فوتو: ار

اقش وداقتاستارىمەن جانە سەرىكتەستەرىمەن قىتايدا وتەتىن قىسقى وليمپيادا ويىندارىنا بويكوت جاريالاۋدى تالقىلاماق. بۇل تۋرالى بريفينگتە اقش مەملەكەتتىك دەپارتامەنتىنىڭ ءباسپاسوز قىزمەتىنىڭ جەتەكشىسى نەد پرايس حابارلادى.

اق ءۇي اكىمشىلىگى شىڭجاڭداعى گەنوتسيد ماسەلەسىن دە توقتالدى. رەسمي وكىل بايانداماسىندا: «اقش پەن قىتايدىڭ قارىم-قاتىناسى «باسەكەلەستىككە» نەگىزدەلگەن. ۆاشينگتون مەن بەيجىڭ كەيدە قارسىلاستار رەتىندە ارەكەت ەتەدى. ءبىز شىڭجاڭداعى احۋالدى دا نازارعا الامىز»، – دەيدى پرايس. ياعني اقش قىتايمەن قارىم-قاتىناس ورناتۋ كەزىندە ءوزىنىڭ مۇددەلەرى مەن قۇندىلىقتارىن باسشىلىققا الادى.

كەلەسى جىلى قىتاي قابىلداپ الاتىن وليمپيادا ويىندارىنا بويكوت جاريالاۋدى بۇعان دەيىن كانادا، نورۆەگيا، اقش ساياساتكەرلەرى، سونداي-اق الەمنىڭ ءار ءتۇرلى ەلدەرىنەن 200-گە جۋىق ادام قۇقىقتارى جونىندەگى ۇيىمداردىڭ وكىلدەرى قولداعان.

XXIV قىسقى وليمپيادا 2022 جىلعى 4-20 اقپان ارالىعىندا بەيجىڭدە وتەدى. قىتاي استاناسى 2015 جىلدىڭ 31 شىلدەسىندە كۋالا-لۋمپۋرداعى حالىقارالىق وليمپيادا كوميتەتىنىڭ سەسسياسىندا وتەتىن ورىن رەتىندە تاڭدالدى.

بۇعان دەيىن شىڭجاڭداعى جاعدايعا بايلانىستى ەۋرووداق قىتايعا سانكتسيا ەنگىزدى. 2018 جىلدىڭ تامىزىندا بۇۇ ادام قۇقىقتارى جونىندەگى جوعارعى كوميسسار باسقارماسىنىڭ وكىلدەرى شىڭجاڭداعى تۇزەتۋ لاگەرلەرىندە 1 ملن-عا جۋىق مۇسىلمانجاردىڭ زاڭسىز ۇستالعانىن جانە ادام قۇقىقتارىنىڭ تاپتالعانىن مالىمدەدى. باسقارما بۇل جاعدايعا الاڭداۋشىلىق ءبىلدىرىپ، وسى ايماققا باقىلاۋشىلار جىبەرۋدى ۇسىندى.

قىتاي بيلىگى شىڭجاڭدا پەنيتەنتسيارلىق مەكەمەلەردىڭ اۋقىمدى جەلىسىن قۇرۋ تۋرالى اقپاراتتى بىرنەشە رەت جوققا شىعاردى. سونىمەن قاتار، 2018 جىلدىڭ سوڭىندا ولار وڭىردە ءبىلىم بەرۋ جانە كاسىپتىك دايارلاۋ ورتالىقتارى جۇمىس ىستەيتىنىن حابارلاعان. قىتاي شەنەۋنىكتەرىنىڭ مالىمدەۋىنشە، وندا تەرروريزم مەن ەكسترەميزم يدەيالارىنىڭ ىقپالىنا تۇسكەن، قىتاي ءتىلىن، جازۋ نەگىزدەرىن، كوممۋنيكاتيۆتىك داعدىلاردى جانە قحر زاڭناماسىنىڭ نەگىزدەرىن وقيتىن ادامدار بار. بۇل ورتالىقتارداعى ادامداردىڭ ناقتى سانىن قىتاي بيلىگى جاسىرىن ۇستاپ وتىر.

"The Qazaq Times"