جانجالدى باسەڭدەتۋدىڭ سوڭعى ارەكەتى: بايدەن مەن پۋتين سويلەستى

رەسەي مەن باتىس اراقاتىناسى شيەلەنىستى كۇيدە تۇر. ۋكراينا رەسميلەرىنىڭ مالىمەتىنشە، شىعىس شەكاراسىنا جاقىن رەسەيدىڭ 100 مىڭعا جۋىق اسكەرى توپتالىپ تۇر. كوپتەگەن باتىس ەلدەرى، سونىڭ ىشىندە ناتو مۇشەلەرى رەسەي ۇيىمعا ۇمىتكەر ۋكرايناعا اۋقىمدى باسىپ الۋ شابۋىلىن جاسايدى دەپ الاڭدايدى. بىراق، قازىرگى شيەلەنىستىڭ اۋقىمدىلىعىنان ماسەلە ءبىر عانا ۋكرايناعا عانا تىرەلىپ تۇرماعانىن كورسەك بولادى.

بۇدان بۇرىن ماسەلەنى الدىن-الا تالقىلاۋ ءۇشىن بايدەن مەن پۋتين ونلاين جۇزدەسكەن ەدى. الايدا، بۇل جەتكىلىكتى بولماعانداي، كەشە رەسەي مەن اقش پرەزيدەنتتى ءبىر ساعاتتان استام ۋاقىت تەلەفون ارقىلى سويلەسىپ، تاعىدا قايشىلىقتى قاقتىعىسسىز شەشۋگە بولاتىن، بولمايتىنىن تالقىلادى. كەيبىر اقپارات قۇرالدارى، سونىڭ ىشىندە BBC دە بۇنى جانجالدى باسۋ ءۇشىن جاسالعان سوڭعى ارەكەت دەپ تە باعالاپ وتىر. ايتپاقشى، كەزەكتى تەلەفون ديالوگى ماسكەۋدىڭ ۇسىنىسىمەن بولعانىن دا ايتا كەتەلىك.

سويلەسۋ كەزىندە پۋتين امەريكالىق ارىپتەسىنە ۋكراينا ماسەلەسى بويىنشا جاڭا سانكتسيالاردى كىرگىزۋ مامىلەلەردىڭ تولىعىمەن بۇزىلۋىنا الىپ كەلەتىنىن ەسكەرتكەن. ءتىپتى، كرەمل باسشىسى سانكتسيا كىرگىزۋدى «ۇلكەن قاتەلىك» دەپ باعالاعان.

بايدەن دە ءوز كەزەگىندە قۇراما شتاتتار مەن ونىڭ سەرىكتەرى ۋكرايناعا اۋقىمدى باسىپ الۋ ارەكەتى بولعان جاعدايدا قاتاڭ تۇردە جاۋاپ قايتاراتىنىن ايتتى.

بىلايشا ايتقاندا، سويلەسۋ كەزىندە ەكى ليدەر دە ءبىر-بىرىنە ەسكەرتۋلەر جاساعان. بىراق، ءپۋتيننىڭ سىرتقى ساياسات بويىنشا كەڭەسشىسى يۋري ۋشاكوۆ رەسەي پرەزيدەنتىنىڭ كەزەكتى سويلەسۋدىڭ ناتيجەسىنە «رازىشىلىق» بىلدىرگەنىن ايتىپتى. ونىڭ ايتۋىنشا بۇل سويلەسۋ الداعى كەلىسسوزدەرگە قولايلى شارت دايىنداپ بەرگەن ەكەن.

ديالوگتىڭ تولىق نۇسقاسى اقپارات قۇرالدارىنا بىردەي قولجەتىمدى بولماسى انىق، دەگەنمەن اق ءۇي تارابى كرەملدەن كورى بۇنداي مالىمەتتەردە «جومارتتىق» تانىتادى. اق ءۇي ءباسپاسوز وكىلى جەن پساكي سوزىندە: «پرەزيدەنت بايدەن بۇنداي ديالوگتارداعى ماڭىزدى ىلگەرىلەۋشىلىك تەك قايشىلىق باسەڭدەگەندە عانا بولاتىنىن ايتتى... ال، رەسەي ۋكرايناعا ودان ارى كىرىپ بارا جاتقان بولسا، اقش سەرىكتەرىمەن بىرگە قاتاڭ جاۋاپ قايتارعالى وتىرعانىن اشىق ايتتى»، – دەدى.

رەسەي ءوزىنىڭ توپتالىپ تۇرعان ارمياسى تۋرالى بەرگەن تۇسىنىكتەرىندە ۋكراينانى باسىپ الۋ جوسپارىنىڭ جوق ەكەنىن قايتالاپ كەلەدى. ماسكەۋدىڭ مالىمدەۋىنشە ولار قالىپتى اسكەري جاتتىعۋ ارەكەتتەرىمەن اينالىسۋدا، ءارى ءوز اسكەرى ءوز شەكاراسىندا قانداي ارەكەت جاساۋعا ەرىكتى ەكەنىن قوسىمشالايدى.

تاراپتار 10 قاڭتاردان باستاپ جەنەۆادا بەتپە-بەت كەلىسسوزگە وتىرادى. بۇل كەلىسسوز رەسەي-اقش، ناتو-رەسەي، رەسەي-ەىقۇ اراسىندا بولەك-بولەك وتەدى. قازىر، كوپتەگەن ەلدىڭ اقپارات قۇرالدارى «رەسەي-ۋكراينا اراسىندا سوعىس بولا ما؟» دەگەن سۇراق توڭىرەگىندە تالقى بولىپ جاتىر. بۇنىڭ جاۋابى دا اتالعان كەلىسسوزدەر بەلگىلەگەلى تۇر. رەسەي مەن باتىس قانداي دا ءبىر كەلىسىمگە كەلە العان بولسا قاقتىعىستىڭ اۋىلى الىستاماق. دەگەنمەن، ءبىز سوڭعى كەزدە كرەمل ساياساتىنىڭ بارىنشا اگرەسسيۆتى ءتۇس العانىن كورىپ وتىرمىز.

The Qazaq Times