الەۋمەتتىك جەلىلەردىڭ دامۋىمەن ادامدار الەۋمەتتىك جەلىدە ءوز ءبىلىمىن اۋديتورياعا اقىلى تاۋار رەتىندە ساتا الاتىن بولدى. بۇل ءۇردىس ينفوبيزنەس دەپ اتالاتىن جاڭا ىسكەرلىك ءتۇرىن كەڭ تانىمال ەتتى. بۇل جاڭا جۇمىس ءتۇرى سوڭعى جىلدارى ەلىمىزدە دە قارقىندى دامىپ جاتقانى بەلگىلى. اس ازىرلەۋدى، ۆيدەو، اۋديو نەمەسە جازباشا كونتەنت دايىنداۋدى، ءتىپتى اۋديتورياعا ەركىن سويلەي ءبىلۋدى ۇيرەتەتىن ينفوبيزنەسمەندەر تابىستى بيزنەس وكىلدەرى ەسەپتەلە باستادى. بۇلاردىڭ قاتارىندا كوپشىلىك اۋديتورياعا پسيحولوگياعا قاتىستى كەڭەستەر بەرەتىن پسيحواناليتيك، پسيحولوگ نەمەسە موتيۆاتور سىندى ترەنتتىك ينفوبيزنەس تۇرلەرى دە بار. ادامنىڭ جاندۇنيەسى، وتباسىلىق ماسەلەلەر، ادامدار ارا قارىم-قاتىناس سەكىلدى اسا نازىك تاقىرىپتاردى قوزعايتىن بۇنداي ينفوبيزنەس وكىلدەرىنىڭ كاسىبي بىلىكتىلىگىنە قاتىستى داۋلى پىكىرتالاستار دا كوپ، سوعان قاراماستان كەڭ اۋديتورياعا يە.

ادەتتە اتالمىش پسيحواناليتيكتەر، پسيحولوگ، موتيۆاتورلار دەرلىكتەي وزىنەن كەڭەس سۇراعان جەكە تۇلعالارعا مەديتاتسيا تۋرالى كوبىرەك دارىپتەپ جاتادى. مەديتاتسيا بىلايعى كەزدە جەكە تۇلعانىڭ پسيحيكاسىنا ەلەۋلى كومەك بەرەتىن داعدى رەتىندە قاراستىرىلىپ كەلەدى. ايتالىق، مەديتاتسيا جاساۋ ارقىلى ادام سابىرلى بولۋعا، كونتسەنتراتسياسىن نىعايتۋعا، ەستە ساقتاۋ قابىلەتىن جاقسارتۋعا، يكەمدى ويلاۋعا داعدىلاندىراتىنى ايتىلادى. ارينە، دۇرىس جاسالعان مەديتاتسيا ادامداردىڭ پسيحولوگيالىق كۇيىن تۇراقتاندىرۋعا كومەگىنىڭ بولاتىنىن تاجريبەلەر كورسەتكەن. الايدا، سوڭعى زەرتتەۋلەر ناتيجەسىندە مەديتاتسيامەن اينالىسۋ بىرتىندەپ ادامداردىڭ وزىمشىلدىگى مەن ەگويستىك سيپاتىن كۇشەيتىپ جىبەرۋى مۇمكىن ەكەنى دالەلدەندى.

مەديتاتسيا سىندى كوڭىل-كۇيدى تىنىشتاندىراتىن جاتتىعۋلار ادامدارعا كوپتەگەن پايدالى مۇمكىندىكتەرمەن قاتارى، سالماقتى زيانداردى دا الا كەلەدى. نيۋ-يورك مەملەكەتتىك ۋنيۆەرسيتەتىنىڭ پسيحولوگيا بويىنششا دوتسەنتى مايكل پۋل جۇرگىزدى زەرتتەۋ ناتيجەسىنە وسىعان تۇراقتاعان. بىلايشا ايتقاندا، مەديتاتسيا ادامدى ءوزىنىڭ ىشكى كوڭىل-كۇيىمەن كوبىرەك الاڭداتىپ، اينالاسىنداعى ادامداردىڭ قالاۋى، ولاردىڭ كوڭىل-كۇيى تۋرالى ويلانۋعا كوڭىل بۇرمايتىن ەتەدى. مايكل پۋل ءوز زەرتتەۋىن ەس جيناۋ ءۇشىن ۇدايى مەديتاتسيامەن اينالىسقان كوپتەگەن ادامداردىڭ ومىرلىك ۇستانىمدارى، قۇندىلىقتارى جانە مادەني كونتەكستىندەگى بايلانىستاردى سالىستىرۋ ارقىلى جۇرگىزگەن.

مايكل پۋل ءوز زەرتتەۋىندەگى 366 ادامنىڭ وزدەرىن سيپاتتاۋىن «ءوزارا تاۋەلدى كوزقاراستاعى» جانە «دەربەس كوزقاراستاعى» سيپاتتاۋ دەپ ەكىگى جىكتەي وتىرىپ جۇرگىزەدى. الدىنعىلار ءوزىن سيپاتتاپ بەرۋ تۋرالى تاپسىرما بەرىلسە «ەكى بالانىڭ اكەسىمىن»، «وتباسىلى اداممىن»، «التى بالانىڭ اتاسى/ اجەسىمىن» دەگەن سەكىلدى قانداي دا ءبىر تۇلعالارعا بايلانىستى سيپاتتايدى. ال «دەربەس كوزقاراستاعىلار» كوبىنە ءوزىنىڭ جەتىستىگىن، ءبىلىم دەڭگەيىن كوبىرەك ءسوز ەتەدى. ال، وسى توپتىڭ بىرىنە تەرەڭ مەديتاتسيا تاپسىرماسى، ەكىنشىسىنە جاي دەمالىس تاپسىرماسى بەرىلگەن. كەيىننەن وسى تۇلعالاردىڭ قوعامدىق ءىس-قيمىلدارعا، قيىنشىلىعى بارلارعا كومەك بەرۋگە دەگەن ىنتا-جىگەرلەرىن انىقتايتىن ساۋالناما بەرىلگەن. ناتيجەسىندە مەديتاتسيانىڭ ەففەكتى بىرتىندەپ ادامداردىڭ وزىمشىلىدىگىن كۇشەيتەتىنىن كورسەتكەن.

ارينە، بۇل كەلتىرىلگەن دايەك مەديتاتسيانى تولىقتاي تەرىسكە شىعارمايدى. دەگەنمەن، قازىر الەۋمەت پەن ينديۆيد اراسىندا كوپتەگەن داۋلى ماسەلەلەردىڭ ءبىزدىڭ قوعامداعى كەيبىر تۇتاس الەۋمەتتىك تاقىرىپتاردىڭ تامىرى ەكەنى انىق. گلوباليزاتسيا، اشىق قوعام، ءسوز ەركىندىگى مەن دەموكراتيا قۇندىلىقتارىنا قوسا ءتۇرلى اعىمدار، كوزقاراستار ءبىزدىڭ قوعامدا ءداستۇر مەن ءتۇرلى جاڭا داعدىلار ورتاسىنداعى ۇلكەن كۇرەستەرگە جول اشتى. ارينە، مەملەكەتتىك يدەولوگيانىڭ السىزدىگى مەن الەۋمەتتىك ساۋاتتىلىق دەڭگەينە بايلانىستى ءبىزدىڭ قوعامدا ءداستۇرلى دۇنيەتانىمدار مەن تاجىريبەلەر كوپ جاعدايدا جاڭاشلىق كوزقاراستارعا جول بەرىپ جاتقانى دا بايقالادى. بۇل تولىقتاي ءداستۇرلى كوزقاراستى عانا بىرجاقتىلى جاقتاۋ ەمەس، سونىڭ وزىندە تۇتاس قوعامدا ۇزاق مەرزىمدى ءداستۇردىڭ، ءداستۇرلى دۇنيەتانىم مەن پايىمنىڭ قۇلاتىلۋى مىڭداعان مارگينالدى توپتاردى قالىپتاستىرىپ، ناتيجەسىن تۇراقتىلىققا، ءوزارا جاراسىمدى ءومىر سالتتارىنا قاۋىپ توندىرەرى انىق.

مۇرات التىناي

The Qazaq Times