رەسەي ۋكرايناعا اۋقىمدى اسكەري كۇشپەن باسىپ كىرگەن كەزدە كەيبىر ساراپشىلار كيەۆتى دە باسىپ الۋى مۇمكىن ەكەنىن بولجاعان. الايدا، ۋكراينا ارمياسى، ۇكىمەتى مەن حالقى بار كۇشىمەن تۇرىستىق بەردى. بۇعان باتىستىق اۋقىمدى اسكەري جانە قارجىلىق قولداۋ قوسىلىپ، باسىپ كىرۋشى رەسەي قازىر سوعىستاعى ىرىقسىز پوزيتسياعا تۇسە باستادى. ءتىپتى، سوعىس مايدانىنداعى وزگەرىستەردى، رەسەيدىڭ اسكەري شىعىنىن شامالاعان باتىستىق زەررتەۋ ورتالىقتارى ۋكرايناداعى سوعىستا رەسەي جەڭىلىپ قالۋى بەك مۇمكىن دەگەن بولجامدار ايتا باستادى.

ەستەرىڭىزدە بولسا، 9 مامىردان بۇرىن بىرقاتار ساراپشىلار رەسەي پرەزيدەنتى پۋتين جەڭىس كۇنىنە وراي ۋكرايناعا قارسى رەسمي تۇردە سوعىس اشىپ، موبيليزاتسيانى باستايدى دەپ بولجاعان. بىراق، قىزىل الاڭدا اسكەري پاراد وتكەن كۇنى ونداي بولدمادى، ال قازىر رەسەيدە قۇپيا تۇردە رەزەرۆتەگى اسكەرلەردى شاقىرىپ، جارياسىز موبيليزاتسيا بولىپ جاتىر دەگەن مالىمەتتەر شىعا باستادى.

قازىرگى جاعدايدا رەسەيدە ەكى جول قالدى: ءبىرى – جەڭىلۋ، ءبىرى – موبيليزاتسيا. بۇنداي پىكىردى ايتقان پولشاداعى Rochan اناليتيكالىق ورتالىعىنىڭ باسشىسى كونارد مۋزىكا. ول «رەيتەرگە» بەرگەن جاۋابىندا رەسەيدىڭ دونباسس ايماعىندا كوپ سانداعى اسكەرلەر مەن اسكەري تەحنيكالارىن جوعالتقانىن، ونىڭ ورنىن تولتىرۋ قيىنعا تۇسەتىنىن ايتقان. جەڭىلۋ مەن موبيليزاتسيادان باسقا نۇسانىڭ بولۋى ەكىتالاي ەكەنىن دە ايتادى مۋزىكا.

سوعىستىڭ باس شەنىندە «انە-مىنە كيەۆتى الامىز» دەسكەن رەسەي ارمياسىنىڭ قازىر دونباسس ايماعىن تولىق باسىپ الۋىنىڭ ءوزى كۇمان تۋدىرا باستادى. بۇدان بىرەر كۇن بۇرىن رەسەي كۇشتەرى حاركوۆتى دە تاستاپ، بار كۇشىن دون الابىنا شوعىرلاندىردى. سوعان قاراماستان CNA  رەسەيدى زەرتتەۋ ينستيتۋتىنىڭ  ديرەكتورى مايكل كوفمان رەسەيدىڭ ماقساتىنا جەتۋىنە ۇلكەن كۇمانمەن قارايدى. «رەسەي كۇشتەرى ابدەن السىرەدى، رۋحى ابدەن سىندى، وفيتسەرلەردىڭ شابۋىلدى جالعاستىرۋعا قۇلقى جوق، ال ساياسي جەتەكشىلەر بولسا ستراتەگيالىق جەڭىلىستىڭ جاقىنداعانىن سەزسە دە سىر بەرمەگەن بولىپ تۇر»، – دەيدى كوفمان «رەيتەرگە» بەرگەن جاۋابىندا.

رەسەي قورعانىس مينيسترلىگى ءار كۇنى ۋكراينالىق اسكەري نىسانداردى، تەحنيكالاردى جويىپ جاتقانىن مالىمدەپ كەلەدى. كرەمل بولسا ءبارى جوسپارداعىداي جۇزەگە اسىپ جاتىر دەپ قايتالايدى. بىراق، سوعىس مايدانىنداعى ناتيجەلەرى كەرى كەتىپ جاتقانى اقپارات قۇرالدارىنداعى مالىمەتتەردى سالىستىرۋدان-اق بايقالادى.

ۋكراينا كۇشتەرىنىڭ تاكتيكالىق ءتاسىلى «الدىمەن ارتقى شەبىن كۇيرەتۋ» بولىپ جاتقانداي. كيەۆكە شابۋىل قويىپ جاتقاندا دا ۋكراينا كۇشتەرى رەسەيلىكتەردىڭ ارتقى شەبىنە، لوگيستيكالىق قولداۋ مۇمكىندىكتەرىنە شابۋىل جاساپ، تۇتاس وڭتۇستىكتەگى رەسەي كۇشتەرىنىڭ قوزعالىس جوسپارنى بۇزىپ تاستادى. بۇل كيەۆ ىرگەسىندە رەسەيلكىتەردىڭ وڭباي سوققى الۋىنا سەبەپ بولدى. قازىرگى دونباستاعى جاعدايدا وسىعان ۇقساس، «Z» تاڭباسى بار كوممنيكاتسيا مەن لوگيستيكالىق قولداۋ قۇرىلعىلارى وڭباي تالقاندالۋدا. وسىنىڭ بارىنەن قاراعاندا دونباسس ايماعىندا رەسەيدىڭ شىعىنى ارتا ءتۇستى.

دەمەك، رەسەي ستراتەگيالىق جەڭىلىسكە ۇشىراۋى مۇمكنى ەكەنىن انىق سەزىپ تۇر. ISW سەكىلدى سوعىستىڭ بارىسىن قالت جىبەرمەي قاداعالاپ وتىرعان زەرتتەۋ ورتالىقتارى دا رەسەي شىعىندارىنىڭ سوڭى جەڭىلىسكە الىپ كەلەتىنىن بولجايدى. بىراق، جەڭىلىستى قابىلداي المايتىن كرەمل مىنەزى ەندىگى جەردە موبيليزاتسياعا كۇش سالۋى مۇمكىن، ونىڭ وزىندە،  سوعىس مايدانىنا تەك تاجىريبەلى ادامداردى عانا تارتۋعا كۇش سالارى دا بەلگىلى. بىراق، ۋاقىت وتكەن سايىن رەسەي ارمياسىنىڭ ىشكى دە، سىرتقى دا جاعدايى قيىنداپ بارادى، ءتىپتى جاڭا سوعىس قۇرالدارى دا ازايىپ جاتىر، ۋكراينا ارمياسىندا بولسا بۇنىڭ كەرىسىنشە، تولاسسىز اسكەري كومەك ورنىن تولتىرىپ جاتىر. وسىنىڭ بارىنەن قاراعاندا پۋتين قۇردان قۇر ۋاقىت سوزىپ جاتقانداي.

The Qazaq Times