كورنەكى سۋرەت. فوتو: قر ۇكىمەتى سايتى / primeminister.kz

كوروناۆيرۋسقا قارسى قازاقستاندىق ۆاكتسينا ءوندىرىسىنىڭ مەملەكەتتىك جوسپارى كوپ قۇبىلدى. تۇركيادا قۇيىلادى دەلىنگەن باستاما كەيىننەن ىسكە اسپاي قالدى. زاۋىت قۇرىلىسى، ۆاكتسينانى جاساپ شىعارۋ، ونىڭ جاپپاي ءوندىرىسى ت.ب. شىعىندارعا از قارجى جۇمسالمادى.

QT رەداكتسياسى پرەمەر-مينيستر اسقار ءماميننىڭ اتىنا جولداعان سۇراۋ حاتىنا وسى ساۋالدار بويىنشا جارتىلاي بولسا دا جاۋاپ الدى.

«ءبىلىم جانە عىلىم مينيسترلىگىنىڭ اقپاراتىنا سايكەس، «بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى» رمك-نىڭ 2021 جىلعى 8 قازانداعى №05-03/2165 حاتىنا سايكەس COVID-19 ىندەتىنە قارسى 5 ءتۇرلى ۆاكتسينا ازىرلەۋگە 1,5 ملرد. تەڭگە ءبولىندى»، – دەلىنگەن ۇكىمەتتىڭ جاۋاپ حاتىندا.

ءساۋىر ايىندا ينستيتۋت باسشىلىعى اتىشۋلى QazVac ۆاكتسيناسىن قوسا العاندا بەس ءتۇرلى ەكپە ازىرلەنىپ جاتقانىن حابارلاعان. ەكىنشى ءتۇرى – سۋبۋنيتتىك ەكپە، بۇل كلينيكاعا دەيىنگى كەزەڭنەن تولىق ءوتىپ ۇلگەرگەن. تاعى ەكى بىردەي ۆەكتورلى ۆاكتسينا جاسالىپ جاتىر. ولار دارىلىك زاتتاردى ساراپتاۋ ۇلتتىق ورتالىعىندا مەملەكەتتىك ساراپتامادان وڭ ناتيجە كورسەتكەنى ايتىلدى. ۆاكتسينانىڭ بەسىنشى ءتۇرى – اكتۆيتى، ياعني «ءتىرى» ۆاكتسينا.

سونىمەن قوسا، جەرى 4,1 گەكتار بولاتىن اۋماقتا قونىس تەپكەن ەكى قاباتتى   بيوفارماتسەۆتيكالىق زاۋىت قۇرىلىسىن «OtarBioPharm» جشس سالىپ جاتىر. ءبىرىنشى كەزەڭى بيىل تامىزدىڭ سوڭىندا، ەكىنشى كەزەڭى اياقتالعان سوڭ 2022 جىلى تولىق قولدانىلۋعا بەرىلەدى دەپ جوسپارلانعان. اۋماعى 620 شارشى مەتر نىسان ىسكە قوسىلعان كەزدە جىلىنا قۇيىلاتىن قۇتىعا بايلانىستى 30-60 ملن دوزا ارالىعىندا پرەپارات ونىدىرىلمەك. زاۋىت قۇرىلىسىنىڭ قۇنى 7 ملرد تەڭگە.

بيولوگيالىق قاۋىپسىزدىك ماسەلەلەرى جونىندەگى عىلىمي زەرتتەۋ ينستيتۋتىنىڭ زاۋىتى سق-فارماتسيا وپەراتورىنىڭ قورىنا جىل سوڭىنا دەيىن 2 ميلليوننان اسا دوزا ۆاكتسينا جەتكىزۋى كەرەك. قاڭتار-تامىز ايلارىندا 925 مىڭ دوزا جەتكىزىلگەن.

ۇكىمەت كوكتەمدە قابىلداعان قاۋلىسىندا QazCovid-in وتاندىق ۆاكتسيناسىنىڭ 7 ميلليوننان اسا ادامعا ارنالعان بيۋدجەتى 31 ملرد 610 ملن 900 مىڭ تەڭگەگە 15 ملن 680 مىڭ دوزاسىن ساتىپ الۋدى جوسپارلاعانىمەن، كوپ وتپەي جازدا مەجەنى بەس ەسەگە قىسقارتتى. ءسويتىپ بيىلعا ءوندىرىس كولەمىن 1,5 ملن  ازاماتتى ەگۋ ءۇشىن 6 ملرد تەڭگە قارجىعا 3 ملن دوزا كولەمىندە بەكىتكەن. كەيبىر ساراپشىلار مەن ازاماتتىق بەلسەندىلەر وتاندىق ەكپە وندىرىسىنە قاتىستى بيلىك جوسپارىنىڭ كۇرت وزگەرۋىن ۇكىمەت جۇمىسىنداعى كەمشىلىك پەن رەسەيلىك ۆاكتسينانىڭ مونوپولياسى رەتىندە سىناعان.

قىركۇيەك ايىنىڭ باسىندا ينستيتۋت ديرەكتورى كۇنسۇلۋ زاكاريا QazVac-تى جىل سوڭىنا دەيىن شۆەيتساريا تىركەيتىنىن مالىمدەگەن. ارى قاراي افريكا مەن لاتىن امەريكا ەلدەرىنە ەكسپورتتاۋ باستاماسى كوتەرىلدى.

قازاقستان پاندەميا باستالعالى كوروناۆيرۋسقا قارسى كۇرەسكە 565 ملرد تەڭگە قارجى بولگەن. ونىڭ 108 ملرد تەڭگەسى تەك ۆاكتسيناعا قاراستىرىلعان. بىراق بۇل ەسەپكە Pfizer جانە رەۆاكتسيناتسيا شىعىنى كىرمەگەن.

قاراشا ايىنىڭ ءۇشىنشى ونكۇندىگىندە ەكپە العانىنا جارتى جىلدان اسقاندارعا ارنالعان رەۆاكتسيناتسيا ناۋقانى باستالادى. الداعى جىلى شەتەلدىك ۆاكتسينالار اقىلى بولادى. رەسمي دەرەككە قاراعاندا، قازىر ەكپەنىڭ تولىق كومپونەنتىن العانى – 7,5 ملن ادام. مينيسترلىك جىل سوڭىنا دەيىن 11 ميلليوننان اسا ادامعا ەكپە سالۋدى جوسپارلاپ وتىر.

The Qazaq Times