2017 جىلى 26 ءساۋىر كۇنى رەسپۋبليكا سارايىندا قازاقستان رەسپۋبليكاسى ۇلتتىق ۇلانى ءان-بي ءانسامبلى مەن بىرلەسكەن وركەسترىنىڭ ۇلتتىق ۇلان اسكەرىنىڭ 25 جىلدىعى مەن وتان قورعاۋشىلار كۇنىنە وراي «ۇلى دالا ۇلاندارى» اتتى گالا-كونتسەرتى وتەدى. اتالعان شارا ۇلتتىق ۇلان باس قولباسشىلىعى جانە رەسپۋبليكا سارايىنىڭ اكىمشىلىگىنىڭ بىرلەسكەن جوباسىمەن، سونداي-اق الماتى قالاسى اكىمدىگىنىڭ قولداۋىمەن ۇيىمداستىرىلىپ وتىر. 

ءمانى بولەك مادەني شارا قازاقستان رەسپۋبليكاسى پرەزيدەنتى نۇرسۇلتان ءابىشۇلى نازارباەۆتىڭ «بولاشاققا باعدار: رۋحاني جاڭعىرۋ» اتتى ەلىمىزدىڭ رۋحاني جاڭعىرۋىنىڭ بىرەگەي باعدارلاماسى اياسىندا ۇيىمداستىرىلۋ ۇستىندە.

كونتسەرتكە پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا، قازاقستان رەسپۋبليكاسى ىشكى ىستەر ءمينيسترى پوليتسيا گەنەرال-پولكوۆنيگى قالمۇحانبەت قاسىموۆ، الماتى قالاسىنىڭ اكىمى باۋىرجان بايبەك، قازاقستان رەسپۋبليكاسى ۇلتتىق ۇلانىنىڭ باس قولباسشىسى گەنەرال-لەيتەنانت رۋسلان جاقسىلىقوۆ، قالالىق ءماسليحات دەپۋتاتتارى، كۇش-قۋات ۆەدومستۆولارىنىڭ، كوميتەتتەر، دەپارتامەنتتەردىڭ باسشىلارى، ارداگەرلەر، باق وكىلدەرى، الماتى گارنيزونىنىڭ اسكەري قىزمەتشىلەرى مەن ولاردىڭ وتباسى مۇشەلەرى، سونداي-اق قالا تۇرعىندارى مەن قوناقتارى قاتىسادى.

شارانىڭ كونتسەرتتىك باعدارلاماسىندا ەلىمىزدىڭ ەڭبەك سىڭىرگەن قايراتكەرلەرى ەلميرا باققالي، مۇرات نۇرعازيەۆ، ەستاي مۇقاشەۆ، ەدىل قۇسايىنوۆ، سونداي-اق عايني جۇماشەۆا، اسحات تاۋشەۆ، باۋىرجان تۇرعىمباەۆ سىندى كوپتەگەن بايقاۋلاردىڭ لاۋرەاتتارى ونەر كورسەتەدى. كونتسەرتكە ۇلتتىق ۇلان ءان جانە بي ءانسامبلىنىڭ باستىعى دارحان راحىمعاليەۆ كوركەمدىك جەتەكشىلىك جاسايدى.

سونىمەن قاتار مەرەكەلىك كونتسەرتتە «ازيا داۋىسى» جانە «سلاۆيانسكي بازار» حالىقارالىق بايقاۋلارىنىڭ لاۋرەاتى مارجان اراپباەۆا، ءانسامبلدىڭ فولكلورلىق توبى، ۆوكالدىق توبى جانە تاعى باسقا دا ونەرپازدار ۇجىمى ءوز ونەرلەرىن كورسەتەتىن بولادى.

كونتسەرت باسىندا كەش قوناقتارى ۇلتتىق ۇلاننىڭ ءفوتوتىلشىسى ۆياچەسلاۆ گەلبلينگتىڭ ۇلتتىق ۇلاننىڭ قىزمەتتىك-جاۋىنگەرلىك تىنىس-تىرشىلىگى جايلى فوتوكورمەسىمەن تانىسا الادى. وسى ورايدا، ەگەمەن ەلىمىزدىڭ وتان قورعاۋشىلارىنىڭ فوتوشەجىرەسىن جاساۋدا ۆ.گەلبلينگتىڭ سىڭىرگەن ەڭبەگى اتاپ وتەرلىك. ونىڭ كوپشىلىك فوتوسۋرەتتەرى جۇرت كوڭىلىنەن شىقتى. قازىرگى تاڭدا مايتالمان ماماننىڭ جەكە مۇراعاتىندا اسكەري سالاعا قاتىستى ءبىر ميلليوننان اسا فوتوسۋرەت جينالعان.

2017 جىلدىڭ 10 قاڭتارىندا، مەملەكەتىمىز ءتاۋ ەتەر تاۋەلسىزدىگىمىزگە قول جەتكىزگەن تۇستا ەلباسى جارلىعىمەن جاساقتالعان ىشكى اسكەردىڭ، بۇگىنگى تاڭداعى ۇلتتىق ۇلاننىڭ قۇرىلعانىنا 25 جىل تولدى.

قۇقىقتىق ءتارتىپ اسكەرى ىشكى ىستەر ورگاندارىنىڭ ءبىرتۇتاس جۇيەسىنە كىرەدى جانە ەلىمىزدىڭ ىشكى تىنىشتىعىن قاس قاقپاي كۇزەتىپ، جەكە ادامدى، قوعام مەن مەملەكەتتى قىلمىس پەن زاڭعا قايشى ارەكەتتەردەن قورعاۋدى سەنىمدى جۇزەگە اسىرىپ كەلەدى.

كونتسەرت 2017 جىلى 26 ءساۋىر كۇنى ساعات 11.00-دە جانە 19.00-دە الماتى قالاسىنىڭ رەسپۋبليكا سارايىندا وتەدى. كىرۋ تەگىن بيلەتتەر مەن شاقىرۋ بيلەتتەرى بويىنشا.

اككرەديتاتسيا ءۇشىن بايلانىس تەلەفوندارى: 8-778-397-11-10, 8707-937-66-78,  8 747 887 98 72, 8 777 246 23 26, 8 778 260 37 08

قازاقستان رەسپۋبليكاسى،  ۇلتتىق ۇلانىنىڭ ءباسپاسوز قىزمەتى

"The Qazaq Times"