Foto: kaznu.kz

Äl-Farabi atındağı Qazaq wlttıq universitetinde prezident Qasım-Jomart Toqaevtıñ äkesi Kemel Toqaevtıñ atında auditoriya aşılğannan keyingi daudan soñ oqu ornı basşılığı tarapınan mwğalimderge qısım jasalıp, jwmıstan quılğanı jöninde aqparat taradı. 7 qazanda jurnalistika fakul'tetiniñ wstazı Dastan Qastay Facebook jeldisine öziniñ sebepsiz qızmetten bosatılğanın jazdı. Äleumettik jelidegi daudan keyin mäselege Ğılım jäne joğarı bilim ministri Sayasat Nwrbek aralasıp, mwğalim jwmısında qalıp, rektor Janseyit Tüymebaev fakul'tet dekanınıñ mindetin atqarğan Mänşük Mwqaşevanı qızmetinen bosattı, -dep jazdı Masa Media.

9 qazanda Masa Media tilşisi Dastan Qastaydı ne sebepti jwmıstan şığarıp, qayta qabıldağanın bilu maqsatında universitetke bardı.

Oqu ornınıñ aqparat jäne kommunikaciyalar departamenti direktorınıñ orınbasarı Almat Isadil Dastan Qastaydıñ jwmıstan şığarılğanın äleumettik jeliden oqığanın aytıp, keyinnen Dastan Qastay jwmıstan şığarılmağan, universitette jwmısın istep jür, onı rastaytın eşqanday qwjat joq dep qarama-qayşı pikir bildirdi.

– Dastan Qastay osı universitettiñ oqıtuşısı retinde jwmıstan şığarılmağan. Qızmetin jalğastırıp jatır. Tüsinispeuşilik bolğan şığar. Ol qwjattıq jağınan rastalmağan, – dedi Almat Isadil.

Ol  Kemel Toqaevtıñ atında auditoriya aşudı kimderdiñ qarjılandırğanın, oğan kimderdiñ bastamaşı bolğanın da bilmeytinin ayttı. Jurnalister «Tük bilmeseñiz nege bizge pikir beruge şıqtıñız, biletin baspasöz hatşısı şıqsın» degen edi: «Sender hayp jasauğa wmıtılasıñdar» dep ketip qaldı.

– Bwl jerde universitettiñ bir tiın aqşası ketpedi. Ol bir adamnıñ qarjısına jasalğan närse emes. Auditoriyanı biz aşqan joqpız. Bwl qordıñ aqşası. Men onı bilmeymin. Ol meniñ qwzıretime kirmeydi. Men sender siyaqtı jurnalistpin. Sender hayp jasauğa wmıtılıp twrasıñdar. Men naqtı jauabımdı berip twrmın, – dedi Almat Isadil.

Jurnalistika fakul'tetiniñ dekanı Temirğali Köpbaev Dastan Qastaydıñ jwmıstan şığuın dekannıñ mindetin atqaruşı Mänşük Mwqaşevamen aradağı jeke bas arazdığı saldarınan bolğan oqiğa dep bağaladı. Onıñ sözinşe, rektor Janseyit Tüymebaev ol jöninde bilmegen.

– Dastan Qastaydıñ jwmıstan şığuına dekannıñ mindetin atqaruşı Mänşük Mwqaşeva men sonıñ janındağı bir-eki adamnıñ müddesi bolğan. Onı rektor bilmegen. Mänşük Mwqaşeva men Dastan Qastaydıñ arasında ereges bolğan. Ol bwğan deyin Dastan Qastayğa maqalaña soavtor etip qosasıñ degen. Dastan oğan könbegen. Söytip, Mänşük Mwqaşeva soñına şam alıp tüsken. Jwmıstan şığaru üşin qolınan kelgeniniñ barlığın istep, qolına qwjatın wstatqan. Onı joğarı basşılıq bilmegen. Bizde jwmıstan şığaratın rektor ğana. Mänşük Mwqaşeva osı mäsele boyınşa jwmıstan bosatıldı, – dedi Temirğali Köpbaev.

Temirğali Köpbaevtıñ sözinşe, Mänşük Mwqaşeva Dastan Qastaydı Facebook jelisinde rektor Janseyit Tüymebaevtıñ Azattıq radiosı tilşisiniñ mikrofonına jarmasıp, qarsı swraq qoyğanın «wnamsız jağday» dep bağalap, pikir jazğanın negiz etip qudalağan.

QazWU rektorı Janseyit Tüymebaevqa Kemel Toqaev auditoriyası aşılğan küni Azmattıq radiosınıñ jurnalisi swraq qoyğan. Ol şaranıñ eşqanday jağımpazdıq emes ekenin aytıp, tilşiniñ mikrofonın özine qaray iterip, qarsı swraq qoyğan. Oğan deyin universitet qızmetkerleri jurnalistiñ jwmısına kedergi keltirip, rektorğa swraq qoydırmay arı-beri jwlqılağan.

Masa Media tilşisi mäseleniñ män-jayın bilu maqsatında Mänşük Mwqaşevağa telefon soqtı. Biraq ol jauap beruden bas tartıp, twtqanı tastay saldı.

Temirğali Köpbaev auditoriyağa Kemel Toqaevtıñ atın beru jağımpazdıq dep eseptemeydi. Ol bwl bastama bir jıl bwrınğı josparğa engizilip qoyğanın ayttı. Biraq auditoriyağa jöndeu jwmıstarın kim qarjılandırğanın bilmeytinin mälimdedi.

– Kemel Toqaevtıñ auditoriyasın aşu turalı bir jıl bwrın josparlanıp qoyğan. Meniñ aldımdağı dekannıñ uaqıtında osınday mäsele köterilgen. Bizde qayratkerlerdiñ atına berilgen 10-15 auditoriya bar. Kimniñ bastaması bolğanın bilmeymin. Ol universitettiñ qarjısına jasalğan joq. Mısalğa, bizde tülekter qauımdastığı bar. Özimizdiñ jurnalistika fakul'tetin bitirgen käsipkerler bar. Solar kömektesken bolar. Men olardıñ kim ekenin bilmeymin. Ota jasap, auruhanada jatqanmın. Jwmısqa endi şıqtım, – dedi Temirğali Köpbaev.

Dastan Qastaydıñ özi bolğan mäselege baylanıstı bügin jinalıs ötkenin ayttı. Onıñ sözinşe, Kemel Toqaevtıñ auditoriyası aşılğannan keyin qısım küşeygen. Biraq ol özin ne sebepti jwmıstan şığarıp, qaytadan qabıldağanın äli bilmeytinin, ol aldağı uaqıtta tekseriletinin mälimdedi.

– Kemel Toqaevtıñ auditoriyası aşılğannan keyin bizge qısım bastaldı. Jazbamda men talap etu, bizdiñ is qağazdarımızdı berip jiberu degen (is-äreketterdi – red) aşıq ayıptadım. Qwjatımdı qolıma bergeni ras. Bwl rektorattıñ şeşimi me, joq fakul'tette şeşilgen şeşim be bilmeymin. Men qazir naqtı bireudi ayıptay almaymın, – dedi ol.

Dastan Qastay Facebook jelisine 7 qazanda öziniñ jwmıstan quılğanı turalı jazğan jazbasın öşirip tastadı.

Wlttıq universitette jazuşı Kemel Toqaevtıñ atında auditoriya aşu ülken dau bolğan. Äleumettik jeli qoldanuşılarınıñ bir böligi bwnı jağımpazdıqqa balasa, endi biri oğan qarsı şıqqan.

Prezidenttiñ äkesin wlıqtau bwğan deyin bastalğan. 2 qazanda Almatıda Kemel Toqaevtıñ 100 jıldığına oray «Qazaq detektiv janrınıñ darabozı» attı halıqaralıq ğılımi-täjiribelik konferenciya ötken. Osı küni Jetisu oblısındağı Üştöbe qalasında qazaq küresinen älem kubogı men bäygeden halıqaralıq jarıs ötkizilip, as berilgen. Sarapşılar Kemel Toqaevtı wlıqtaytın şaralardıñ köbeygenin «kul't jasau» qayta bastaldı dep bağalağan.