Bayden men Putin telefon arqılı söylesti. Foto: WIS TV

Resey men Batıs araqatınası şielenisti küyde twr. Ukraina resmileriniñ mälimetinşe, şığıs şekarasına jaqın Reseydiñ 100 mıñğa juıq äskeri toptalıp twr. Köptegen Batıs elderi, sonıñ işinde NATO müşeleri Resey wyımğa ümitker Ukrainağa auqımdı basıp alu şabuılın jasaydı dep alañdaydı. Biraq, qazirgi şielenistiñ auqımdılığınan mäsele bir ğana Ukrainağa ğana tirelip twrmağanın körsek boladı.

Bwdan bwrın mäseleni aldın-ala talqılau üşin Bayden men Putin onlayn jüzdesken edi. Alayda, bwl jetkilikti bolmağanday, keşe Resey men AQŞ prezidentti bir sağattan astam uaqıt telefon arqılı söylesip, tağıda qayşılıqtı qaqtığıssız şeşuge bolatın, bolmaytının talqıladı. Keybir aqparat qwraldarı, sonıñ işinde BBC de bwnı janjaldı basu üşin jasalğan soñğı äreket dep te bağalap otır. Aytpaqşı, kezekti telefon dialogı Mäskeudiñ wsınısımen bolğanın da ayta ketelik.

Söylesu kezinde Putin amerikalıq äriptesine Ukraina mäselesi boyınşa jaña sankciyalardı kirgizu mämilelerdiñ tolığımen bwzıluına alıp keletinin eskertken. Tipti, Kreml' basşısı sankciya kirgizudi «ülken qatelik» dep bağalağan.

Bayden de öz kezeginde Qwrama Ştattar men onıñ serikteri Ukrainağa auqımdı basıp alu äreketi bolğan jağdayda qatañ türde jauap qaytaratının ayttı.

Bılayşa aytqanda, söylesu kezinde eki lider de bir-birine eskertuler jasağan. Biraq, Putinniñ sırtqı sayasat boyınşa keñesşisi YUriy Uşakov Resey prezidentiniñ kezekti söylesudiñ nätijesine «razışılıq» bildirgenin aytıptı. Onıñ aytuınşa bwl söylesu aldağı kelissözderge qolaylı şart dayındap bergen eken.

Dialogtıñ tolıq nwsqası aqparat qwraldarına birdey qoljetimdi bolması anıq, degenmen Aq üy tarabı Kreml'den köri bwnday mälimetterde «jomarttıq» tanıtadı. Aq üy baspasöz ökili Jen Psaki sözinde: «Prezident Bayden bwnday dialogtardağı mañızdı ilgerileuşilik tek qayşılıq bäseñdegende ğana bolatının ayttı... Al, Resey Ukrainağa odan arı kirip bara jatqan bolsa, AQŞ serikterimen birge qatañ jauap qaytarğalı otırğanın aşıq ayttı», – dedi.

Resey öziniñ toptalıp twrğan armiyası turalı bergen tüsinikterinde Ukrainanı basıp alu josparınıñ joq ekenin qaytalap keledi. Mäskeudiñ mälimdeuinşe olar qalıptı äskeri jattığu äreketterimen aynalısuda, äri öz äskeri öz şekarasında qanday äreket jasauğa erikti ekenin qosımşalaydı.

Taraptar 10 qañtardan bastap Jenevada betpe-bet kelissözge otıradı. Bwl kelissöz Resey-AQŞ, NATO-Resey, Resey-EIQW arasında bölek-bölek ötedi. Qazir, köptegen eldiñ aqparat qwraldarı «Resey-Ukraina arasında soğıs bola ma?» degen swraq töñireginde talqı bolıp jatır. Bwnıñ jauabı da atalğan kelissözder belgilegeli twr. Resey men Batıs qanday da bir kelisimge kele alğan bolsa qaqtığıstıñ auılı alıstamaq. Degenmen, biz soñğı kezde Kreml' sayasatınıñ barınşa agressivti tüs alğanın körip otırmız.

The Qazaq Times