قازاقستان ۇكىمەتى وتاندىق ۆاكتسيناتسيا ءوندىرىسى كولەمى جونىندەگى جوسپارىن بەلگىسىز سەبەپتەرمەن وزگەرتكەن. كوكتەمدە 31 ملرد تەڭگە قارجى بولىنگەن ەكپەنىڭ كولەمى 5 ەسەگە قىسقارعانى بەلگىلى بولدى.
دەنساۋلىق ساقتاۋ ءمينيسترى الەكسەي تسوي 28 شىلدەدە QT ءتىلشىسىنىڭ ساۋالىنا «ءۇش اپتادا ارەڭ» بەرگەن جاۋابىندا:
– قازىر كەلىسىمشارت جاسالدى، وندا جىل سوڭىنا دەيىن QazVac ەكپەسىنىڭ 3 ملن دوزاسى ءوندىرۋ قاراستىرىلعان. قالعان كولەمى قايتا قارالدى. بۇگىنگى تاڭدا جەتكىزىلىپ جاتقان Sputnik V ەكپەسىنەن بولەك قىتايدىڭ جاڭا ۆاكتسيناسىنا قول جەتكىزۋ ءۇشىن ەكىجاقتى كەلىسسوز وتكىزىلۋدە. ەكپەمەن جەدەل قامتۋ باعىتىندا جۇمىس ءجۇرىپ جاتىر، قالاي كەلىسىمشارتقا قول قويىلادى، قارجى ەسەبىن جاريالايتىن بولامىز، – دەدى.
وتكەن جۇمدا، شىلدەنىڭ 23-ءى ورتكومدا وتكەن بريفينگتە مينيستر «50 ملرد قارجىنىڭ قايتا ءبولىنىسىن مىندەتتى تۇردە تولىق كورسەتەمىز» دەگەن ەدى. سارسەنبى كۇنگى ءداستۇرلى بريفينگتە بۇل ۋادەسىن ورىندامادى، مەرزىمىن تاعى شەگەردى.
وسىعان دەيىن 21 ءساۋىر كۇنى ۆەدومستۆو تاراپىنان رەداكتسياعا جولدانعان جاۋاپ حاتتا ۇكىمەت قاۋلىسىنا سايكەس 50 ملرد تەڭگەدەن استام قارجىعا ەكى ەكپە ساتىپ الاتىنىن حابارلاعان.
«قازاقستان رەسپۋبليكاسى ۇكىمەتىنىڭ رەزەرۆىنەن قاراجات ءبولۋ تۋرالى» 31 ناۋرىزداعى قاۋلىعا سايكەس ۆاكتسيناتسيا ناۋقانىندا قولداناتىن قۇرالدارعا 50 ملرد 229 ملن تەڭگە قاراجات بولىنگەن:
- سپۋتنيك V ۆاكتسيناسىنىڭ 2 ملن 60 مىڭ دوزاسىن ساتىپ الۋ ءۇشىن 18 ملرد 24 ملن 600 مىڭ،
- QazCovid-in وتاندىق ۆاكتسيناسىنىڭ 15 ملن 680 مىڭ دوزاسىنا 31 ملرد 610 ملن 900 مىڭ،
- 19 ملن 800 مىڭ دانا شپريتس ساتىپ الۋعا 594 ملن تەڭگە جۇمسالماق»، – دەلىنگەن ەدى رەسمي جاۋاپتا.
دەگەنمەن شىنايى جاعدايدا بۇگىندە 5,2 ملن قازاقستاندىقتىڭ باسىم بولىگى سپۋتنيك V (گامكوۆيدۆاك) ەكپەسىن الۋعا ءماجبۇر بولدى. ال «ەستۋشى ۇكىمەت» جوسپارىندا رەسەيلىك ۆاكتسينا كولەمى نەبارى 2 ملن شاماسىندا بەكتىلىپ ەدى. بۇل مەجە وزگەرگەن-وزگەرمەگەنى جونىندە جاۋاپتى ۆەدومستۆو ەشقانداي مالىمەت تاراتپاعان. مينيستر الەكسەي تسوي 50 ملرد تەڭگەنىڭ جۇمسالۋ باعىتى مەن ەسەبىن بەرە الماي كەلەدى.
جامبىل وبلىسىندا 7 ملرد تەڭگە قارجىعا سالىنعان QazVac ۆاكتسيناسىن شىعاراتىن زاۋىتتىڭ اشىلىپ، وسى كۇنگە دەيىن 600 مىڭ دوزا شىعارعانى، ونىڭ الدى تامىز ايىندا تاراتىلاتىنى تۋرالى اقپارات سارسەنبىدە بىراق ايتىلدى. ۇكىمەتتىڭ بۇل وقيعانى نەگە جاسىرىن ۇستاعانى بەلگىسىز. مينيسترلىكتىڭ سىلبىر ارەكەتىن بىرقاتار اقپارات قۇرالدارى وكىلدەرى سىنعا الدى. ۇكىمەت زاۋىتتىڭ ىسكە قوسىلۋى عانا ەمەس، وتاندىق ەكپەنىڭ 25 مىڭ دوزاسى قىرعىزتانعا گۋمانيتارلىق كومەك رەتىندە جونەلتىلگەنى جونىندە اقپارات تاراتپادى. مۇنى قىرعىزستاننىڭ دەنساۋلىق ساقتاۋ مينيسترلىگىنىڭ ءباسپاسوز قىزمەتى جاريالادى.
ماۋسىم ايىنىڭ سوڭىندا ۆيتسە-پرەمەر ەرالى توعجانوۆ قازاقستاننىڭ تۇركيادا QazVac ۆاكتسيناسىن قۇيۋدان باس تارتقانىن حابارلاعان جانە كۇزدەن باستاپ زاۋىت ءوندىرىستى 1 ملن دوزاعا دەيىن ارتتىرادى دەپ بولجاعان. ءاۋ باستا جىلىنا 1 ملن دوزا ەكپە وندىرەدى دەپ جوسپارلاعان ۇكىمەت مىندەتتى مەجە رەتىندە نەلىكتەن 15,5 ملن دوزا ءوندىرۋدى ماقسات ەتكەنى بۇلىڭعىر.
QazVac ەكپەسىن ءبىلىم مينيسترلىگىنە قاراستى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى يناكتيۆتى ۆيرۋس ادىسىمەن جاساپ شىعارعان. ساراپشىلار مەن ماماندار بىرەر ايدان بەرى سۇراپ كەلە جاتقانىنا قاراماستان قازاقستاندىق ۆاكتسينانىڭ الەۋەتى مەن اسەر-سالدارى تۋرالى تولىق عىلىمي قورىتىندى دەكرەكتەرى اشىق اقپارات رەسۋرستارىنا جاريالانا قويمادى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟