ترامپ بەيجىڭ ساپارىندا قىتايعا قاراتقان قاتاڭ پوزيتسياسىنان اينىدى

امەريكا قۇراما شتاتىنىڭ پرەزيدەنتى قىتاي ساپارى كەزىندە جاساعان مالىمدەمەسىندە، ەكى ەل اراسىنداعى 310 ملرد دوللارعا تەڭ كەلەتىن ساۋدا تاپشىلىعىنىڭ بارلىق جاۋاپكەرشىلىگى اقش-تىڭ موينىندا ەكەنىن ايتىپ ءوتتى. اقش-قىتاي اراسىنداعى ساۋدا تاپشىلىعىن قۇراما شتاتتىڭ موينىنا الۋى قىتاي ءۇشىن ۇلكەن جەڭىسپەن پارا-پار.

BBC-ءدىڭ بەرگەن حابارىندا، وسى جولعى كەزدەسۋدە ترامپتىڭ قىتايعا قاراتقان پوزيتسياسى جۇمساردى دەلىنگەن. ال، اقش-تاعى «The New York Times» باسىلىمى «ترامپ سولتۇستىك كورەيا ماسەلەسى مەن ساۋدا ىنتىماقتاستىعىن قالاي شەشپەك؟» اتتى ماقالادا دا ترامپتىڭ اۋەلدەگى قىتايعا قاراتقان پوزيتسياسىنىڭ وزگەرگەنىن ايتىپتى. وسىعان دەيىن ترامپ ۇكىمەتى قىتايدى ادىلەتسىز ساۋدا جاساپ كەلەدى دەپ ايىپتاعان بولاتىن.

ترامپتىڭ بەيجىڭ ساپارىنىڭ ەكىنشى كۇنى تيان-انمىن الاڭىنىڭ باتىسىنا ورنالاسقان «حالىق سارايى» الدىندا سالتاناتتى قارسى الۋ ۇيىمداستىرىلعان. ءدال وسى سارايدا ترامپ «قىتاي باسشىسىن ماقتاي سويلەپ، ونى جەرگىلىكتى حالىق قولدايدى» دەگەن پىكىرىن بىلدىرگەن.

ترامپ پەن شي جينپيڭ ازىق-تۇلىك، ەنەرگەتيكا، اۆياتسيا سالالارىندا بىرقاتار ماڭىزدى كەلىسىمدەرگە قول جەتكىزدى. دەگەنمەن، قىتاي بانك جانە تەحنولوگيا تارماقتارىن اقش-قا ۇسىنا قويمادى. ترامپ بولسا، اقش-تا بولعان ساۋدا تاپشىلىعىنىڭ باسىم بولىگى قىتايمەن بولعان ساۋدا تاپشىلىعىنان كەلىپ شىعۋىن بۇرىنعى ۇكىمەتكە ارتتى. ول ءۇشىن قىتايدىڭ جاۋاپكەرشىلىگى جوق دەپ تاپتى. قىتايعا كەلۋدەن بۇرىن ترامپ اقش-تىڭ ساۋدا تاپشىلىعىنا قالۋى قىتايدىڭ ادىلەتسىز ساۋدا جاساۋىندا دەپ كەلگەن ەدى. ءتىپتى قىتايدىڭ بۇل ءىسى الەمدىك ساۋداعا اپات اكەلەدى دەپ تاۋىپ، دۇنيەجۇزىلىك ساۋدا ۇيىمىنا شاعىم جولداعان .

ترامپتىڭ قىتاي ساپارىنان كەيىن ونىڭ اۋەلگى پوزيتسياسىنان اينىپ كەتۋى جاڭا ساۋدا كەلىسىمى مەن سولتۇستىك كورەيا ماسەلەسىندە قىتايدىڭ مول جاردەمىنە يە بولۋ دەپ بولجاۋعا بولادى. دەسە دە، ترامپقا بەيجىڭ ساپارىنىڭ قاي تۇسى مۇنداي شەشىم قابىلداتۋعا ىقپال ەتكەنى انىق ەمەس.

“The Qazaq Times”