كورنەكى سۋرەت. فوتو: Nur.kz / پەتر كارانداشوۆ

رەسمي مالىمەتكە قاراعاندا، ناۋرىز ايىندا قازاقستاندا COVID (كوروناۆيرۋس پەن ونىڭ پنەۆمونياسىن قوسا العاندا) دەرتىنەن سىرقاتتانعان 35 مىڭداي ناۋقاس جانە 366 ءولىم جاعدايى تىركەلگەن.

تاراتىپ ايتساق، كوروناۆيرۋس (U07.1 نەمەسە كۆي+)  جۇققان 33 423 جانە پنەۆمونياعا (U07.2 نەمەسە كۆي-) شالدىققان 1388 ادام انىقتالدى. سونىمەن بىرگە، كوروناۆيرۋستان 300 ادام، پنەۆمونيادان 66 قايتىس بولدى.

كوكتەمگى قارقىن قايتا ەكپىن الا باستادى. وتكەن قىستىڭ ءۇش ايىندا (بىلتىرعى جەلتوقسان ايىندا جانە بيىلعى قاڭتار-اقپان ايلارىندا) 88 مىڭ ادام اۋىرىپ، 900-دەن اسا پاتسيەنت كوز جۇمدى. توقسان كۇنگە سوزىلعان قىس مەزگىلىندەگى اۋىرعانداردىڭ 81 مىڭنان استامى كوروناۆيرۋس، قالعان 6,8 مىڭى پنەۆمونيا پاتسيەنتتەرى.

ءبىر ايدا الماتىدا 9,6 مىڭنان اسا ناۋقاس تىركەلىپ ۇلگەردى. قالادا ناۋرىز ايىنىڭ العاشقى دەكاداسىندا تاۋلىگىنە جۇزدەن كەم ەمەس جاعداي تىركەلدى، 10-ىنان بەرى بۇل سان ەسەلەپ ءوستى. ەلدە قاڭتار ايىنىڭ ەكىنشى جارتىسىندا جانە اقپان ايىنىڭ العاشقى جارتىسىندا، ناۋرىزدا ناۋقاستار قاتارى كۇرت كوبەيگەن.

سونداي-اق، سىرقاتتار كوبەيگەن ايماقتار قاتارىندا استانا (6074) جانە الماتى (3090), قاراعاندى (2401), بقو (2161), اقمولا (1785), پاۆلودار (1605), اتىراۋ (1564), قوستاناي (1512) وبلىستارى بار. وسى سەبەپتى استانا مەن الماتىدا كارانتين شاراسى كۇشەيتىلىپ، ءۇش اپتادان بەرى «قىزىل ايماقتا» تۇر.

ناۋرىز ايىنىڭ باسىندا ەپيداحۋال كۇردەلە باستاعاننان-اق كەيبىر ساراپشىلار حالىقارالىق اۋە رەيستەرىن ءجيى قابىلدايتىن الماتى قالاسىنا شەتەلدەن جاڭا شتامم كەلگەن بولۋى مۇمكىن دەپ بولجاعان ەدى. سۇراق كوبەيگەننەن كەيىن مينيستر الەكسەي تسوي مەن قالانىڭ باس سانيتارى جانداربەك بەكشين گەنومدىق زەرتتەۋ ناتيجەسىندە بريتاندىق جانە وڭتۇستىكافريكالىق شتامدار ناقتى تىركەلگەنىن مالىمدەگەن. كەيىننەن شەتەلدىك شتامدار ەلدىڭ 13 ايماعىنان انىقتالعانى ايتىلدى.

ۇكىمەت دەرەگىنە سۇيەنسەك، بيىل ناۋرىز ايىندا ءولىم كورسەتكىشى دە ەلەۋلى دەڭگەيدە وسكەن. 1-ءى مەن 31-ءى ارالىعىندا 366 ادام (كۆي+ 300, كۆي- 66) كوز جۇمعان.

بىلتىر جەلتوقساندا باس سانيتار ەرلان قياسوۆ كەزەكتى تولقىنىنىڭ شارىقتاۋ كەزەڭى قاڭتار-اقپان ايلارىنا، ال مينيستر الەكسەي تسوي ناۋرىز ايىنىڭ سوڭىنا قاراي تۇسپا-تۇس كەلەتىنىن مالىمدەگەن. اقپان ايىنىڭ باسىندا دەنساۋلىق ساقتاۋ ۆيتسە-ءمينيسترى مارات شورانوۆ ءساۋىر ايىندا 20 مىڭعا تارتا ادام دەرت جۇقتىرۋى مۇمكىن دەگەن. ناۋرىزدىڭ ورتاسىندا مينيستر ءساۋىر ايىندا تاۋلىگىنە 500 بەن 1,7 مىڭ ارالىعىندا ناۋقاس تىركەلەدى دەپ بولجاعان. ول وسى اپتانىڭ بەيسەنبىسىندە بولجامىن وزگەرتىپ, الداعى ءۇش اي بويى كۇنىنە 1,5-4 مىڭ سىرقات تىركەلۋى ىقتيمال دەدى.

سونىمەن قوسا، اپتا باسىندا سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا بيىل قاڭتار جانە ناۋرىز ايلارىندا 729 مىڭ ادام جرۆي اۋرۋلارىمەن اۋىرعانىن حابارلادى. بۇل بىلتىرعا قاراعاندا 2,4 ەسەگە كەم.

وسى جىلى قاڭتاردا 34,5 مىڭ، اقپاندا 26,8 مىڭ جانە ناۋرىز ايىندا 34,8 مىڭ سىرقات انىقتالدى. بىلتىر ناۋرىز ايىندا نەبارى 340 ادام اۋىرعان. پاندەميا جاريالانعاننان بۇگىنگە دەيىن ناۋقاستاردىڭ ەڭ كوبى 2020 جىلى شىلدەدە 49 مىڭنان اسا ادامعا ۆيرۋس جۇققان ەدى. بيىلعى ناۋرىزداعى جاعداي بىلتىرعى تامىزدان (41 مىڭ كەيس) كەيىنگى  ۇشىنشى ورىنعا شىقتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 249 مىڭعا جۋىقتاسا، 1 تامىزدان بىلايعى كوروناۆيرۋس پنەۆمونياسى 50,5 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 299,6 مىڭعا جەتكەن. وسى ارالىقتا جالپى ۆيرۋس جۇققانداردىڭ 5383-ءى (كۆي+ / U07.1 – 3042, كۆي- / U07.2 – 694, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1619 ادامدى جالپى ستاتيستيكاعا ەنگىزبەيدى.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 49-ورىندا تۇر.

"The Qazaq Times"