ەو: قازىرگى ەڭ قاۋىپتى ماسەلە – رەسەيدىڭ اسكەري ارەكەتى

«وتتىڭ تۇتانىپ كەتۋىنە ءبىر تال سىرىڭكە دە جەتەدى». باتىس ەلدەرىنىڭ ساراپشىلارى رەسەي-ەو اراسىنداعى قازىرگى قايشىلىقتى وسىلاي باعالاپ وتىر. وسى اپتانىڭ باسىندا ەۋروپا وداعىنا مۇشە ەلدەردىڭ ءسىم جەتەكشىلەرى جولىعىپ، رەسەيدىڭ اسكەري ارەكەتتەرىن تالقىلادى. جيىن قورىتىندىسى بويىنشا، وداق ءۇشىن قازىرگى ەڭ قاۋىپتى ماسەلە رەسەيدىڭ اسكەري ارەكەتتەرى دەپ تاپتى. وسىلايشا، ەۋروپا وداعى مەن رەسەي اراسىنداعى شيەلەنىس كۇن وتكەن سايىن تەرەڭدەي ءتۇستى.

ەو سىرتقى ساياسات بويىنشا جونىندەگى وكىلى جوزەف بوررەلل باسپاسوزگە بەرگەن مالىمەتىندە رەسەيدىڭ ۋكراينا شەكاراسى مەن قىرىمداعى اسكەرلەرىنىڭ سانى 100 مىڭنان اسقانىن ايتقان. بىراق، باتىستىڭ كەيبىر اقپارات قۇرالدارى بوررەللدىڭ بۇل مالىمدەمەسىنە كۇمانمەن قارايدى.

بۇعان دەيىن قىرىم مەن ۋكراينا شەكاراسىندا رەسەيلىك 80 مىڭ شاماسىنداعى اسكەر بارى ايتىلىپ كەلگەن. ەكى كۇن بۇرىن ۋكراينانىڭ شىعىس شەكاراسىنا بارعان BBC تىلشىلەرى دە ايماقتا كىسى قورقارلىق قاقتىعىستىڭ اۋانى بايقالمايتىنىن ايتقان. ولاردىڭ حابارىنا قاراعاندا، بەس-التى جىلدان بەرى رەسەيشىل سەپاراتيستەرمەن قاقتىعىس اۋىق-اۋىق بولىپ تۇرعان ايماق سول كۇيىندە، تەك رەسەي جاق شەكارادا اسكەري تەحنيكالاردىڭ كوبەيگەنى انىق بايقالادى.

رەسەيدىڭ اسكەري بەلسەندىلىگىنە قارسى ۋكراين اسكەريلەرى دە ءوز دايارلىعىن جاساۋدا. رەسەيدىڭ شىنىندا شەكارادان باسىپ كىرەتىن-كىرمەيتىنى انىق ەمەس، دەگەنمەن ۋكراين اسكەرلەرى تاباندى قارسىلىققا دايىن ەكەنىن بايقاتۋدا.

تاۋەلسىز ساراپشىلار دا رەسەيدىڭ سوعىس باستاۋعا نيەتىنىڭ جوق ەكەنىن ايتادى. بار بولعانى رەسەي وزىنە باعىتتالعان قىسىمدار تۇسىندا اسكەري ايبار كورسەتىپ، ۇپايىن اسىرعىسى كەلەدى دەپ سانايدى. بۇعان قوسا ۋكراينا ءۇشىن ناتو-نىڭ قانشالىقتى قورعاۋشى بولا الاتىنىن كورسەتكىسى كەلەتىنىن اڭعارۋعا بولادى.

“The Qazaq Times”