جامبىل وبلىسى بايزاق اۋدانى بوتامويناق اۋىلدىق وكرۋگىنىڭ كىرەبەرىسى. 2021 جىلدىڭ 29 تامىزى. فوتو: QT / كۇلتەگىن اسپانۇلى

جامبىل وبلىسى بايزاق اۋدانىنداعى جويقىن جارىلىستان قيراعان، بۇلىنگەن ۇيلەردى بيلىك ەكى اي ىشىندە قالپىنا كەلتىرىپ بەرمەك. ال جارىلىستان ەڭ قاتتى زارداپ شەككەن قاينار اۋلىنىڭ تۇرعىندارى باسپاناسى قالپىنا كەلتىرىلگەنشە، جەرگىلىكتى بيلىك قۇرىپ بەرگەن پالاتكا مەن تۋعان-تۋىستارانىڭ ۇيىندە تۇرادى. بۇل جونىندە 29 تامىزدا وقيعا ورنىندا جۇرگەن جۋرناليستەردىڭ سۇراعىنا جاۋاپ بەرگەن وبلىس اكىمى بەردىبەك ساپارباەۆ ايتتى. 

جەدەل شتاب كەڭسەسىنە بارعان The Qazaq Times ءتىلشىسى اكىمگە "قاينار اۋىلىنداعى ءۇيى بۇلىنگەن وتباسىلاردىڭ بالالارى وقۋ جىلىن قالاي جالعاستىرادى؟ ءۇي قۇرىلىسى اياقتالعانشا ۋاقىتشا ينتەرناتتا جاتا ما؟" دەپ سۇرادى.

– ولار وسى ۋاقىتقا دەيىن قالاي وقىپ كەلدى، سولاي وقۋىن جالعاستىرادى. مەن جاڭا ايتتىم عوي، ولاردىڭ ۇيلەرىنىڭ الدىنان پالاتكا قۇرامىز، سول جەردە تۇرادى. وعان قوسىمشا وزدەرىنىڭ اعايىن-تۋىستارىنىڭ ۇيىندە تۇراتىن بولادى،– دەدى ساپارباەۆ.

جامبىل وبلىسىنىڭ اكىمى بەردىبەك ساپارباەۆ. فوتو: QT / كۇلتەگىن اسپانۇلى

ونىڭ ايتۋىنا قاراعاندا، جارىلىس سالدارىنان بارلىعى 118 نىسان بۇلىنگەن. ونىڭ ىشىندە 106-سى تۇرعىن ءۇي، قالعان 12-ءسى كوممەرتسيالىق نىسان.

"106 تۇرعىن ءۇيدىڭ ىشىندە 35-ءىن كۇردەلى جوندەۋدەن وتكىزۋ كەرەك. قالعان 71-ءى قاتتى بۇلىنبەگەن. بۇگىننەن باستاپ قالپىنا كەلتىرۋ جۇمىستارى باستالادى. ەكى اي ىشىندە جۇمىستى تولىق بىتىرەمىز. ۇكىمەت قۇرعان كومميسيا قالپىنا كەلتىرۋ جۇمىستارىنا قانشا قارجى كەرەك ەكەنىن انىقتاپ جاتىر" دەدى وبلىس اكىمى جۋرناليستەرگە بەرگەن سۇحباتىندا.

ساپارباەۆ سوزىنشە، جارىلىس سالدارىنان ءۇش مەكتەپ پەن ءبىر مەديتسينالىق پۋنكت زاقىمدالعان.

"جىبەك جولى اۋىلىنداعى مەكتەپ قاتتى بۇلىنگەن. ول 1956 جىلى سالىنعان ەسكى مەكتەپ. 118 بالا وقيدى. ورنىنا جاڭا مەكتەپ سالۋ جونىندە شەشىم قابىلداندى. ال ۇشبۇلاق پەن بازاربايداعى مەكتەپتەر قاتتى بۇلىنبەگەن. ەكى مەكتەپتى جەرگىلىكتى دەمەۋشىلەردىڭ كومەگىمەن قالپىنا كەلتىرىپ جاتىرمىز. 1 قىركۇيەككە دەيىن جۇمىستى اياقتايمىز. سونىمەن قاتار ءبىر مەديتسينالىق پۋنكت بۇلىنگەن. ونى دا ءبىر اپتانىڭ ىشىندە قالپىنا كەلتىرەمىز" دەدى ساپارباەۆ.

جامبىل وبلىسىندا جۇرگەن رەداكتسيا ءتىلشىسى جويقىن جارىلىس بولعان اسكەري بولىمنەن جارتى شىقىرىم جەردەگى قاينار اۋىلىنا بارىپ، تۇرعىندارمەن تىلدەسپەكشى بولعان. بىراق اۋىلعا كىرەر جولدى اسكەر كۇزەتىپ تۇر، باق وكىلدەرىن قاينارعا قاراي جىبەرمەيدى.

قاينار اۋىلىنا اپاراتىن جولدى كۇزەتىپ تۇرعان اسكەريلەر. 2021 جىلدىڭ 29 تامىزى. فوتو: QT / كۇلتەگىن اسپانۇلى

الماتى-تاراز تراسساسىنان قاينار اۋىلىنا قاراي بۇرىلاتىن جول. 2021 جىلدىڭ 29 تامىزى.فوتو: QT / كۇلتەگىن اسپانۇلى

قاينار اۋىلىنا قاراي كەتىپ بارا جاتقان اسكەري كولىك. 2021 جىلدىڭ 29 تامىزى. فوتو: QT / كۇلتەگىن اسپانۇلى

ءتىلشىنىڭ ايتۋىنشا، جارىلىس قاۋپى سەيىلدى مە دەگەن سۇراققا جاۋاپ بەرەتىن قورعانىس مينيسترلىگىنىڭ وكىلدەرىمەن تىلدەسۋ مۇمكىن ەمەس. سوندىقتان جۋرناليستەر بۇل سۇراقتى وبلىس اكىمى ساپارباەۆقا قويعان.

"قاۋىپ تولىق سەيىلدى دەپ ايتۋعا بولادى. بىراق ەندى "بولادى" يا "بولمايدى" دەپ ايتۋعا تاعى دا بولمايدى. سەبەبى جۇمىستار ءالى جالعاسىپ جاتىر. بارلىعى 185 گەكتار جەر. ونى تولىعىمەن تەكسەرىپ ءبىتىرۋى كەرەك. سول كەزدە تولىق سەيىلدى دەپ ايتۋعا بولادى. بىراق قازىر ول جەردە ءورت جوق، تەك ازداعان ءتۇتىن بار. جارىلىس جوق، توقتاتىلدى دەپ ايتۋعا بولادى" دەدى ساپارباەۆ.

وبلىس اكىمى قايتىس بولعان ازاماتتاردىڭ وتباسىنا زاڭعا سايكەس وتەماقى تولەنەتىن ايتتى. بىراق ناقتى قانداي مولشەردە وتەماقى بەرىلەتىنى ءالى بەلگىسىز.

26 تامىز كەشكىسىن جامبىل وبلىسى بايزاق اۋدانىنداعى №28349 اسكەري ءبولىمى اۋماعىندا ورنالاسقان وق-ءدارى ساقتالاتىن قويمادا جارىلىس بولدى. سوڭعى رەسمي دەرەككە ساي، توتەنشە وقيعا سالدارىنان 13 ادام قازا تاۋىپ، 98 ادام زارداپ شەككەن. وقيعا بولعان كەزدە حابار-وشارسىز كەتكەن ءۇش ادامدى ءالى ىزدەپ جاتىر.

ونداعان ادامنىڭ ءومىرىن جالماعان جويقىن جارىلىسقا نە سەبەپ بولعانى ءالى بەلگىسىز. قورعانىس ءمينيسترى نۇرلان ەرمەكباەۆتىڭ توپشىلاۋىنشا، جارىلىسقا قويمادا قاۋىپسىزدىك تالاپتارىنىڭ ساقتالماۋى، يا حيميالىق رەاكتسيامەن وزدىگىنەن تۋى نەمەسە ديۆەرسيا سەبەپ بولۋى مۇمكىن.

The Qazaq Times