Äleumettik jelilerdiñ damuımen adamdar äleumettik jelide öz bilimin auditoriyağa aqılı tauar retinde sata alatın boldı. Bwl ürdis infobiznes dep atalatın jaña iskerlik türin keñ tanımal etti. Bwl jaña jwmıs türi soñğı jıldarı elimizde de qarqındı damıp jatqanı belgili. As äzirleudi, video, audio nemese jazbaşa kontent dayındaudı, tipti auditoriyağa erkin söyley biludi üyretetin infobiznesmender tabıstı biznes ökilderi eseptele bastadı. Bwlardıñ qatarında köpşilik auditoriyağa psihologiyağa qatıstı keñester beretin psihoanalitik, psiholog nemese motivator sındı trenttik infobiznes türleri de bar. Adamnıñ jandüniesi, otbasılıq mäseleler, adamdar ara qarım-qatınas sekildi asa näzik taqırıptardı qozğaytın bwnday infobiznes ökilderiniñ käsibi biliktiligine qatıstı daulı pikirtalastar da köp, soğan qaramastan keñ auditoriyağa ie.

Ädette atalmış psihoanalitikter, psiholog, motivatorlar derliktey özinen keñes swrağan jeke twlğalarğa meditaciya turalı köbirek däriptep jatadı. Meditaciya bılayğı kezde jeke twlğanıñ psihikasına eleuli kömek beretin dağdı retinde qarastırılıp keledi. Aytalıq, meditaciya jasau arqılı adam sabırlı boluğa, koncentraciyasın nığaytuğa, este saqtau qabiletin jaqsartuğa, ikemdi oylauğa dağdılandıratını aytıladı. Ärine, dwrıs jasalğan meditaciya adamdardıñ psihologiyalıq küyin twraqtandıruğa kömeginiñ bolatının täjribeler körsetken. Alayda, soñğı zertteuler nätijesinde meditaciyamen aynalısu birtindep adamdardıñ özimşildigi men egoistik sipatın küşeytip jiberui mümkin ekeni däleldendi.

Meditaciya sındı köñil-küydi tınıştandıratın jattığular adamdarğa köptegen paydalı mümkindiktermen qatarı, salmaqtı ziyandardı da ala keledi. N'yu-York Memlekettik universitetiniñ psihologiya boyınşa docenti Maykl Pul jürgizdi zertteu nätijesine osığan twraqtağan. Bılayşa aytqanda, meditaciya adamdı öziniñ işki köñil-küyimen köbirek alañdatıp, aynalasındağı adamdardıñ qalauı, olardıñ köñil-küyi turalı oylanuğa köñil bwrmaytın etedi. Maykl Pul öz zertteuin es jinau üşin wdayı meditaciyamen aynalısqan köptegen adamdardıñ ömirlik wstanımdarı, qwndılıqtarı jäne mädeni kontekstindegi baylanıstardı salıstıru arqılı jürgizgen.

Maykl Pul öz zertteuindegi 366 adamnıñ özderin sipattauın «özara täueldi közqarastağı» jäne «derbes közqarastağı» sipattau dep ekigi jiktey otırıp jürgizedi. Aldınğılar özin sipattap beru turalı tapsırma berilse «eki balanıñ äkesimin», «otbasılı adammın», «altı balanıñ atası/ äjesimin» degen sekildi qanday da bir twlğalarğa baylanıstı sipattaydı. Al «derbes közqarastağılar» köbine öziniñ jetistigin, bilim deñgeyin köbirek söz etedi. Al, osı toptıñ birine tereñ meditaciya tapsırması, ekinşisine jay demalıs tapsırması berilgen. Keyinnen osı twlğalardıñ qoğamdıq is-qimıldarğa, qiınşılığı barlarğa kömek beruge degen ınta-jigerlerin anıqtaytın saualnama berilgen. Nätijesinde meditaciyanıñ effekti birtindep adamdardıñ özimşilidigin küşeytetinin körsetken.

Ärine, bwl keltirilgen däyek meditaciyanı tolıqtay teriske şığarmaydı. Degenmen, qazir äleumet pen individ arasında köptegen daulı mäselelerdiñ bizdiñ qoğamdağı keybir twtas äleumettik taqırıptardıñ tamırı ekeni anıq. Globalizaciya, aşıq qoğam, söz erkindigi men demokratiya qwndılıqtarına qosa türli ağımdar, közqarastar bizdiñ qoğamda dästür men türli jaña dağdılar ortasındağı ülken küresterge jol aştı. Ärine, memlekettik ideologiyanıñ älsizdigi men äleumettik sauattılıq deñgeyne baylanıstı bizdiñ qoğamda dästürli dünietanımdar men täjiribeler köp jağdayda jañaşlıq közqarastarğa jol berip jatqanı da bayqaladı. Bwl tolıqtay dästürli közqarastı ğana birjaqtılı jaqtau emes, sonıñ özinde twtas qoğamda wzaq merzimdi dästürdiñ, dästürli dünietanım men payımnıñ qwlatıluı mıñdağan marginaldı toptardı qalıptastırıp, nätijesin twraqtılıqqa, özara jarasımdı ömir salttarına qauip töndireri anıq.

Mwrat Altınay

The Qazaq Times