كەمەل توقاەۆ اۋديتورياسى توڭىرەگىندەگى داۋ قالاي ءوربىدى؟

ءال-فارابي اتىنداعى قازاق ۇلتتىق ۋنيۆەرسيتەتىندە پرەزيدەنت قاسىم-جومارت توقاەۆتىڭ اكەسى كەمەل توقاەۆتىڭ اتىندا اۋديتوريا اشىلعاننان كەيىنگى داۋدان سوڭ وقۋ ورنى باسشىلىعى تاراپىنان مۇعالىمدەرگە قىسىم جاسالىپ، جۇمىستان قۋىلعانى جونىندە اقپارات تارادى. 7 قازاندا جۋرناليستيكا فاكۋلتەتىنىڭ ۇستازى داستان قاستاي Facebook جەلدىسىنە ءوزىنىڭ سەبەپسىز قىزمەتتەن بوساتىلعانىن جازدى. الەۋمەتتىك جەلىدەگى داۋدان كەيىن ماسەلەگە عىلىم جانە جوعارى ءبىلىم ءمينيسترى ساياسات نۇربەك ارالاسىپ، مۇعالىم جۇمىسىندا قالىپ، رەكتور جانسەيىت تۇيمەباەۆ فاكۋلتەت دەكانىنىڭ مىندەتىن اتقارعان مانشۇك مۇقاشەۆانى قىزمەتىنەن بوساتتى، -دەپ جازدى Masa Media.

9 قازاندا Masa Media ءتىلشىسى داستان قاستايدى نە سەبەپتى جۇمىستان شىعارىپ، قايتا قابىلداعانىن ءبىلۋ ماقساتىندا ۋنيۆەرسيتەتكە باردى.

وقۋ ورنىنىڭ اقپارات جانە كوممۋنيكاتسيالار دەپارتامەنتى ديرەكتورىنىڭ ورىنباسارى المات ءيسادىل داستان قاستايدىڭ جۇمىستان شىعارىلعانىن الەۋمەتتىك جەلىدەن وقىعانىن ايتىپ، كەيىننەن داستان قاستاي جۇمىستان شىعارىلماعان، ۋنيۆەرسيتەتتە جۇمىسىن ىستەپ ءجۇر، ونى راستايتىن ەشقانداي قۇجات جوق دەپ قاراما-قايشى پىكىر ءبىلدىردى.

– داستان قاستاي وسى ۋنيۆەرسيتەتتىڭ وقىتۋشىسى رەتىندە جۇمىستان شىعارىلماعان. قىزمەتىن جالعاستىرىپ جاتىر. تۇسىنىسپەۋشىلىك بولعان شىعار. ول قۇجاتتىق جاعىنان راستالماعان، – دەدى المات ءيسادىل.

ول  كەمەل توقاەۆتىڭ اتىندا اۋديتوريا اشۋدى كىمدەردىڭ قارجىلاندىرعانىن، وعان كىمدەردىڭ باستاماشى بولعانىن دا بىلمەيتىنىن ايتتى. جۋرناليستەر «تۇك بىلمەسەڭىز نەگە بىزگە پىكىر بەرۋگە شىقتىڭىز، بىلەتىن ءباسپاسوز حاتشىسى شىقسىن» دەگەن ەدى: «سەندەر حايپ جاساۋعا ۇمىتىلاسىڭدار» دەپ كەتىپ قالدى.

– بۇل جەردە ۋنيۆەرسيتەتتىڭ ءبىر تيىن اقشاسى كەتپەدى. ول ءبىر ادامنىڭ قارجىسىنا جاسالعان نارسە ەمەس. اۋديتوريانى ءبىز اشقان جوقپىز. بۇل قوردىڭ اقشاسى. مەن ونى بىلمەيمىن. ول مەنىڭ قۇزىرەتىمە كىرمەيدى. مەن سەندەر سياقتى ءجۋرناليستپىن. سەندەر حايپ جاساۋعا ۇمىتىلىپ تۇراسىڭدار. مەن ناقتى جاۋابىمدى بەرىپ تۇرمىن، – دەدى المات ءيسادىل.

جۋرناليستيكا فاكۋلتەتىنىڭ دەكانى تەمىرعالي كوپباەۆ داستان قاستايدىڭ جۇمىستان شىعۋىن دەكاننىڭ مىندەتىن اتقارۋشى مانشۇك مۇقاشەۆامەن اراداعى جەكە باس ارازدىعى سالدارىنان بولعان وقيعا دەپ باعالادى. ونىڭ سوزىنشە، رەكتور جانسەيىت تۇيمەباەۆ ول جونىندە بىلمەگەن.

– داستان قاستايدىڭ جۇمىستان شىعۋىنا دەكاننىڭ مىندەتىن اتقارۋشى مانشۇك مۇقاشەۆا مەن سونىڭ جانىنداعى ءبىر-ەكى ادامنىڭ مۇددەسى بولعان. ونى رەكتور بىلمەگەن. مانشۇك مۇقاشەۆا مەن داستان قاستايدىڭ اراسىندا ەرەگەس بولعان. ول بۇعان دەيىن داستان قاستايعا ماقالاڭا سواۆتور ەتىپ قوساسىڭ دەگەن. داستان وعان كونبەگەن. ءسويتىپ، مانشۇك مۇقاشەۆا سوڭىنا شام الىپ تۇسكەن. جۇمىستان شىعارۋ ءۇشىن قولىنان كەلگەنىنىڭ بارلىعىن ىستەپ، قولىنا قۇجاتىن ۇستاتقان. ونى جوعارى باسشىلىق بىلمەگەن. بىزدە جۇمىستان شىعاراتىن رەكتور عانا. مانشۇك مۇقاشەۆا وسى ماسەلە بويىنشا جۇمىستان بوساتىلدى، – دەدى تەمىرعالي كوپباەۆ.

تەمىرعالي كوپباەۆتىڭ سوزىنشە، مانشۇك مۇقاشەۆا داستان قاستايدى Facebook جەلىسىندە رەكتور جانسەيىت تۇيمەباەۆتىڭ ازاتتىق راديوسى ءتىلشىسىنىڭ ميكروفونىنا جارماسىپ، قارسى سۇراق قويعانىن «ۇنامسىز جاعداي» دەپ باعالاپ، پىكىر جازعانىن نەگىز ەتىپ قۋدالاعان.

قازۇۋ رەكتورى جانسەيىت تۇيمەباەۆقا كەمەل توقاەۆ اۋديتورياسى اشىلعان كۇنى ازماتتىق راديوسىنىڭ ءجۋرناليسى سۇراق قويعان. ول شارانىڭ ەشقانداي جاعىمپازدىق ەمەس ەكەنىن ايتىپ، ءتىلشىنىڭ ميكروفونىن وزىنە قاراي يتەرىپ، قارسى سۇراق قويعان. وعان دەيىن ۋنيۆەرسيتەت قىزمەتكەرلەرى ءجۋرناليستىڭ جۇمىسىنا كەدەرگى كەلتىرىپ، رەكتورعا سۇراق قويدىرماي ارى-بەرى جۇلقىلاعان.

Masa Media ءتىلشىسى ماسەلەنىڭ ءمان-جايىن ءبىلۋ ماقساتىندا مانشۇك مۇقاشەۆاعا تەلەفون سوقتى. بىراق ول جاۋاپ بەرۋدەن باس تارتىپ، تۇتقانى تاستاي سالدى.

تەمىرعالي كوپباەۆ اۋديتورياعا كەمەل توقاەۆتىڭ اتىن بەرۋ جاعىمپازدىق دەپ ەسەپتەمەيدى. ول بۇل باستاما ءبىر جىل بۇرىنعى جوسپارعا ەنگىزىلىپ قويعانىن ايتتى. بىراق اۋديتورياعا جوندەۋ جۇمىستارىن كىم قارجىلاندىرعانىن بىلمەيتىنىن مالىمدەدى.

– كەمەل توقاەۆتىڭ اۋديتورياسىن اشۋ تۋرالى ءبىر جىل بۇرىن جوسپارلانىپ قويعان. مەنىڭ الدىمداعى دەكاننىڭ ۋاقىتىندا وسىنداي ماسەلە كوتەرىلگەن. بىزدە قايراتكەرلەردىڭ اتىنا بەرىلگەن 10-15 اۋديتوريا بار. كىمنىڭ باستاماسى بولعانىن بىلمەيمىن. ول ۋنيۆەرسيتەتتىڭ قارجىسىنا جاسالعان جوق. مىسالعا، بىزدە تۇلەكتەر قاۋىمداستىعى بار. ءوزىمىزدىڭ جۋرناليستيكا فاكۋلتەتىن بىتىرگەن كاسىپكەرلەر بار. سولار كومەكتەسكەن بولار. مەن ولاردىڭ كىم ەكەنىن بىلمەيمىن. وتا جاساپ، اۋرۋحانادا جاتقانمىن. جۇمىسقا ەندى شىقتىم، – دەدى تەمىرعالي كوپباەۆ.

داستان قاستايدىڭ ءوزى بولعان ماسەلەگە بايلانىستى بۇگىن جينالىس وتكەنىن ايتتى. ونىڭ سوزىنشە، كەمەل توقاەۆتىڭ اۋديتورياسى اشىلعاننان كەيىن قىسىم كۇشەيگەن. بىراق ول ءوزىن نە سەبەپتى جۇمىستان شىعارىپ، قايتادان قابىلداعانىن ءالى بىلمەيتىنىن، ول الداعى ۋاقىتتا تەكسەرىلەتىنىن مالىمدەدى.

– كەمەل توقاەۆتىڭ اۋديتورياسى اشىلعاننان كەيىن بىزگە قىسىم باستالدى. جازبامدا مەن تالاپ ەتۋ، ءبىزدىڭ ءىس قاعازدارىمىزدى بەرىپ جىبەرۋ دەگەن ء(ىس-ارەكەتتەردى – رەد) اشىق ايىپتادىم. قۇجاتىمدى قولىما بەرگەنى راس. بۇل رەكتوراتتىڭ شەشىمى مە، جوق فاكۋلتەتتە شەشىلگەن شەشىم بە بىلمەيمىن. مەن قازىر ناقتى بىرەۋدى ايىپتاي المايمىن، – دەدى ول.

داستان قاستاي Facebook جەلىسىنە 7 قازاندا ءوزىنىڭ جۇمىستان قۋىلعانى تۋرالى جازعان جازباسىن ءوشىرىپ تاستادى.

ۇلتتىق ۋنيۆەرسيتەتتە جازۋشى كەمەل توقاەۆتىڭ اتىندا اۋديتوريا اشۋ ۇلكەن داۋ بولعان. الەۋمەتتىك جەلى قولدانۋشىلارىنىڭ ءبىر بولىگى بۇنى جاعىمپازدىققا بالاسا، ەندى ءبىرى وعان قارسى شىققان.

پرەزيدەنتتىڭ اكەسىن ۇلىقتاۋ بۇعان دەيىن باستالعان. 2 قازاندا الماتىدا كەمەل توقاەۆتىڭ 100 جىلدىعىنا وراي «قازاق دەتەكتيۆ جانرىنىڭ دارابوزى» اتتى حالىقارالىق عىلىمي-تاجىريبەلىك كونفەرەنتسيا وتكەن. وسى كۇنى جەتىسۋ وبلىسىنداعى ۇشتوبە قالاسىندا قازاق كۇرەسىنەن الەم كۋبوگى مەن بايگەدەن حالىقارالىق جارىس وتكىزىلىپ، اس بەرىلگەن. ساراپشىلار كەمەل توقاەۆتى ۇلىقتايتىن شارالاردىڭ كوبەيگەنىن «كۋلت جاساۋ» قايتا باستالدى دەپ باعالاعان.