دا ساۋدا ءمينيسترى باقىت سۇلتانوۆ ازىق-تۇلىك تاۋارلارىنىڭ باعاسىن تۇراقتاندىرۋ تۋرالى بايانداماسىنىڭ الەم-جالەم پرەزەنتاتسياسىن مەملەكەتتىك تىلدە ۇسىنا المادى. ال «تسيفرلىق قازاقستان» مەملەكەتتىك باعدارلاماسىن ىسكە اسىرۋ بارىسىن تانىستىرۋدى نازارباەۆتى ەسكە الۋمەن باستاعان تسيفرىق دامۋ ءمينيسترى اسقار جۇماعاليەۆ تە ينفوگرافيكاعا تولى دەرەكتەرىنىڭ ورىسشا نۇسقاسىن كورسەتتى.

;feature=emb_title

وتكەن اپتادا عانا، 18 اقپانداعى «2021-2025 جىلدارعا ارنالعان گەولوگيالىق بارلاۋ مەملەكەتتىك باعدارلاماسى تۇجىرىمداماسى» مەن ەلەكتروندى ساۋدا ماسەلەسى قارالعان ۇكىمەت وتىرىسىندا ەكولوگيا ءمينيسترى م. مىرزاعاليەۆ پەن  ب. سۇلتانوۆ ادەتتەگىدەي ءوزى قازاقشا، ماتەريالى ورىسشا «سايرادى». سونىمەن قوسا ۇكىمەت مۇشەلەرىنەن بولەك پوشتا ينفراقۇرىلىمىنىڭ جاي-كۇيى تۋرالى بايانداعان «قازپوشتا» اق باسقارما توراعاسى ساكەن سارسەنوۆتىڭ دە پرەزەنتاتسياسى «سپاسيبو زا ۆنيمانيە» دەگەن تيترمەن اياقتالدى.

;feature=emb_title

قازاقستان ۇكىمەتىنىڭ ءباسپاسوز كورپۋسىنا ۇلت جاناشىرلارى مەن ازاماتتىق قوعام بەلسەندىلەرى «مەملەكەتتىك ءتىلدى وگەيسىتپەۋدى» قاتاڭ ەسكەرتەدى.

"The Qazaq Times"