اقش بەيجىڭ قىسقى وليمپياداسىنا ديپلوماتيالىق بايكوت جاريالادى. فوتو: CNN

اقش 2022 جىلى قىتايدىڭ ورتالىق قالاسىندا وتكەلى تۇرعان قىسقى وليمپيادا – 2022-گە ديپلوماتيالىق بايكوت جاريالادى. قىتايداعى ادام قۇقىعى ماسەلەسىنە الاڭداۋشىلىق بىلدىرگەن اق ءۇي اتالمىش سپورت دوداسىنا رەسمي دەلەگاتسيا جىبەرمەيتىنىن جەتكىزدى.

ديپلوماتيالىق بايكوت بويىنشا اقش تارابىنان سپورت شاراسىنا تەك رەسمي دەلەگاتسيا جىبەرىلمەيدى، ال سپورتشىلار ويىنعا قاتىسا الادى جانە ۇكمەتتىڭ تولىق قولداۋىنا يە بولا الادى.

بەيجىڭدەگى قىسقى وليپيادا ويىندارىنا ديپلوماتيالىق بايكوت جاريالاۋ ماسەلەسى وسىعان دەيىن دە كوپ رەت ايتىلىپ كەلگەن. بەيجىڭ بايكوت جاريالاناتىن بولسا «قاتاڭ جاۋاپ قايتاراتىنىن» دا مالىمدەگەن ەدى.

دۇيسەنبى كۇنى اق ءۇي ءباسپاسوز قىزمەتى ديپلوماتيالىق بايكوتتى راستاپ مالىمدەمە جاساعاننان كەيىن قىتايدىڭ ۋاشينگتونداعى ەلشىلىگى مالىمدەمە جاساپ: «بۇل شەشىم وليمپيادالىق حارتيا ماعىناسىنىڭ ايتارلىقتاي بۇرمالاۋ»، – دەپ باعالادى.

سوڭعى كۇندەرى قىتايدىڭ رەسميلەرى اقش-تىڭ ديپلوماتيالىق بايكوت جاريالاۋىن قىتاي تارابى «ماعىناسىز ارەكەت» دەپ كەلگەن ەدى. وسىنىڭ ءوزى دە بەيجىڭنىڭ ديپلوماتيالىق بايكوتتى قالامايتىنىن كورسەتكەندەي بولدى.

The Qazaq Times